(ភ្នំពេញ)៖ អ្នកជំនាញក្នុងវិស័យទេសចរណ៍ បានបង្ហាញសុទិដ្ឋនិយម ចំពោះដំណើរទស្សនកិច្ចផ្លូវរដ្ឋរបស់ លោក ស៊ី ជីនពីង ប្រធានាធិបតីចិន មកកាន់កម្ពុជា នឹងក្លាយជាផ្នែកមួយ ក្នុងការទាក់ទាញភ្ញៀវទេសចរចិនកម្ពុជា ឱ្យបានតាមការរំពឹងទុករបស់រដ្ឋាភិបាលកម្ពុជា ជាពិសេសជួយលុបបំបាត់នូវព័ត៌មានអវិជ្ជមានទាំងឡាយ ដែលបុគ្គលមួយចំនួន បានផ្សព្វផ្សាយមិនល្អពីកម្ពុជា។

ការបង្ហាញសុទិដ្ឋនិយមនេះ ស្របពេលដែលភាគីកម្ពុជា-ចិន បន្តឯកភាពកំណត់យកឆ្នាំ២០២៥ ជា «ឆ្នាំទេសចរណ៍កម្ពុជា-ចិន» និងលើកទឹកចិត្តប្រជាពលរដ្ឋខ្លួន ឲ្យធ្វើដំណើររវាងប្រទេសទាំងពីរ។

លោក ធួន ស៊ីណាន ប្រធានសមាគមទេសចរណ៍អាស៊ីបាស៊ីហ្វិក (PATA) បានលើកឡើងថា ការជំរុញរបស់ប្រធានាធិបតីចិន ឱ្យប្រជាជនរបស់ខ្លួនមកដើរកម្សាន្តនៅកម្ពុជា គឺជាដែលជាអ្វីដែលអ្នកប្រកបរបរ ក្នុងវិស័យទេសចរណ៍កំពុងរង់ចាំ ខណៈក្រោយការរីករាលដាលនៃជំងឺកូវីដ១៩ កម្ពុជាទទួលបានភ្ញៀវទេសចិន នៅមានកម្រិតនៅឡើយ។

លោកបានកត់សម្គាល់ថា ចាប់តាំងពីជំងឺកូវីដ១៩ ស្រាកស្រាន្តមកទេសចរចិន បានត្រឡប់មកដើរកម្សាន្តនៅបណ្តាប្រទេសជិតខាងកម្ពុជាហើយ រួមទាំងឡាវផងដែរ។ ដោយឡែក នៅតែកម្ពុជា តែទទួលបានភ្ញៀវទេសចរចិនតិចតួច ក្នុងរង្វង់ជាង ៨០ម៉ឺននាក់ប៉ុណ្ណោះ ក្នុងមួយឆ្នាំ។ ហើយក្នុងចំណោម ៨០ម៉ឺននាក់នេះ គឺមាន ៣ប្រភេទ រួមកម្មករ ពាណិជ្ជករចេញ-ចូល និងភ្ញៀវដើរកម្សាន្ត។

លោកលើកឡើងថា ការមកតិចតូចនៃទេសចរចិននេះ គឺដោយសារតែរដ្ឋាភិបាលចិន មិនមានការលើកទឹកចិត្តឱ្យប្រជាជនរបស់ខ្លួន មកកម្សាន្តនៅកម្ពុជា ដោយសារតែខ្លាចបញ្ហាផ្សេងៗ ដូចដែលបុគ្គលមួយចំនួន យកទៅផ្សាយអាក្រក់ពីកម្ពុជា ជាពិសេសករណីចាប់ជំរិត និងការឆបោកតាមអនឡាញជាដើម។ ហេតុដូច្នេះហើយ លោករំពឹងថា តាមរយៈដំណើរទស្សនកិច្ចនេះ នឹងមានការផ្លាស់ប្តូរជាវិជ្ជមាន។

លោកមានប្រសាសន៍បន្ថែមថា «ដំណើរទស្សនកិច្ចរបស់ប្រធានាធិបតីចិន មកកម្ពុជានេះ គឺមានតម្លៃខ្លាំងណាស់ នៅក្នុងសេដ្ឋកិច្ច ភូមិសាស្រ្តនយោបាយកម្ពុជា ព្រោះចិនជាប្រទេសធំ និងជាមិត្តដែលតែងជួយកម្ពុជា។ សម្រាប់ខ្ញុំដំណើរទេស្សនកិច្ចនេះ វានឹងនាំមកនូវការផ្លាស់ប្តូរ ក្នុងទំនាក់ទំនងពាណិជ្ជកម្មរវាងចិន និងកម្ពុជា ជាពិសេសក្នុងពេលសង្រ្គាមភូមិសាស្រ្តនយោបាយ និងសង្រ្គាមពន្ធរវាងចិន អាមេរិក និងពិភពលោកទាំងមូល»។

