(ភ្នំពេញ)៖ មួយរយៈចុងក្រោយនេះ ទស្សនិកជនអ្នកគាំទ្រ បានផ្ទុះជាចម្ងល់ជាច្រើនពាក់ព័ន្ធ ទៅនឹងពិធីការិនីល្បីឈ្មោះ អ្នកនាង កែវ ចាន់និមល ដៃគូដ៏ស័ក្តិសមជាមួយ លោក ជា វិបុល ក្រោយអ្នកទាំងពីរហាក់បាត់វត្តមានចាប់ដៃគូ ហើយក៏លែងឃើញបង្ហាញវត្តមាន និយាយក្នុងកម្មវិធីជាច្រើនជាមួយគ្នា ដោយសារតែលេចឮនូវរឿងអាស្រូវស្នេហាជាមួយគ្នា។ ចុងក្រោយនេះ គឺឃើញមានតែ លោក ជា វិបុល ចាប់ដៃគូថ្មីជាមួយពិធីការិនី ថន លក្ខិណា, ប៉ែន ស្រីពេជ្រ ឬភរិយារបស់លោក គឺអ្នកនាង គង់ សុជាតិ តែប៉ុណ្ណោះ។
យោងតាមប្រភពមួយ ដែលជិតស្និទ្ធនឹង អ្នកនាង កែវ ចាន់និមល បានលើកឡើងថា មូលហេតុដែលនាងបាត់វត្តមាន ពីកម្មវិធីល្បីៗនៅទូរទស្សន៍ហង្សមាស អាចនឹងមានរឿងមួយចំនួនពាក់ព័ន្ធជាមួយលោក ជា វិបុល ដោយសារកន្លងមកអ្នកទាំងពីរ ធ្លាប់មានរឿងអាស្រូវស្នេហាជាមួយគ្នា ហើយក៏ធ្លាប់មានឱកាសចេញទៅសម្ដែង នៅតាមខេត្តជាមួយគ្នា ជាច្រើនផងដែរ។
ចំណងមិត្តភាព បង្កើតជាចំណងស្នេហាបែបនេះធ្វើឲ្យ អ្នកនាង គង់ សុជាតិ ដែលត្រូវជាភរិយា ក៏ចាប់ផ្តើមយកចិត្តទុកដាក់ ចំពោះចំណុចនេះ ព្រោះកន្លងមកមុនពេលដែលអ្នកនាង គង់ សុជាតិ មកបំពេញការងាររួមទ្រនំជាមួយស្វាមី ពោលគឺរយៈពេលជិត២ឆ្នាំមុន ទំនាក់ទំនងរវាងពិធីការិនី កែវ ចាន់និមល និងពិធីករ លោក ជា វិបុល ធ្លាប់លេចរឿងអាស្រូវស្នេហាជាមួយគ្នា ប៉ុន្តែភ្លាមៗពួកគេទាំង២ បានច្រានចោលដំណឹងដ៏រស៊ើបនេះ។ មូលហេតុធំ គឺម្ខាងៗសុទ្ធតែមានប្តី មានប្រពន្ធរៀងៗខ្លួន ហើយពេលនោះ កែវ ចាន់និមល ក៏ខឹងសម្បារព័ត៌មានដែលបានចេញផ្សាយនោះទៀតផង។
មកដល់ពេលនេះ នៅសុខៗស្រាប់តែបាត់វត្តមាន កែវ ចាន់និមល ចាប់ដៃគ្នាជាមួយលោក ជា វិបុល ដែលឃើញជំនួសដោយ អ្នកនាង គង់ សុជាតិ វិញ។ ជាមួយគ្នានេះក៏មានដំណឹងល្ហិចល្ហៀងមកថា ពិធីការិនី កែវ ចាន់និមល ដោយសារតែផ្ទុះរឿងអាស្រូវស្នេហាម្ដងជាពីរដង ជាមួយលោក ជា វិបុល ទើបជាហេតុ ធ្វើឲ្យនាងបាត់បង់កម្មវិធីធំៗ ជាពិសេសលេចឮថា និមល ចេញទៅអាមេរិកមួយរយៈ ដើម្បីបំបាត់អារម្មណ៍តប់ប្រមល់ថែមទៀតផង៕
