(ភ្នំពេញ)៖ រោងចក្រផលិតស្រោមដៃ (PVC & Rubber) និងឧបករណ៍បរិក្ខារពេទ្យ របស់ក្រុមហ៊ុន Nex Healthcare Co., Ltd. ដែលមានទីតាំងស្ថិតក្នុងតំបន់សេដ្ឋកិច្ចពិសេស ឈីលូ ខេត្តស្វាយរៀង ក្នុងទំហំទុនវិនិយោគប្រមាណ ២៧៣ លានដុល្លារអាមេរិក ត្រូវបានបញ្ចុះបឋមសិលាសាងសង់លើផ្ទៃដីទំហំ ២១ ហិកតា នៅថ្ងៃទី២ ខែមីនា ឆ្នាំ២០២៥នេះ ក្រោមអធិបតីភាព លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា។
ក្រុមហ៊ុននេះ ជាក្រុមហ៊ុនបុត្រសម្ព័ន្ធរបស់ក្រុមហ៊ុន Shadong Blue Sail Health Technology Co., Ltd. មកពីខេត្តសានដុង សាធារណរដ្ឋប្រជាមានិតចិន តំណាងដោយ លោកស្រី Liu Wenjing ។ ផលិតផលស្រោមដៃការពារសុខភាពរបស់ក្រុមហ៊ុននេះ ជាប់ចំណាត់ថ្នាក់លេខ៣ នៅទូទាំងពិភពលោក, រីឯឧបករណ៍ពិនិត្យបេះដូងជាប់ចំណាត់ថ្នាក់លេខ ៤ ទូទាំងពិភពលោក និងជាប់លេខ ២ នៅក្នុងប្រទេសចិន។
នាឱកាសនេះ លោក ជា វុទ្ធី បានបញ្ជាក់ជូនវិនិយោគិន និងភ្ញៀវជាតិ-អន្តរជាតិទាំងអស់ អំពីភាពជោគជ័យរបស់តំបន់សេដ្ឋកិច្ចពិសេសមកដល់សព្វថ្ងៃនេះ គឺកើតចេញក្រោមគំនិតផ្តួចផ្តើមប្រកបដោយគតិបណ្ឌិតរបស់សម្តេចតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា ដែលតែងតែយកចិត្តទុកដាក់ខ្ពស់ចំពោះតំបន់សេដ្ឋកិច្ចពិសេស ដោយប្រើនូវអភិក្រមចំនួន៣ រួមមានៈ កាត់បន្ថយពេលវេលា, កាត់បន្ថយចំណាយ និងកាត់បន្ថយឋានានុក្រមលេីប្រតិបត្តិការវិនិយោគ និងនីតិវិធីផ្សេងៗ។
បន្ថែមពីនេះ សម្តេចមហាបវរធិបតី ហ៊ុន ម៉ាណែត នាយកដ្ឋានរដ្ឋមន្ត្រីនៃកម្ពុជា ក៏បានផ្តល់នូវអភិក្រមចំនួន៣ គឺ ការទាក់ម៉ូយ ទាក់ទាញវិនិយោគិន, ការថែទាំវិនិយោគិន និងការជំរុញដើម្បីឱ្យវិនិយោគិនបន្តទាក់ទាញវិនិយោគិនថ្មីៗបន្ថែមទៀត។ជារួម សមិទ្ធផលវឌ្ឍនភាពនៃការរីកចម្រើននៃការអភិវឌ្ឍតំបន់សេដ្ឋកិច្ចពិសេសនេះ កើតចេញពីការចង្អុលបង្ហាញ ការណែនាំដ៏ប៉ិនប្រសប់របស់សម្តេចទាំងពីរ។
ជាការឆ្លើយតបមន្ត្រីតំណាងក្រសួងស្ថាប័ន និងអាជ្ញាធរទាំងអស់ដែលបំពេញការងារប្រចាំការនៅតាមតំបន់ បានប្តេជ្ញាយ៉ាងម៉ុតមាំថា នឹងបន្តខិតខំអនុវត្តតាមការណែនាំ និងការចង្អុលបង្ហាញស្របតាមអភិក្រមដ៏ថ្លៃថ្លារបស់សម្តេចទាំងពីរ។
ឆ្លៀតឱកាសនេះដែរ លោក ជា វុទ្ធី ក៏បានអញ្ជើញចូលទៅក្នុងតំបន់សេដ្ឋកិច្ចពិសេស ហ្វ័រស៊ាំង អ៉ិនធើណេសិនណាល, តំបន់សេដ្ឋកិច្ចពិសេស ហ្វុងហ្វ៊ូ និងតំបន់សេដ្ឋកិច្ចពិសេស ហ័្វរស៊ុន ហ្គីហ្គា ដើម្បីពិនិត្យមើលវឌ្ឍនភាពនៃការអភិវឌ្ឍតំបន់ផងដែរ។
ការកើនឡើងនៃចំនួនគម្រោងវិនិយោគជាបន្តបន្ទាប់ ក៏ដូចជាតំបន់សេដ្ឋកិច្ចពិសេសនាពេលនេះ បានសបញ្ជាក់អំពីការអភិវឌ្ឍន៍របស់តំបន់សេដ្ឋកិច្ចពិសេស បាននិងកំពុងទាក់ទាញវិនិយោគិនមកបណ្តាក់ទុនវិនិយោគជាហូរហែរ ព្រមទាំងបានបង្កើតការងារ និងលើកកម្ពស់ជីវភាពបងប្អូនប្រជាពលរដ្ឋ ជាពិសេស បានជំរុញឱ្យមានកំណើនសេដ្ឋកិច្ចជាតិជាបន្តបន្ទាប់៕
