(ភ្នំពេញ)៖ យន្ដហោះប្រភេទថ្មី ATR72-600 របស់អាកាសចរណ៍ជាតិកម្ពុជា បានមកដល់ជាលើកដំបូង នៅអាកាសយានដ្ឋានអន្តរជាតិភ្នំពេញហើយ នៅថ្ងៃទី២៧ ខែឧសភា ឆ្នាំ២០២៥នេះ ដោយមានការចូលរួមទទួលពីលោកបណ្ឌិត ម៉ៅ ហាវណ្ណាល់ រដ្ឋមន្ដ្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល។

បើតាមសេចក្ដីប្រកាសព័ត៌មាន, យន្តហោះ ATR 72-600 ត្រូវបានគេស្គាល់ថា ប្រសិទ្ធភាពក្នុងការសន្សំប្រេងដ៏ល្អឥតខ្ចោះ ដោយប្រើប្រាស់ប្រេងតិចជាងយន្តហោះប្រភេទចាស់ពី ១៥ទៅ២០% ហើយត្រូវការផ្លូវរត់ខ្លី។ អ្នកដំណើរនឹងរីករាយជាមួយនឹងសម្លេងដ៏ស្ងប់ស្ងាត់ក្នុងយន្តហោះ ផាសុខភាពជាងមុន ជាមួយនឹងកន្លែងអង្គុយធំទូលាយ និងបរិក្ខារទំនើបៗ។

អនុលោមតាមស្តង់ដារបរិស្ថានចុងក្រោយបំផុតរបស់អង្គការ អាកាសចរណ៍ស៊ីវិលអន្តរជាតិ (ICAO) និងត្រូវបានជឿទុកចិត្ត ដោយក្រុមហ៊ុនអាកាសចរណ៍ជាង២០០ នៅទូទាំងពិភពលោក។ ATR 72-600 គឺជាជម្រើសដ៏ឆ្លាតវៃ និងគួរឱ្យទុកចិត្តសម្រាប់ប្រតិបត្តិការក្នុងតំបន់។

ថ្លែងប្រាប់ក្រុមអ្នកសារព័ត៌មាន លោក វ៉ាន់ ចន្ទី អគ្គនាយក នៃអគ្គនាយកដ្ឋានគោលនយោបាយ និងបទបញ្ញត្តិដឹកជញ្ជូនតាមផ្លូវអាកាស របស់រដ្ឋលេខាធិការដ្ឋានអាកាសចរណ៍ស៊ីវិល បានបញ្ជាក់ថា «យន្ដហោះថ្មីនេះ មានតម្លៃ២៤លានដុល្លារ ហើយយន្ដហោះនេះ នឹងយកទៅប្រើប្រាស់ លើការដឹកជញ្ជូន នៅក្នុងស្រុក និងនៅក្នុងតំបន់របស់យើងទាំងមូល»។

បើតាមលោក វ៉ាន់ ចន្ទី, ក្រុមហ៊ុនអាកាសចរណ៍ជាតិកម្ពុជា គ្រោងនឹងនាំយកយន្តហោះ ATR 72-600 ចំនួន៣គ្រឿង នៅឆ្នាំ២០២៥។ បន្ទាប់ពីយន្តហោះទីមួយ មកដល់នៅថ្ងៃនេះ យន្តហោះទីពីរ និងទីបី ត្រូវបានរំពឹងទុកនៅក្នុងខែតុលា និងខែវិច្ឆិកា ផងដែរ។

ស្របគ្នានេះដែរ ក្រុមហ៊ុនអាកាសចរណ៍នេះ ក៏កំពុងជំរុញការដាក់ឱ្យប្រើប្រាស់យន្តហោះ Airbus A320 និងប្រភេទយន្តហោះផ្សេងទៀត ដែលមានសមត្ថភាពប្រតិបត្តិការ ហោះហើរផ្លូវឆ្ងាយ ដោយធានាបាននូវជើងហោះហើរចម្រុះ និងទំនើប ស្របតាមតម្រូវការប្រតិបត្តិការផ្សេងៗគ្នា។

