(ភ្នំពេញ)៖ ​លោក ឡុង ឌីម៉ង់ អភិបាលរងខេត្ត និងជាអ្នកនាំពាក្យខេត្តព្រះសីហនុ ​បានលើកទឹកចិត្តដល់វិនិយោគិននានា ចូលរួមអភិវឌ្ឍន៍វិស័យឧស្សាហកម្មដែលប្រើប្រាស់បច្ចេកវិទ្យា​ នៅក្នុងខេត្ដព្រះសីហនុ ដើម្បីជំរុញ​ការធ្វើពិពិធកម្មផលិតកម្ម និងបង្កើតតម្លៃបន្ថែម សម្រាប់ទំនិញនាំចេញ។

លោកបានលើកឡើងថា នៅក្នុងខេត្តព្រះសីហនុ បានកំណត់ថា ការអភិវឌ្ឍន៍វិស័យឧស្សាហកម្មដែលប្រើប្រាស់បច្ចេកវិទ្យា គឺវិស័យអទិភាពមួយ ក្នុងចំណោមវិស័យអទិភាពសំខាន់ៗ ដែលរដ្ឋបាលខេត្តបាននិងកំពុងយកចិត្តទុកដាក់ ព្រោះជាវិស័យជន្ទល់សេដ្ឋកិច្ចរបស់ខេត្ត។

ការជំរុញការអភិវឌ្ឍន៍វិស័យឧស្សាហកម្មដែលប្រើប្រាស់បច្ចេកវិទ្យានេះ គឺដើម្បីចាប់ផ្តើមធ្វើពិពិធកម្មនៃការអភិវឌ្ឍន៍វិស័យឧស្សាហកម្ម ​ពោលគឺអភិវឌ្ឍន៍ពីឧស្សាហកម្ម ដែលប្រើប្រាស់កម្លាំងពលកម្មច្រើន ​ដូចជាឧស្សាហកម្មកាត់ដេរ បន្ថែមមកឧស្សាហកម្មផលិតគ្រឿងបង្គុំ គ្រឿងបន្លាស់ គ្រឿងអេឡិចត្រូនិកជាដើម ដើម្បីបង្កើតតម្លៃបន្ថែម។ ហើយឧស្សាហកម្មដែលប្រើប្រាស់បច្ចេកវិទ្យាទាំងនេះ ក៏ជំរុញនូវការនាំចេញ ដែលនាំមកនូវចំណូលចូលសេដ្ឋកិច្ច​ និងបង្កើនប្រាក់ឈ្នួលបុគ្គលិក កម្មករ ខ្ពស់ជាងមុនផងដែរ។

ការលើកឡើងរបស់លោក ឡុង ឌីម៉ង់ ធ្វើឡើងក្នុង FRESH BUSINESS ពិភាក្សាលើប្រធានបទ៖ «ផែនការអភិវឌ្ឍន៍ខេត្តព្រះសីហនុ ទៅជាតំបន់សេដ្ឋកិច្ចពហុបំណង»។

សូមស្តាប់ការលើកឡើងបន្ថែមរបស់ លោក ឡុង ឌីម៉ង់​៖