(អាំស្ទែដាំ)៖ អ៉ីស្រាអែល នឹងត្រូវប្រឈមមុខចំពោះការចោទប្រកាន់ ពីបទបំពានច្បាប់អន្តរជាតិ ដោយសារតែការបដិសេធអនុញ្ញាត ឱ្យជំនួយមនុស្សធម៌ចូលទៅក្នុងតំបន់ហ្កាហ្សា គ្រាដែលប្រទេសជាច្រើនគ្រោងបង្ហាញទឡ្ហីករណ៍ នៅឯតុលាការយុត្តិធម៌អន្តរជាតិ (ICJ) អំឡុងសវនាការរយៈពេលមួយសប្តាហ៍ ដែលចាប់ផ្តើមពីថ្ងៃចន្ទ ទី២៨ ខែមេសា ឆ្នាំ ២០២៥។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

តាំងពីថ្ងៃទី២ ខែមីនាមក អ៉ីស្រាអែលបានកាត់ផ្តាច់ការផ្គត់ផ្គង់ទាំងស្រុង សម្រាប់ប្រជាជន ២.៣លាននាក់ ហើយស្បៀងអាហារដែលស្តុកទុក អំឡុងពេលមានបទឈប់បាញ់កាលពីខែមករា បានប្រើប្រាស់អស់ហើយ។ អ៉ីស្រាអែលថា ​នឹង​​មិន​អនុញ្ញាត​ឱ្យ​មាន​ការនាំយកជំនួយ ចូល​ក្នុង​តំបន់​ហ្កាហ្សា​ឡើយ រហូត​ទាល់​តែ​ក្រុម​ហាម៉ាស​ដោះលែង​ចំណាប់ខ្មាំង​ ដែល​នៅ​សេសសល់​ទាំងអស់។

អ្នកតំណាងដែនដីប៉ាឡេស្ទីន នឹងស្ថិតក្នុងចំណោមអ្នកតំណាងផ្សេងទៀត ដែលត្រូវថ្លែងទៅកាន់ ICJ នាថ្ងៃចន្ទនេះ។ សហរដ្ឋអាមេរិក នឹងបញ្ចេញមតិរបស់ខ្លួននៅថ្ងៃពុធ។ រីឯអ៉ីស្រាអែល ​មិន​ស្ថិត​ក្នុង​ចំណោម​ប្រទេស​ប្រហែល ៤០ដែល​នឹង​ថ្លែង​អំឡុង​ពេល​សវនាការ ​រយៈពេល ៥ ថ្ងៃ​ដែល​​កំណត់​រហូត​ដល់​ថ្ងៃ​សុក្រឡើយ។

មតិយោបល់របស់ ICJ ដែលត្រូវបានគេស្គាល់ថាជាតុលាការពិភពលោក មានទម្ងន់ផ្លូវច្បាប់ និងនយោបាយ ទោះបីជា មិនមានកាតព្វកិច្ច ហើយតុលាការមិនមានអំណាចអនុវត្តក៏ដោយ។ បន្ទាប់ពីស្តាប់មតិយោបល់ ICJ ទំនងជានឹងចំណាយពេលច្រើន ខែដើម្បីសម្រេច។

គួរបញ្ជាក់ថា ច្បាប់មនុស្សធម៌អន្តរជាតិ ទាមទារឱ្យរាល់ការគ្រប់គ្រងណាមួយ សម្របសម្រួលដល់កម្មវិធីជំនួយ ដល់ប្រជាជនដែលត្រូវការ និងធានាបាននូវស្បៀងអាហារ ការថែទាំផ្នែកវេជ្ជសាស្រ្ត អនាម័យ និងស្តង់ដារសុខភាពសាធារណៈ៕