លោក វ៉ាន់ ចន្ទី បានគូសបញ្ជាក់ថា ព្រឹត្តិការណ៍នេះ គឺជាការចាប់ផ្តើមសករាជថ្មី នៃកិច្ចខិតខំប្រឹងប្រែងបន្ត របស់ក្រុមហ៊ុនអាកាសចរណ៍ ក្នុងការនាំយកយន្តហោះដ៏ទំនើបរបស់ខ្លួន ដើម្បីបង្កើនប្រសិទ្ធភាពប្រតិបត្តិការ និងពង្រឹងការតភ្ជាប់ក្នុងស្រុក និងក្រៅប្រទេស។

ដើម្បីឆ្លើយតបទៅនឹងតម្រូវការកើនឡើង នៃការធ្វើដំណើរអន្តរជាតិ ក្រុមហ៊ុនអាកាសចរណ៍ជាតិកម្ពុជា កំពុងរៀបចំផែនការយ៉ាងសកម្ម ក្នុងការពង្រីកបណ្តាញផ្លូវហោះហើររបស់ខ្លួន ទៅកាន់ទីផ្សារដែលមានសក្តានុពល រួមមានអាស៊ីឦសាន ប្រទេសចិន អាស៊ីខាងត្បូង និងអូស្ត្រាលី។

តាមរយៈវិធីសាស្រ្តមួយជំហានម្តងៗ ដោយត្រៀមខ្លួនរួចរាល់សម្រាប់ទីផ្សារ និងលទ្ធភាពប្រតិបត្តិការ ដែលក្រុមហ៊ុនមានគោលបំណងបង្កើនវត្តមាននៅទូទាំងពិភពលោក និងលើកកម្ពស់ការតភ្ជាប់របស់កម្ពុជាជាមួយពិភពលោក។

តាមផែនការយុទ្ធសាស្ត្ររយៈពេលវែងរបស់ខ្លួន ក្រុមហ៊ុនក៏មានគម្រោងបង្កើនយន្តហោះរបស់ខ្លួន ដល់ទៅ៣៣គ្រឿង សម្រាប់គាំទ្រដល់កំណើននាពេលអនាគត និងពង្រីកជើងហោះហើរអន្តរជាតិ។

គូសបញ្ជាក់ថា ក្នុងនាមជាក្រុមហ៊ុនអាកាសចរណ៍ជាតិរបស់កម្ពុជា ក្រុមហ៊ុនដើរតួនាទីយ៉ាងសំខាន់ ក្នុងការតភ្ជាប់ជើងហោះហើរក្នុងស្រុក និងតភ្ជាប់ព្រះរាជាណាចក្រ ទៅកាន់គោលដៅអន្តរជាតិ។ លើសពីការដឹកជញ្ជូន ជើងហោះហើរនីមួយៗតំណាងឱ្យមោទនភាពជាតិ និងវឌ្ឍនភាព។

ទៅថ្ងៃអនាគត ក្រុមហ៊ុនអាកាសចរណ៍ជាតិកម្ពុជា នឹងនៅតែប្តេជ្ញាចិត្តបន្ដរក្សាគុណតម្លៃរបស់ខ្លួន៖ សុវត្ថិភាព ភាពសេវាកម្មល្អ និងកាលវិភាគហោះហើរដ៏សុក្រិត្យ។ ជាមួយនឹងការវិនិយោគ ជាបន្តបន្ទាប់លើផលិតផល និងបទពិសោធន៍របស់អតិថិជន ក្រុមហ៊ុនខិតខំដើម្បីក្លាយជាក្រុមហ៊ុនអាកាសចរណ៍ឈានមុខ និងគួរឱ្យទុកចិត្តនៅក្នុងតំបន់៕