(ណៃពិដោ)៖ ប្រព័ន្ធផ្សព្វផ្សាយរដ្ឋនៅមីយ៉ាន់ម៉ា បានរាយការណ៍នាថ្ងៃចន្ទនេះថា រដ្ឋាភិបាលយោធា នៅខែក្រោយនឹងចាប់ផ្តើម ការធ្វើជំរឿនប្រជាជននិងគ្រួសារទូទាំងប្រទេស ដើម្បីបើកផ្លូវសម្រាប់ការបោះឆ្នោតសកលថ្មី ដែលត្រូវបានសន្យាថា នឹងរៀបចំឡើងនៅឆ្នាំ២០២៥ ចំពោះមុខការប្រយុទ្ធគ្នាជាមួយក្រុមឧទ្ទាម នៅតាមផ្នែកជាច្រើននៃផ្ទៃប្រទេស។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី២ ខែកញ្ញា ឆ្នាំ២០២៤។

អំឡុងកិច្ចប្រជុំមួយកាលពីថ្ងៃអាទិត្យកន្លងទៅនេះ ប្រមុខរបបសឹកមីយ៉ាន់ម៉ា លោក Min Aung Hlaing បាននិយាយថា ទិន្នន័យនៃការធ្វើជំរឿននោះ ដែលនឹងប្រមូលនៅចន្លោះថ្ងៃទី១ ខែតុលា ដល់ថ្ងៃទី១៥ ខែដដែល នឹងត្រូវប្រើប្រាស់ ដើម្បីរៀបចំ​ការបោះឆ្នោតសកលថ្មីមួយ ដែលសេរី យុត្តិធម៌ ពហុបក្ស និងតាមលទ្ធិប្រជាធិបតេយ្យ ដោយជោគជ័យ នាឆ្នាំក្រោយ។

យ៉ាងណាមិញ បោះឆ្នោតដែលសន្យានោះ គឺកន្លងមក ត្រូវបានមតិភាគច្រើនសន្និដ្ឋានរួចហើយថា នឹងជាការបោះឆ្នោតក្លែងក្លាយ ហើយលទ្ធផលទំនងជា នឹងមិនមានការទទួលស្គាល់ ពីក្រុមប្រទេសលោកខាងលិចឡើយ ដ្បិតគណបក្សនយោបាយជាច្រើន ត្រូវបានរំលាយចោល និងជាប់បម្រាម ក្នុងនោះមានទាំង គណបក្សដ៏មានប្រជាប្រិយ National League for Democracy (NLD) ដែលរបបសឹកបានផ្តួលរំលំ។

ប្រទេសអាស៊ាន ដែលមានប្រជាជន៥៥លាននាក់មួយនេះ បានធ្លាក់ទៅក្នុងភាពចលាចល ចាប់តាំងពីខែកុម្ភៈ ឆ្នាំ២០២១ នៅពេលយោធាបានធ្វើរដ្ឋប្រហារទម្លាក់ រដ្ឋាភិបាលគណបក្ស NLD របស់លោកស្រី អោងសាន ស៊ូជី ក្រោមការចោទប្រកាន់ថា ការបោះឆ្នោតសកល ដែលបក្សលោកស្រីបានទទួលជ័យជម្នះយ៉ាងភ្លូកទឹកភ្លូកដី កាលពីចុងឆ្នាំ២០២០ គឺមានការក្លែងបន្លំ។

គួរបញ្ជាក់ថា រដ្ឋប្រហារយោធា បាននាំឱ្យផ្ទុះបាតុកម្មទូទាំងប្រទេស ហើយយោធាបានធ្វើការបង្រ្កាបយ៉ាងចាស់ដៃ រហូត​ប្រែក្លាយចលនាបាតុកម្មនោះ ទៅជាចលនាប្រឆាំងប្រដាប់អាវុធ។ សព្វថ្ងៃ រដ្ឋាភិបាលយោធាមីយ៉ាន់ម៉ា បានបាត់បង់ការគ្រប់គ្រង​លើទឹកដីមួយភាគធំ ចំពោះមុខការវាយលុករបស់ក្រុមឧទ្ទាម៕