(វៀងចន្ទន៍)៖ ប្រមុខសហភាពអឺរ៉ុប (EU) លោក Charles Michel នៅថ្ងៃសុក្រនេះ បាននិយាយមុខថ្កោលទោស ការវាយប្រហារ​លើ ប្រតិបត្តិការរក្សាសន្តិសុខរបស់អង្គការសហប្រជាជាតិ (UN) បន្ទាប់ពីកងកម្លាំងរក្សាសន្តិភាព UN បាននិយាយថា កងកម្លាំងយោធាអ៉ីស្រាអែល បានបាញ់ផ្លោងមកលើ កន្លែងទីស្នាក់ការកណ្តាលរបស់ខ្លួន នៅតំបន់ភាគខាងត្បូងប្រទេសលីបង់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃសុក្រ ទី១១ ខែតុលា ឆ្នាំ២០២៤។

ថ្លែងប្រាប់ AFP អំឡុងព្រឹត្តិការណ៍កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ នៅប្រទេសឡាវ លោក Michel ដែលតួនាទីជា ប្រធានក្រុមប្រឹក្សាអឺរ៉ុប បានលើកឡើងយ៉ាងដូច្នេះថា «ការវាយប្រហារប្រឆាំងបេសកកម្មរក្សាសន្តិសុខរបស់ UN ជាទង្វើដែលមិនមាន​ការទទួលខុសត្រូវ និងមិនអាចទទួលយកបាន ហើយហេតុដូច្នេះ យើងសូមអំពាវនាវឱ្យអ៉ីស្រាអែល ក៏ដូចជាភាគីទាំងអស់ គោរពឱ្យ​បានពេញលេញចំពោះច្បាប់មនុស្សធម៌អន្តរជាតិ»។

គួរបញ្ជាក់ថា បេសកកម្មរក្សាសន្តិភាពរបស់ UN នៅប្រទេសលីបង់ ហៅកាត់ UNIFIL ត្រូវបានបង្កើតឡើង កាលពីឆ្នាំ១៩៧៨។ បេសកកម្មនេះ មានកងកម្លាំងរក្សាសន្តិភាព ប្រហែល១០,៥០០នាក់ មកពីប្រទេសសរុបចំនួន៥០។ ឥណ្ឌូណេស៉ី នាថ្ងៃសុក្រនេះ បាននិយាយថា កងកម្លាំងរក្សាសន្តិភាពរបស់ខ្លួន២នាក់ បានរងរបួសក្នុងការវាយប្រហាររបស់អ៉ីស្រាអែល និងបានថ្កោលទោស សកម្មភាពនោះថា ជាការរំលោភបំពានច្បាប់អន្តរជាតិ៕