(កៀវ)៖ ស្ត្រីទីមួយរបស់សហរដ្ឋអាមេរិក លោកស្រី Jill Biden នៅថ្ងៃអាទិត្យនេះបានឆ្លងព្រំដែនចូលទៅក្នុងប្រទេសអ៊ុយក្រែន ហើយបានចូលទៅក្នុងតំបន់សង្រ្គាមសកម្មមួយ ដែលជាទង្វើដ៏កម្រសម្រាប់ប្តីប្រពន្ធរបស់ប្រធានាធិបតីអាមេរិក ដែលកំពុងកាន់អំណាច។ នេះបើយោងតាមការចេញផ្សាយដោយ សារព័ត៌មាន The Washington Post នៅថ្ងៃអាទិត្យ ទី០៨ ខែឧសភា ឆ្នាំ២០២២។

លោកស្រី Jill Biden បានឆ្លងចូលប្រទេសអ៊ុយក្រែនពីប្រទេសស្លូវ៉ាគីនៅថ្ងៃទិវាបុណ្យម្តាយ បន្ទាប់ពីបានទៅទស្សនាកិច្ចនៅមជ្ឈមណ្ឌលកែច្នៃនៅច្រកព្រំដែន Vysne Nemecke និងជួបជនភៀសខ្លួន។ នៅក្នុងអ៊ុយក្រែន លោកស្រីបានជួបជំទាវទីមួយអ៊ុយក្រែន គឺលោកស្រី Olena Zelenska ដែលបានបាត់មុខពីសាធារណៈចាប់តាំងពីរុស្ស៊ីបានឈ្លានពានអ៊ុយក្រែននៅថ្ងៃទី ២៤ ខែកុម្ភៈ។

ស្ត្រីទីមួយអាមេរិក លោកស្រី Jill Biden បាន និយាយ មុន ពេល ចាប់ ផ្តើម កិច្ច ប្រជុំ បិទ ទ្វារ រវាង ស្ត្រី ទី មួយ ទាំង ពីរ ថា «ខ្ញុំ ចង់ មក ក្នុង ទិវា មាតា។ ខ្ញុំគិតថា វាជារឿងសំខាន់ដើម្បីបង្ហាញប្រជាជនអ៊ុយក្រែនថា សង្រ្គាមនេះត្រូវតែបញ្ឈប់ ហើយសង្រ្គាមនេះគឺឃោរឃៅ ហើយប្រជាជនអាមេរិកឈរជាមួយប្រជាជនអ៊ុយក្រែនជានិច្ច»។

ចំណែកលោកស្រី Zelenska បានសរសើរលោកស្រី ចំពោះទង្វើដ៏ក្លាហានក្នុងការមកអ៊ុយក្រែននាពេលនេះ។

គួរបញ្ជាក់ថា វាជាទង្វើដ៏កម្រមួយសម្រាប់ប្តីប្រពន្ធរបស់ប្រធានាធិបតីអាមេរិកដែលកំពុងកាន់អំណាច ទៅទស្សនាកិច្ចក្នុងតំបន់សង្គ្រាមសកម្មបែបនេះ៕