(ប៉ារីស)៖ នៅថ្ងៃអង្គារ ទី២២ ខែមេសា រដ្ឋមន្រ្តីការបរទេសបារាំង លោក Jean Noel Barrot បានចាត់ទុកថា ការប្រកាសបទឈប់បាញ់ថ្ងៃបុណ្យ Easter កន្លងទៅនេះ របស់ប្រធានាធិបតីរុស្ស៉ី លោក វ៉្លាឌីមៀ ពូទីន គឺជា «យុទ្ធសាស្រ្តទីផ្សារ» ដែលមានគោលដៅទប់ស្កាត់ កំហឹងរបស់ប្រធានាធិបតីអាមេរិក លោក ដូណាល់ ត្រាំ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក Barrot បានប្រាប់ប្រព័ន្ធផ្សព្វផ្សាយក្នុងស្រុកយ៉ាងដូច្នេះថា «បទឈប់បាញ់បុណ្យ Easter ដែលលោក ពូទីន បានប្រកាស គឺជាយុទ្ធសាស្រ្តទីផ្សារមួយ ដែលមានគោលដៅរារាំងកុំឱ្យ លោកប្រធានាធិបតី ដូណាល់ ត្រាំ កាន់តែអស់ការអត់ធ្មត់ និងខឹងសម្បារខ្លាំង»។ កាលពីល្ងាចថ្ងៃសៅរ៍ចុងសប្តាហ៍កន្លងទៅ ក្នុងសេចក្តីប្រកាសភ្ញាក់ផ្អើលមួយ លោក ពូទីន បានចេញបញ្ជាឱ្យ កងកម្លាំងរុស្ស៉ីបញ្ឈប់សកម្មភាពវាយប្រហារទាំងអស់ នៅអ៊ុយក្រែន រហូតដល់យប់រំលងអធ្រាត្រឈានចូលថ្ងៃចន្ទសប្តាហ៍នេះ។ យ៉ាងណាក្តី អំឡុងបទឈប់បាញ់រយៈពេល៣០ម៉ោងនេះ រុស្ស៉ីនិងអ៊ុយក្រែន បានចោទប្រកាន់គ្នាទៅវិញទៅមក អំពីការបំពាន។ ទីក្រុងកៀវ ក៏បានព្យាយាមអំពាវនាវឱ្យទីក្រុងមូស្គូ ពន្យារបទឈប់បាញ់ ឱ្យលើសពី៣០ម៉ោង ផងដែរ ប៉ុន្តែខាងរុស្ស៉ី មិនព្រម។

គួរបញ្ជាក់ថា ការប្រកាសបទឈប់បាញ់របស់ លោក ពូទីន នោះ គឺកើតមានឡើង មួយថ្ងៃបន្ទាប់ពីអាមេរិក បានព្រមានថា លោក ត្រាំ ត្រៀមលក្ខណៈជាស្រេច ដើម្បីបោះបង់ចោលទៅវិញ នូវកិច្ចប្រឹងប្រែងជួយស្វះស្វែងរក កិច្ចព្រមព្រៀងសន្តិភាពរវាងអ៊ុយក្រែន និងរុស្ស៉ី ប្រសិនបើនៅតែមិនឃើញមាន សញ្ញាច្បាស់លាស់ណាមួយថា កិច្ចព្រមព្រៀងពិតជាមានឱកាស អាចសម្រេចបាន៕