(ភ្នំពេញ)៖ ក្រុមជនជាតិចិនដែលកំពុងមានវត្តមានបំពេញការងារស្ម័គ្រចិត្ត នៅកម្ពុជាពេញចិត្តនឹងស្វែងយល់ អំពីវប្បធម៌ខ្មែរ ក្នុង ឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ព្រមទាំង បានចូលរួមលេងល្បែងប្រជាប្រិយ និងជូនពរឆ្នាំថ្មី ទៀតផង។

លោកគ្រូ ជនជាតិចិន Fu Hong Zheng ប្រចាំនៅវិទ្យាស្ថាន បណ្តុះបណ្តាលវិជ្ជាជីវៈ ក្នុងរាជបណ្ឌិត្យសភាកម្ពុជា បានប្រាប់ក្នុងពេលចូលរួមអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំ២០២៥ នាពេលថ្មីៗនេះថា លោកពិតជាមាន សេចក្តីសោមនស្សរីករាយ ដែលបានចូលរួមអបអរសាទរ ពិធីបុណ្យចូលឆ្នាំថ្មី ប្រពៃណីជាតិខ្មែរ ដែលរៀបចំឡើង នៅរាជបណ្ឌិត្យសភាកម្ពុជា។

ជំនួសមុខឲ្យវិទ្យាស្ថានម៉ក់ជឺ លោកសូមគោរពជូនពរ សួស្តីឆ្នាំថ្មី សូមឲ្យមានសេរីសួស្តី ទាំងអស់គ្នា។​ រីអ្នកគ្រូ Hu Jun Chi មកពីវិទ្យាស្ថានខុងជឺ នៃ រាជបណ្ឌិត្យសភាកម្ពុជា ដែលទើបបានចូលរួមលេងល្បែងប្រជាប្រិយខ្មែរ រួច នាពេលនោះ ទទួលបានអារម្មណ៍ល្អ ពីវប្បធម៌ខ្មែរ ដ៏ជ្រាលជ្រៅ ហើយថែមទាំងទទួលបានអារម្មណ៍សប្បាយរីករាយ និងភាពកក់ក្តៅ របស់ប្រជាជនកម្ពុជាផងដែរ។ អ្នកគ្រូសូមគោរពជូនពរឆ្នាំថ្មី មានសុខសេរីសួស្តី គ្រប់ក្រុមគ្រួសារ។ អ្នកគ្រូ ថែមទាំងបាននិយាយជាភាសាខ្មែរ «សួស្តី ឆ្នាំថ្មី» ទៀតផង។

អ្នកគ្រូ Chen Xin ដែលមកវិទ្យាស្ថានខុងជឺ រាជបណ្ឌិត្យសភាកម្ពុជា ផងដែរនោះ បានបញ្ជាក់ថា នេះគឺជាការស្វែងយល់ ពីវប្បធម៌ខ្មែរ ក្នុងពិធីបុណ្យសង្ក្រាន្តរបស់ខ្មែរ ជាលើកទី១ ហើយក៏ជាលើកទី១ ដែលអ្នកគ្រូ បានមកដល់ប្រទេសកម្ពុជា។ អ្នកគ្រូប្រាប់ថា ពិតជាមានសេចក្តីសោមនស្សរីករាយ និងមានកិត្តិយសជាខ្លាំង ដែលបានចូលរួមអបអរសាទរ ក្នុងពិធីបុណ្យចូលឆ្នាំថ្មី ប្រពៃណីជាតិខ្មែរ នៅរាជបណ្ឌិត្យសភាកម្ពុជា ជាមួយនឹង មិត្តភ័ក្ត្រកម្ពុជា ហើយកញ្ញាក៏សូមជូនពរ សិរីសួស្តី ឆ្នាំថ្មី។

អ្នកគ្រូយល់ឃើញថា ពីធីបុណ្យចូលឆ្នាំខ្មែរ មានភាពសប្បាយរីករាយ ជាពិសេស បានឃើញពីភាពអ៊ូអរ របស់មិត្តកម្ពុជា ក្នុងការចូលរួមលេងកម្សាន្ត។ រីឯ ល្បែងប្រជាប្រិយខ្មែរ អ្នកគ្រូយល់ឃើញថា ពិតជារីករាយ មានភាពកក់ក្តៅ និងរួសរាយរាក់ទាក់ របស់ប្រជាជនកម្ពុជា ក្នុងការលេងល្បែងប្រជាប្រិយខ្មែរ។ បើតាមអ្នកគ្រូ ការលេងល្បែងប្រជាប្រិយខ្មែរ រវាងប្រជាជនចិន និងប្រជាជនខ្មែរ គឺជាការបង្កើនទំនាក់ទំនងមិត្តភាព ជាផ្នែកពង្រឹងកិច្ចសហប្រតិបត្តិការរវាងប្រទេសទាំងពីរ៕

វិទ្យុមិត្តភាពកម្ពុជាចិន