(ភ្នំពេញ)៖ ការប្រកួតជម្រើសជើងឯកខេមបូឌានព្រីមៀរលីគ Cambodia Premier League 2024-25សប្តាហ៍ទី១ ជុំទី១ ក្នុងថ្ងៃបើកឆាកក្រុមម្ចាស់ផ្ទះព្រះខ័នរាជស្វាយរៀង បានបំបាក់ក្រុមភ្ញៀវ កងយោធពលខេមរភូមិន្ទ យ៉ាងចាស់ដៃក្នុងលទ្ធផល ៧-០ ដែលការប្រកួតបានធ្វើឡើងនៅក្នុងទឹកដីនៃកីឡដ្ឋាន ខេត្តស្វាយរៀង កាលពីថ្ងៃអាទិត្យ ទី១១ ខែសីហា ឆ្នាំ២០២៤ ។

ក្រុមជើងឯករដូវកាលមុន ព្រះខ័នរាជស្វាយរៀង ក្នុងតង់ទី១ បើកការស៊ុតនាំមុខមុន ២គ្រាប់ ពីការធ្វើបានដោយកីឡាករ CRISTIAN ពាក់លេខ២១ នៅនាទីទី៨ និងគ្រាប់ទី២ ស៊ុតបានដោយកីឡាករ មិនរតន: នៅទីទី១៧ ខណៈក៏បន្ថែមបាន ៥គ្រាប់ទៀតនៅតង់ទី២ រកបានដោយកីឡាករ BOUNGKONG, កីឡាករ មីហ៊្សូណូ ហ៊ីការ៉ុ, កីឡាករ CRISTIAN ហើយ ២គ្រាប់ចុងក្រោយនៅនាទីបន្ថែមធ្វើបានដោយកីឡាករ PABLO នៅនាទីទី៩០+៣ និងកីឡាករ គីម សុខយុទ្ធ នៅនាទីទី៩០+៥។

ខាងក្រោមនេះជាលទ្ធផលការប្រកួតរបស់ក្រុមទាំង១០ ក្នុងជម្រើសជើងឯកខេមបូឌានព្រីមៀរលីគ ឆ្នាំ២០២៤/២៥ សប្តាហ៍ទី១ ជុំទី១៖

ការប្រកួតថ្ងៃសៅរ៍ ទី១០ ខែសីហា ឆ្នាំ២០២៤ រួមមាន៖
១៖ ណាហ្គា ២-០ គីរីវង់សុខសែនជ័យ ។
២៖ ភ្នំពេញក្រោន ៤-២ វិសាខា ។

សម្រាប់ការប្រកួតនៅថ្ងៃអាទិត្យ ទី១១ ខែសីហានេះ រួមមាន៖
១៖ ព្រះខ័នរាជស្វាយរៀង ៧-០ កងយោធពលខេមរភូមិន្ទ ។
២៖ ក្លិបបាល់ទាត់ឡាយហ្វខេត្តព្រះសីហនុ ០-១ ISI ដង្កោសែនជ័យ ។
៣៖ សមាគមនកីឡាបាល់ទាត់ក្រសួងមហាផ្ទៃ ០-១ អង្គរថាយហ្គឺរ។

សូមបញ្ជាក់ថា សម្រាប់ការប្រកួតជម្រើសជើងឯកខេមបូឌានព្រីមៀរលីគ ឆ្នាំ២០២៤/២៥ សប្តាហ៍ទី១ ជុំទី១ ក្នុងថ្ងៃបើកឆាកឃើញថាមានក្រុមចំនួន៥ ដែលទទួលបាន ៣ពិន្ទុមានដូចជាក្រុម ព្រះខ័នរាជស្វាយរៀង, ភ្នំពេញក្រោន, ណាហ្គា, អង្គរថាយហ្គឺរ, ISI ដង្កោសែនជ័យ បណ្តោះអាសន្នផងដែរ៕