តាមសេចក្ដីប្រកាសលទ្ធផល របស់ក្រសួងការបរទេសកម្ពុជា ស្ដីពីដំណើរទស្សនកិច្ចរបស់លោកប្រធានាធិបតី ស៊ី ជិនភីង ដែលចេញផ្សាយនៅថ្ងៃទី១៨ ខែមេសា ឆ្នាំ២០២៥ បានបញ្ជាក់ថា ភាគីកម្ពុជា-ចិន បន្តឯកភាពកំណត់យកឆ្នាំ២០២៥ ជា «ឆ្នាំទេសចរណ៍កម្ពុជា-ចិន» និងលើកទឹកចិត្តប្រជាពលរដ្ឋខ្លួន ឲ្យធ្វើដំណើររវាងប្រទេសទាំងពីរ បន្ទាប់ពីឆ្នាំ២០២៤ ដែលជាឆ្នាំនៃការផ្លាស់ប្តូរប្រជាជន និងប្រជាជន និងវប្បធម៌។

ជាមួយគ្នានេះ កម្ពុជា-ចិន នឹងរួមគ្នាអភិវឌ្ឍន៍វិថីទេសចរណ៍ លើកកម្ពស់ការផ្សព្វផ្សាយគោលដៅទេសចរណ៍ និងពង្រឹងកិច្ចសហប្រតិបត្តិការ ផ្នែកសុវត្ថិភាពទេសចរណ៍។
ក្រសួងការបរទេស បានបញ្ជាក់ទៀតថា «កម្ពុជា-ចិន នឹងពង្រឹងកិច្ចខិតខំប្រឹងប្រែងជំរុញកម្មវិធីអភិរក្ស និងស្តារព្រះ បរមរាជវាំងបុរាណនៅអង្គរ ក៏ដូចជាប្រាសាទព្រះវិហារ និងបេតិកភណ្ឌវប្បធម៌ដទៃទៀត»។

លោក អនហេង សុភ័ក្រ ប្រធានសមាគមមគ្គុទេសក៍ទេសចរណ៍ភាសាចិនកម្ពុជា បានប្រាប់បណ្តាញព័ត៌មាន Fresh Newsថា ដំណើរទស្សនកិច្ចរបស់លោក ស៊ី ជិងពីង គឺជាភាពវិជ្ជមានមួយដែលផ្តល់ភាពស្អាតស្អំ និងជំនឿទុកចិត្តដល់ប្រជាពលរដ្ឋចិន ក្នុងការមកកម្សាន្តនៅកម្ពុជា ក្នុងគោលដៅទេសចរណ៍ និងធ្វើធុរកិច្ច។ ជាពិសេស រដ្ឋាភិបាលនៃប្រទេសទាំងពីរ បានកំណត់យកឆ្នាំ២០២៥ ជា «ឆ្នាំទេសចរណ៍កម្ពុជា-ចិន» នឹងក្លាយជាផ្នែកមួយដែលធ្វើយើងមានក្តីសង្ឃឹម និងរំពឹងទុកថា ភ្ញៀវទេសចរចិន នឹងកើនឡើងក្នុងឆ្នាំនេះ។

ទន្ទឹមគ្នានេះ លោកបានប្រាប់ពីស្ថានភាពទេសចរចិននៅដើមឆ្នាំនេះផងដែរថា ភ្ញៀវទេសចរចិនដែលមកកម្សាន្តនៅកម្ពុជា នៅដើមឆ្នាំ២០២៥នេះ ហាក់មិនទាន់មានកំណើនខ្លាំង ឬដូចគ្នានឹងមុនពេលរីករាលដាលនៃជំងឺកូវីដ១៩ នៅឡើយទេ ពោលគឺប្រហាក់ប្រហែលនឹងឆ្នាំមុន ខុសពីភ្ញៀវទេសចរពីប្រទេសដទៃ ដែលពួកគេបានត្រឡប់មកវិញច្រើន។

យោងតាមទិន្នន័យក្រសួងទេសចរណ៍ កាលឆ្នាំ ២០២៤ កម្ពុជាទទួលបានភ្ញៀវទេសចរអន្តរជាតិសរុប ៦.៧លាននាក់ កើនឡើង ២២.៩ភាគរយ ធៀបនឹងឆ្នាំ២០២៣។ ក្នុងនោះ ជនជាតិចិនដែលមកទស្សនាកម្ពុជា មានជាង៨៤ម៉ឺននាក់ កើនឡើង ១២.៧% ដែលធ្វើឱ្យចិន ស្ថិតនៅលេខរៀងទី៣។ ចំណែករយៈពេល ២ខែដើមឆ្នាំ២០២៥ ភ្ញៀវចិនដែលមកកម្ពុជា ចំនួនជាង ១៨ម៉ឺននាក់៕