(ញូវយ៉ក)៖ តាមឯកសារផ្ទៃក្នុងដែល Reuters ទទួលបាន អង្គការសហប្រជាជាតិ (UN) កំពុងរៀបចំកាត់បន្ថយថវិកាចំនួន ៣.៧ពាន់លានដុល្លារស្មើនឹង ២០ភាគរយ និងកាត់បន្ថយបុគ្គលិកប្រហែល ៦ ៩០០នាក់។ នេះបើយោងតាមការចេញផ្សាយនៅថ្ងៃសុក្រ ទី៣០ ខែឧសភា ឆ្នាំ ២០២៥។

ប្រធានផ្នែកត្រួតពិនិត្យកញ្ចប់ថវិការបស់ UN លោក Chandramouli Ramanathan ​កត់​សម្គាល់​ថា ការ​កាត់​បន្ថយ​នេះ​គឺ​ជា​ផ្នែក​មួយ​នៃ​ការ​ងារពិនិត្យ​ឡើង​វិញ កាល​ខែ​មីនា។ លោកគូសបញ្ជាក់ថា «វាគឺជាកិច្ចខិតខំប្រឹងប្រែង ប្រកបដោយមហិច្ឆតាមួយ ដើម្បីធានាថា UN អាចសម្រេចគោលបំណងគាំទ្រពហុភាគីនិយម នៅសតវត្សរ៍ទី ២១ កាត់បន្ថយការឈឺចាប់របស់មនុស្ស និងកសាងជីវិត និងអនាគតកាន់តែប្រសើរឡើង»។ ថ្មីៗនេះ អគ្គលេខាធិការ លោក Antonio Guterres បាននិយាយថា «UN អាចបង្រួបបង្រួមទីភ្នាក់ងារមួយចំនួន កាត់ផ្តាច់សកម្មភាព ផ្លាស់ប្តូរបុគ្គលិកទៅកាន់ទីក្រុងដែលមានតម្លៃរស់នៅទាប និងលុបបំបាត់ការងារដែលមិនសូវចាំបាច់»។

គួរបញ្ជាក់ថា សេចក្តីណែនាំអំពីផែនការកាត់បន្ថយ ត្រឹមថ្ងៃទី១៣ ខែមិថុនា កើតឡើងចំពេលមានវិបត្តិហិរញ្ញវត្ថុ ដែលមួយផ្នែកគឺដោយសារតែសហរដ្ឋអាមេរិក កាត់បន្ថយមូលនិធិរបស់ខ្លួន។ ជារៀងរាល់ឆ្នាំ សហរដ្ឋអាមេរិក បានផ្តល់មូលនិធិជិតមួយភាគបួន នៃថវិការបស់ស្ថាប័នពិភពលោកមួយនេះ៕