(ហ៊្សេរុយសាឡិម)៖ នាយករដ្ឋមន្ត្រីអ៉ីស្រាអែល លោក Benjamin Netanyahu ត្រូវបានគេរំពឹងថានឹងធ្វើទស្សនកិច្ចទៅកាន់សេតវិមាននាថ្ងៃចន្ទសប្តាហ៍ក្រោយដើម្បីពិភាក្សាអំពីបញ្ហាពន្ធដែលសហរដ្ឋអាមេរិកទេីបប្រកាសថ្មីៗនេះ ជាមួយប្រធានាធិបតី លោក ដូណាល់ ត្រាំ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសៅរ៍ ទី៥ ខែមេសា ឆ្នាំ ២០២៥។
ផែនការធ្វេីទស្សនកិច្ចដែលគ្មានការគ្រោងទុកនេះ ត្រូវបានរាយការណ៍ដំបូងដោយគេហទំព័រ Axios ដែលថាប្រសិនបើពិតជាកើតឡើងមែន នោះលោក Netanyahu នឹងក្លាយជាមេដឹកនាំបរទេសដំបូងគេដែលបានជួប លោក ត្រាំ ដោយផ្ទាល់ដើម្បីព្យាយាមចរចាររកកិច្ចព្រមព្រៀងដកពន្ធ។
ការិយាល័យលោក Netanyahu មិនទាន់មានការបញ្ជាក់អំពីទស្សនកិច្ច ដែលទំនងជានឹងរួមបញ្ចូលនូវការពិភាក្សាអំពីសង្គ្រាមរបស់អ៉ីរ៉ង់ និងអ៉ីស្រាអែលប្រឆាំងហាម៉ាសនៅតំបន់ហ្កាហ្សានេះនៅឡេីយទេ។ ប៉ុន្តែបេីតាមក្រុមមន្រ្តីអ៉ីស្រាអែលដែលនិយាយក្នុងលក្ខខណ្ឌមិនបញ្ចេញឈ្មោះ មានការអញ្ជើញដ៏គួរឱ្យភ្ញាក់ផ្អើលមួយពី លោក ត្រាំ អំឡុងពេលជជែកតាមទូរស័ព្ទកាលពីថ្ងៃព្រហស្បតិ៍ ជាមួយលោក Netanyahu និងនៅពេលដែលមេដឹកនាំអ៉ីស្រាអែលរូបនេះ លើកឡើងពីបញ្ហាពន្ធ។
គួរបញ្ជាក់ថា ជាផ្នែកមួយនៃគោលនយោបាយពន្ធគយថ្មីរបស់ លោក ត្រាំ ការនាំចេញទំនិញរបស់អ៉ីស្រាអែលទៅកាន់សហរដ្ឋអាមេរិក ប្រឈមមុខនឹងពន្ធ ១៧ភាគរយ។ សហរដ្ឋអាមេរិក គឺជាសម្ព័ន្ធមិត្តជិតស្និទ្ធបំផុតរបស់អ៉ីស្រាអែល និងជាដៃគូពាណិជ្ជកម្មតែមួយដ៏ធំបំផុត៕
