(កៀវ)៖ អគ្គលេខាធិការអង្គការណាតូ (NATO) លោក Jens Stoltenberg បានជំរុញដល់អ៊ុយក្រែន និងសម្ព័ន្ធមិត្តរបស់ខ្លួននៅថ្ងៃសៅរ៍នេះថា កុំឱ្យ «បាត់បង់ជំនឿចិត្ត» ខណៈប្រធានាធិបតី លោក វ្ល៉ាឌីមៀ ពូទីន ប្តូរមកហៅប្រតិបត្តិការយោធារុស្ស៉ីរយៈពេល ២ឆ្នាំនេះទៅជាសង្រ្គាម។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃសៅរ៍ ទី២៤ ខែកុម្ភៈ ឆ្នាំ ២០២៤។
ក្នុងសារជាសំលេងនាថ្ងៃខួប ២ឆ្នាំនៃសង្រ្គាមរុស្ស៉ី-អ៊ុយក្រែន លោក Stoltenberg បានលើកឡើងពីស្ថានភាពធ្ងន់ធ្ងរនៅឯសមរភូមិ ហើយថាគោលបំណងរបស់លោក ពូទីន មិនបានផ្លាស់ប្តូរឡើយ ហើយក៏គ្មានសញ្ញាណាមួយថាលោកកំពុងរៀបចំផែនការសន្តិភាពនោះដែរប៉ុន្តែអ៊ុយក្រែន និងសម្ព័ន្ធមិត្តមិនត្រូវបាត់បង់ជំនឿចិត្តឡើយ។
លោក Stoltenberg បានបង្ហើបពីការសន្យាផ្តល់ជំនួយយោធាថ្មីៗទៀតពីប្រទេសជាសមាជិកណាតូ ដែលមានតម្លៃរាប់ពាន់លានដុល្លារ ដោយបញ្ជាក់ថា «នឹងគ្របដណ្តប់លើការពង្រឹងសមត្ថភាពសំខាន់ៗសម្រាប់អ៊ុយក្រែន ដូចជាគ្រាប់កាំភ្លើងធំ ការការពារដែនអាកាស រួមទាំងឧបករណ៍ និងគ្រឿងបន្លាស់យន្តចម្បាំង F-16 យន្តហោះដ្រូន ក៏ដូចជាឧបករណ៍សម្រាប់ដោះមីន»។
គួរបញ្ជាក់ថា ខណៈថ្ងៃខួប ២ឆ្នាំនៃការឈ្លានពានមកដល់ទាហានដែលអស់គ្រាប់កាំភ្លើងរបស់អ៊ុយក្រែនកំពុុងតស៊ូដើម្បីការពារនៅសមរភូមិជួរមុខ ហើយការគាំទ្រនាពេលខាងមុខរបស់សហរដ្ឋអាមេរិកចំពោះអ៊ុយក្រែនកាន់តែស្រពិចស្រពិលទៅ៕
រូបភាពពី Reuters
