(វ៉ាស៊ីនតោន)៖ ក្រសួងការពារជាតិសហរដ្ឋអាមេរិក កំពុងត្រួតពិនិត្យករណីលេចធ្លាយសារឯកជនរបស់រដ្ឋមន្ត្រីការពារជាតិ លោក Pete Hegseth ដែលបានបង្ហាញពីពេលវេលា និងព័ត៌មានលម្អិតនៃប្រតិបត្តិការវាយប្រហារតាមអាកាសលើក្រុមហ៊ូធីនៅយេម៉ែន កាលពីថ្ងៃទី ១៥ ខែមីនា។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ព័ត៌មាននេះត្រូវបានផ្សព្វផ្សាយដោយសារព័ត៌មាន The Atlantic ដែលបានបង្ហាញរូបថតអេក្រង់នៃការសន្ទនាតាមសារនោះ។ ការលេចធ្លាយនេះបានកើតឡើង ​ចំពេល​ដែល​រដ្ឋបាល​ប្រធានាធិបតី ដូណាល់ ត្រាំ កំពុង​ព្យាយាម​គ្រប់គ្រង​ផល​វិបាក​នៃ​ការ​បែក​ធ្លាយ​ព័ត៌មាន​ថា ពួកគេ​បាន​បញ្ចូល ​លោក Jeffrey Goldberg និពន្ធ​នាយក​ទស្សនាវដ្ដី The Atlantic ទៅ​ក្នុង​ក្រុម​ជជែក Signal ដើម្បីសម្របសម្រួលពេលវេលានៃប្រតិបត្តិការ។

សារដែលផ្ញើដោយលោក Hegseth ដែលមានចំណងជើងថា "TEAM UPDATE" បានបង្ហាញពីពេលវេលាចាប់ផ្តើម នៃការបញ្ជូនយន្តហោះចម្បាំង F-18 ព្រមទាំងការដាក់ពង្រាយយន្តហោះគ្មានមនុស្សបើក MQ-9 និងការបាញ់បង្ហោះមីស៊ីលTomahawk ។ សារនោះក៏បានបញ្ជាក់អំពីអាកាសធាតុអំណោយផល និងការត្រៀមខ្លួនរួចរាល់នៃបេសកកម្ម។

ទោះជាយ៉ាងណា នាយក CIA លោក John Ratcliffe បានអះអាងនៅក្នុងសវនាការនៅព្រឹទ្ធសភាកាលពីថ្ងៃអង្គារថា​ ព័ត៌មានដែលបែកធ្លាយពីក្រុមជជែក Signal គឺជាប្រភេទព័ត៌មានដែលមិនបានចាត់ថ្នាក់ ហើយក្រុមការងារនឹង «ត្រូវបានផ្តល់ព័ត៌មានបន្ថែមទៀតសម្រាប់ការទំនាក់ទំនងកម្រិតខ្ពស់»។

ទន្ទឹមគ្នានេះ ទីប្រឹក្សាសន្តិសុខជាតិ លោក Mike Waltz បានទទួលស្គាល់ការទទួលខុសត្រូវចំពោះការលេចធ្លាយនេះ ដោយបញ្ជាក់ថាក្រុមជជែក Signal ត្រូវបានបង្កើតឡើងដោយលោក។ ទោះជាយ៉ាងណាក៏ដោយ លោកបានបន្ទាបសារៈសំខាន់ នៃការលេចធ្លាយនេះ ដោយអះអាងថា គ្មានទីតាំង គ្មានប្រភព ឬវិធីសាស្ត្រ និងគ្មានផែនការសង្រ្គាមត្រូវបានបង្ហាញឡើយ ហើយដៃគូបរទេសត្រូវបានជូនដំណឹងរួចហើយ អំពីការវាយប្រហារនេះ។

ចំណែក រដ្ឋមន្ត្រីការពារជាតិអាមេរិក លោក Hegseth ក៏បានបដិសេធការចោទប្រកាន់ថា ខ្លួនបានចែករំលែកផែនការសង្រ្គាមផងដែរ ហើយបានសម្តែងមោទនភាពចំពោះប្រសិទ្ធភាពនៃការវាយប្រហារ៕