(វ៉ាសូវី)៖ រដ្ឋមន្រ្តីការបរទេសប៉ូឡូញ លោក Radosław Sikorski បាននិយាយនៅថ្ងៃអង្គារសប្តាហ៍នេះថា អឺរ៉ុបត្រូវតែយកចិត្តទុកដាក់ខ្លាំង ចំពោះវិស័យការពារជាតិរបស់ខ្លួន។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន CNA នៅថ្ងៃពុធ ទី៤ ខែកញ្ញា ឆ្នាំ ២០២៤។

ប្រមុខការទូតប៉ូឡូញរូបនេះ កំពុង​បំពេញ​ទស្សនកិច្ច​ជា​យុទ្ធសាស្ត្រ​ នៅ​អាស៉ីអាគ្នេយ៍ ដើម្បី​ជំរុញ​ទំនាក់ទំនង​សន្តិសុខ និង​សេដ្ឋកិច្ច។ ថ្លែងប្រាប់បទសម្ភាសន៍ជាមួយ CNA ចេញពីទីក្រុងគូឡាឡាំពួ លោកថាតំបន់អឺរ៉ុប ត្រូវតែបង្កើនសមត្ថភាពយោធា ជាមួយសម្ព័ន្ធមិត្តរបស់ខ្លួន នោះគឺសហរដ្ឋអាមេរិក។ លោក Sikorski គូសបញ្ជាក់ថា «អឺរ៉ុបមិនអាចធ្វេសប្រហែសទេ។ យើងត្រូវតែធានាឱ្យបាន យ៉ាងហោចណាស់សន្តិសុខតាមព្រំដែន។ យើងគួរអភិវឌ្ឍសមត្ថភាពតាមរបៀបនេះ ដូច្នេះយើងអាចមាន​កងកម្លាំង​អាមេរិក​ ចូលរួម​ភារកិច្ច​នៅផ្នែកផ្សេងទៀតនៃ​ពិភពលោក»។

គួរបញ្ជាក់ថា ស្របពេលដែលការចំណាយលើ ការពារជាតិរបស់សហភាពអឺរ៉ុប បានកើនឡើង ជុំវិញការត្រៀមលក្ខណៈ នៃកងកម្លាំងប្រដាប់អាវុធ សម្រាប់តំបន់ដែលមានតម្រូវការ ប៉ូឡូញត្រូវបានកំណត់ថា ជាអ្នកចំណាយដ៏កំពូលមួយ ក្នុងវិស័យការពារជាតិ ដោយរួមចំណែកប្រហែល ៤ភាគរយនៃផលិតផលក្នុងស្រុកសរុប (GDP)៕