(ប៉េកាំង)៖ លោក Zong Qinghou ដែលជាមហាសេដ្ឋីចិនធ្លាប់ឈរនៅចំណាត់ថ្នាក់កំពូល ក្នុងនាមជាអ្នកមានទ្រព្យសម្បត្តិច្រើនបំផុតប្រចាំប្រទេសចិន ទើបតែបានទទួលមរណភាព នាថ្ងៃអាទិត្យនេះ ក្នុងវ័យ៧៩ឆ្នាំ។ នេះបើតាមការចញផ្សាយដោយ ទីភ្នាក់ងារព័ត៌មាន AFP នាថ្ងៃអាទិត្យ ទី២៥ ខែកុម្ភៈ ឆ្នាំ២០២៤។

លោក Zong គឺជាស្ថាបនិកនៃសម្ព័ន្ធក្រុមហ៊ុន Wahaha ដែលមានឯកទេសក្នុងផ្នែកទឹកបរិសុទ្ធ ភេសជ្ជៈ តែ និងផលិតផលដទៃទៀត។ ក្រុមហ៊ុន Wahaha បានចេញសេចក្តីថ្លែងការណ៍ នៅលើបណ្តាញសង្គមចិនថា រូបលោកទើបតែទទួលមរណភាព នាព្រឹកថ្ងៃអាទិត្យនេះ។ ប្រព័ន្ធផ្សព្វផ្សាយរដ្ឋចិនក្នុងសប្តាហ៍នេះ បានរាយការណ៍ថា លោក Zong បានសម្រាកទទួលការព្យាបាលជំងឺនៅមន្ទីរពេទ្យ ប៉ុន្តែមិនមាន​ការផ្តល់ខ្លឹមសារលម្អិត ជុំវិញស្ថានភាពជំងឺលោកឡើយ។

បើតាមជីវប្រវត្តិរបស់លោក លោក Zong បានចាប់ផ្តើមប្រឡូកធ្វើអាជីវកម្ម ក្នុងវ័យខ្ទង់៤០ឆ្នាំទៅហើយ តាមរយៈការលក់ភេសជ្ជៈឱ្យក្មេងៗ ហើយពេលខ្លះដោយសារតែខ្វះខាតលុយខ្លាំង រូបលោកត្រូវបង្ខំចិត្តទៅដេកនៅក្រោមស្ពានក្នុងទីក្រុងប៉េកាំង ថែមទៀតផង ព្រោះគ្មានលទ្ធភាព​ជួលផ្ទះសំណាក់។ លោកបានបង្កើត Wahaha ឡើង នៅឆ្នាំ១៩៨៧ ហើយកសាងក្រុមហ៊ុននេះ ឱ្យក្លាយជាក្រុមហ៊ុនភេសជ្ជៈដ៏ធំសម្បើមមួយ ដែលមានផលិតផលដាក់លក់ នៅគ្រប់កន្លែងទូទាំងប្រទេសចិន។

គួរបញ្ជាក់ថា កាលពីឆ្នាំ២០១០ លោក Zong ជាប់ឈ្មោះក្នុងបញ្ជីកំពូលមហាសេដ្ឋីរបស់ទស្សនាវដ្តី Forbes ក្នុងឋានៈជាបុគ្គលមាន​ទ្រព្យសម្បត្តិច្រើនជាងគេប្រចាំប្រទេសចិន គឺ៨ពាន់លានដុល្លារ។ ចំណែក កាលពីឆ្នាំ២០២៣ រូបលោកស្ថិតក្នុងចំណាត់ថ្នាក់លេខ៥៣នៅចិន ជាមួយទំហំទ្រព្យ៥.៩ពាន់លានដុល្លារ៕

រូបភាពពី Xinhua