(ញូវយ៉ក)៖ ប្រធានាធិបតីអាមេរិក លោក ចូ បៃដិន កាលពីថ្ងៃចន្ទ ទី២៦ ខែកុម្ភៈបាននិយាយថាលោកផ្ទាល់សង្ឃឹមថានឹងមានបទឈប់បាញ់មួយសម្រាប់ តំបន់ហ្កាហ្សា ដែលអាចនឹងចាប់ផ្ដើម​នៅដើមសប្ដាហ៍ក្រោយនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

នៅចំពោះមុខវិបត្តិមនុស្សធម៌កាន់តែរាលដាលធ្ងន់ធ្ងរឡើងពីមួយថ្ងៃទៅមួយថ្ងៃក្នុងតំបន់ហ្កាហ្សា អ្នកតំណាងមកពីប្រទេសអេហ្ស៉ីប កាតា សហរដ្ឋអាមេរិក បារាំង និងប្រទេសមួយចំនួនទៀត បាន និងកំពុងព្យាយាមដើរតួនាទីជាអ្នកសម្របសម្រួលរវាងអ៉ីស្រាអែល និងក្រុមហាម៉ាស ដើម្បីស្វែងរកការបិទបញ្ចប់ការសង្រ្គាម និងការដោះលែងចំណាប់ខ្មាំងដែលកំពុងជាប់ឃុំក្នុងតំបន់ហ្កាហ្សា។

នៅពេលត្រូវបានសាកសួរអំឡុងធ្វើទស្សនកិច្ចមួយទៅកាន់ទីក្រុងញូវយ៉ក ថាតើអាចនឹងមានកិច្ចព្រមព្រៀងមួយដែរឬទេ? លោក ចូ បៃដិន បានឆ្លើយថា «ទីប្រឹក្សាសន្តិសុខជាតិរបស់ខ្ញុំបានប្រាប់ខ្ញុំថាយើងកំពុងខិតកាន់តែជិតទៅរកកិច្ចព្រមព្រៀង...ហើយខ្ញុំសង្ឃឹមថានៅថ្ងៃចន្ទសប្ដាហ៍ក្រោយ យើងនឹងមានបទឈប់បាញ់មួយ»។

គួរបញ្ជាក់ថា នាយករដ្ឋមន្ត្រីអ៉ីស្រាអែល លោក Benjamin Netanyahu បានច្រានចោលចំពោះសំណើឱ្យអ៉ីស្រាអែលដកកងទ័ព ហើយនិយាយថា បទឈប់បាញ់មួយគ្រាន់តែអាចពន្យារពេលការវាយលុកចូលទីក្រុង Rafah នៃភាគខាងត្បូងតំបន់ហ្កាហ្សាតែប៉ុណ្ណោះ៕

រូបភាពពី Reuters