(មូស្គូ)៖ វិមានក្រឹមឡាំង បាននិយាយនៅថ្ងៃអង្គារ ទី១៥ ខែមេសា ថា មិនទាន់មានផែនការច្បាស់លាស់ណាមួយសម្រាប់កិច្ចព្រមព្រៀងដ៏មានសក្តានុពលរវាងសហរដ្ឋអាមេរិក និងរុស្ស៊ី ស្តីពីបញ្ហាអ៊ុយក្រែននៅឡើយទេ ប៉ុន្តែបានបញ្ជាក់ថា «ឆន្ទៈនយោបាយ» ដើម្បីឆ្ពោះទៅរកកិច្ចព្រមព្រៀងបែបនេះគឺមានពិតប្រាកដ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃអង្គារ ទី១៥ ខែមេសា ឆ្នាំ២០២៥។
ថ្លែងប្រាប់ក្រុមអ្នកសារព័ត៌មាន អ្នកនាំពាក្យវិមានក្រឹមឡាំង លោក Dmitry Peskov បានពណ៌នាទំនាក់ទំនងជាមួយសហរដ្ឋអាមេរិកថាមានភាព «វិជ្ជមាន និងមានប្រយោជន៍» ប៉ុន្តែបានបញ្ជាក់ថា ទីក្រុងមូស្គូនឹងមិនកំណត់ពេលវេលាជាក់លាក់ណាមួយសម្រាប់ដំណោះស្រាយសន្តិភាពនោះទេ។ លោកបានបន្ថែមថា «មិនទាន់មានគម្រោងច្បាស់លាស់នៃកិច្ចព្រមព្រៀងណាមួយនៅឡើយទេ ប៉ុន្តែមានឆន្ទៈនយោបាយដើម្បីឆ្ពោះទៅរកកិច្ចព្រមព្រៀងមួយ... យើងវាយតម្លៃខ្ពស់ចំពោះការទំនាក់ទំនងដែលមានលក្ខណៈស្ថាបនា និងមានអត្ថន័យ (ជាមួយសហរដ្ឋអាមេរិក)»។
ទោះជាយ៉ាងនេះក្តី អ៊ុយក្រែន និងសម្ព័ន្ធមិត្តអឺរ៉ុបមួយចំនួន បានបង្ហាញការសង្ស័យ ដោយលើកឡើងថា រុស្ស៊ីមិនមានភាពស្មោះត្រង់ក្នុងការចង់បញ្ចប់ជម្លោះនោះទេ ហើយបានចោទប្រកាន់ទីក្រុងមូស្គូថា កំពុងព្យាយាមអូសបន្លាយការចរចាជាមួយសហរដ្ឋអាមេរិក។
ជាការឆ្លើយតប រុស្ស៊ីអះអាងថា បញ្ហានេះមានភាពស្មុគស្មាញ ហើយវាមិនគួរឲ្យភ្ញាក់ផ្អើលទេដែលត្រូវចំណាយពេលដើម្បីស្វែងរកដំណោះស្រាយយូរអង្វែង។ លោក Peskov បាននិយាយថា «ទោះជាយ៉ាងណាក៏ដោយ ពិតណាស់ យើងចង់សង្ឃឹមឱ្យល្អបំផុត ថាការងារនេះនឹងមានលទ្ធផលវិជ្ជមាន។ យើងនឹងមិននិយាយឲ្យច្បាស់ថា តើពេលវេលានៅទីនេះនៅទីណាទេ»។
គួរបញ្ជាក់ថា ការលើកឡើងរបស់វិមានក្រឹមឡាំងធ្វើឡើង ខណៈមានកិច្ចខិតខំប្រឹងប្រែងការទូត ដើម្បីស្វែងរកច្រកចេញពីសង្គ្រាមនៅអ៊ុយក្រែន ដែលអូសបន្លាយអស់រយៈពេលជាច្រើនឆ្នាំ៕
