(ព្យុងយ៉ាង)៖ នៅថ្ងៃសៅរ៍ ទី២៦ ខែមេសា ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានរាយការណ៍ថា មេដឹកនាំកូរ៉េខាងជើង លោក គីម ជុងអ៊ុន បានដឹកនាំពិធីសម្ពោធនាវាចម្បាំងថ្មីមួយគ្រឿងប្រភេទ destroyer ហើយបានបន្ទោសសហរដ្ឋអាមេរិក សម្រាប់ការកើនឡើងនៃភាពតានតឹងនៅក្នុងតំបន់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ពិធីខាងលើត្រូវបានប្រារព្ធឡើងនៅកន្លែងសាងសង់នាវាយោធា ក្នុងទីក្រុង Nampo។ បើតាម KCNA នាវាចម្បាំងនោះ គឺជានាវាដំបូងគេបង្អស់នៃថ្នាក់នាវាចម្បាំងថ្មី Choe Hyon-class ដែលបំពាក់សព្វាវុធធុនធ្ងន់។ វាត្រូវបានរចនាឡើងសម្រាប់​ប្រើប្រាស់ប្រព័ន្ធសព្វាវុធចម្រុះ រួមមានទាំងអាវុធប្រឆាំងយន្តហោះនិងនាវា ព្រមទាំងមីស៉ីលបាលិស្ទីគ និងគ្រូសមីស៉ីល ដែលអាចបំពាក់ក្បាលគ្រាប់នុយក្លេអ៊ែរ។

លោក គីម ជុងអ៊ុន បាននិយាយថា នាវាចម្បាំងខាងលើ នឹងប្រគល់ឱ្យទៅកងទ័ពជើងទឹកកូរ៉េខាងជើង នៅអំឡុងដើមឆ្នាំក្រោយ ហើយចាប់ផ្តើមធ្វើប្រតិបត្តិការជាផ្លូវការ។ បើតាមលោក គីម ការផលិតឱ្យបាននាវាមុជទឹកដើរដោយថាមពលនុយក្លេអ៊ែរ នឹងជាជំហានធំបន្ទាប់ ក្នុងការពង្រឹងសមត្ថភាពកងទ័ពជើងទឹកនៃប្រទេសរបស់លោក។

លោក គីម បានអះអាងថា កិច្ចប្រឹងប្រែងកសាងសមត្ថភាពយោធារបស់កូរ៉េខាងជើង គឺជាការឆ្លើយតបចំពោះការ​គំរាមកំហែងពីសំណាក់អាមេរិក និងសម្ព័ន្ធមិត្តអាមេរិកនៅតំបន់អាស៉ី ដែលបានពង្រីកការធ្វើសមយុទ្ធយោធាទ្រង់ទ្រាយធំរួមគ្នា ហើយលោកបានអះអាងថា បរិយាកាសសន្តិភាពនៅជុំវិញប្រទេសកូរ៉េខាងជើង នាពេលនេះ គឺមានភាពតានតឹងខ្លាំង។

គួរបញ្ជាក់ថា ក្នុងខែមេសានេះ យន្តហោះទម្លាក់គ្រាប់បែកអាមេរិក B-1B ត្រូវបានប្រើប្រាស់ក្នុងសមយុទ្ធយោធារួមរវាងអាមេរិក និងកូរ៉េខាងត្បូង។ យន្តហោះទម្លាក់គ្រាប់បែកធុនធ្ងន់នេះ បានបង្ហាញវត្តមានជាប្រចាំ អំឡុងសមយុទ្ធយោធារួមរវាងសម្ព័ន្ធមិត្តទាំងពីរ អំឡុងពេលប៉ុន្មានឆ្នាំចុងក្រោយ។ ជាយូរមកហើយ កូរ៉េខាងជើងបានថ្កោលទោស ការធ្វើសមយុទ្ធយោធាទាំងនេះ ថាជាការហាត់សមដើម្បីធ្វើសង្រ្គាម ខណៈទីក្រុងសេអ៊ូលនិងវ៉ាស៉ីនតោន បានអះអាងថា ពួកវាគឺជា​ការពង្រឹងសមត្ថភាពការពារជាតិ៕