(ដាម៉ាស)៖ យោធាស៉ីរីនិយាយថា ទាហានរបស់ខ្លួនរាប់សិបនាក់ត្រូវបានសម្លាប់អំឡុងការវាយប្រហារបះបោរ នៅភាគពាយ័ព្យនៃប្រទេស ហើយក្រុមឧទ្ទាមព្យាយាមចូលគ្រប់គ្រងផ្នែកធំៗនៃទីក្រុង Aleppo ដោយបង្ខំឱ្យកងទ័ពត្រូវដាក់ពង្រាយឡើងវិញ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសៅរ៍ ទី៣០ ខែវិច្ឆិកា ឆ្នាំ ២០២៤។
សេចក្តីថ្លែងការណ៍របស់យោធាស៉ីរី គឺជាការទទួលស្គាល់ជាសាធារណៈលើកដំបូងថា ក្រុមបះបោរដឹកនាំដោយក្រុមឧទ្ទាម Hayat Tahrir al-Sham បានចូលទៅដល់ទីក្រុង Aleppo ដែលគ្រប់គ្រងដោយរដ្ឋាភិបាល។ ប៉ុន្តែក្រុមបះបោរមិនអាចបង្កើតទីតាំងជាប់លាប់នៅក្នុងទីក្រុងបានទេដោយសារតែកងទ័ពបន្តការទម្លាក់គ្រាប់បែក លើទីតាំងរបស់ពួកគេ។
កងទ័ពនិយាយថា ចំនួនភេរវករ និងសមរភូមិជួរមុខជាច្រេីនបានជំរុញឱ្យកងកម្លាំងប្រដាប់អាវុធ ធ្វើប្រតិបត្តិការដាក់ពង្រាយឡើងវិញក្នុងគោលបំណងពង្រឹងខ្សែការពារ ការពារអាយុជីវិតជនស៉ីវិល និងទាហាន ហើយរៀបចំការវាយប្រហារតបតវិញ។ បេីតាមយោធាស៉ីរី ២នាក់ យន្តហោះចម្បាំងរុស្ស៉ី និងស៉ីរីបានកំណត់គោលដៅលើក្រុមបះបោរនៅជាយក្រុង Aleppo នាថ្ងៃសៅរ៍នេះ។
គួរបញ្ជាក់ថា ក្រុមឧទ្ទាមបះបោរបានចាប់ផ្តើមការវាយលុកដ៏គួរឱ្យភ្ញាក់ផ្អើលរបស់ខ្លួនកាលពីដើមសប្តាហ៍នេះ នៅតាមទីក្រុងដែលគ្រប់គ្រងដោយរដ្ឋាភិបាល និងឈានដល់ទីក្រុងAleppo មុនធ្លាប់មានរយៈពេលមួយទសវត្សរ៍ បន្ទាប់ពីកងកម្លាំងរដ្ឋាភិបាលគាំទ្រដោយរុស្ស៉ី និងអ៉ីរ៉ង់ បណ្តេញក្រុមឧទ្ទាមចេញពីទីក្រុង៕
