(សេអ៊ូល)៖ មនុស្សរាប់ពាន់នាក់ បានប្រមូលផ្ដុំគ្នានៅក្នុងរដ្ឋធានីសេអ៊ូល នៅថ្ងៃសៅរ៍ ទី៥ ខែមេសា ដើម្បីបង្ហាញការគាំទ្ររបស់ពួកគេចំពោះអតីតប្រធានាធិបតីកូរ៉េខាងត្បូង លោក Yoon Suk Yeol ដែល ត្រូវបានទម្លាក់ចេញពីតំណែង កាលពីថ្ងៃសុក្រសប្ដាហ៍នេះ ជុំវិញការប្រកាសដាក់ឱ្យប្រើប្រាស់ច្បាប់អាជ្ញាសឹក។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

តុលាការធម្មនុញ្ញកូរ៉េខាងត្បូង បានសម្រេចជាឯកច្ឆ​ន្ទកាលពីថ្ងៃសុក្រ ដោយទម្លាក់លោក Yoon Suk Yeol ចេញពីតំណែង ជុំវិញការប្រកាសដាក់ឱ្យប្រើច្បាប់អាជ្ញាសឹកកាលពីថ្ងៃទី៣ ខែធ្នូ ឆ្នាំ២០២៤ ដែល តុលាការចាត់ទុកថាជាទង្វើបំពានរដ្ឋធម្មនុញ្ញ។ ការដកតំណែងលោក Yoon បានបង្កឱ្យមានបរិយាកាសទាំងគាំទ្រ និងមិនសប្បាយចិត្ត។ ជាក់ស្ដែង នៅថ្ងៃសៅរ៍នេះ ក្រុមអ្នកគាំទ្រលោក Yoon បាននាំគ្នាចុះផ្លូវ ធ្វើបាតុកម្មសម្ដែងការគាំទ្ររបស់ពួកគេដល់អតីតប្រធានាធិបតីរូបនេះ ជាមួយការស្រែកច្រៀងថា «ការដកតំណែងមិនមានសុពលភាពទេ និងលុបចោលការបោះឆ្នោតមុនអាណត្តិ»។ «ការសម្រេចចិត្តរបស់ តុលាការធម្មនុញ្ញបានបំផ្លាញប្រជាធិបតេយ្យសេរីនៃប្រទេសរបស់ពួកយើង»។ នេះជាការលើកឡើងរបស់បាតុករម្នាក់ឈ្មោះ Yang Joo-young មានអាយុ២៦ឆ្នាំ។

គួរបញ្ជាក់ថា លោក Yoon Suk Yeol បានអះអាងថាការប្រកាសដាក់ចេញច្បាប់អាជ្ញាសឹករបស់លោក គឺស្របច្បាប់ និងមានចេតនាប្រឆាំងនឹងកងកម្លាំងប្រឆាំងរដ្ឋដែលគាំទ្រកូរ៉េខាងជើង។ ប៉ុន្តែ អ្នកដែលដែលប្រឆាំង នឹងការដឹកនាំរបស់លោក Yoon ក៏បានបង្ហាញការសាទរចំពោះការសម្រេចចិត្តដកតំណែងរូបលោកផងដែរ នៅក្នុងការជួបជុំគ្នាមួយកាលពីថ្ងៃសុក្រ។ បន្ទាប់ពីលោក Yoon ត្រូវបានដកតំណែង កូរ៉េខាងត្បូងនឹងត្រូវ រៀបចំការបោះឆ្នោតប្រធានាធិបតីថ្មីក្នុងពេល ៦០ថ្ងៃ ឬក៏អាចនឹងត្រូវធ្វើឡើងនៅដើមខែមិថុនាខាងមុខ។ បច្ចប្បន្ន នាយករដ្ឋមន្ត្រី លោក Han Duck-soo នឹងត្រូវកាន់តំណែងជាប្រធានាធិបតីស្ដីទី រហូតទាល់តែ ប្រធានាធិបតីថ្មីស្បថចូលកាន់តំណែង៕