(ណៃពិដោ)៖ របបសឹកមីយ៉ាន់ម៉ា បានឱ្យដឹងថា ខ្លួនបានសម្រេចបន្តការអនុវត្តបទឈប់បាញ់បណ្តោះអាសន្ន រហូតដល់ផុតខែមិថុនានេះ ដើម្បីគាំទ្រកិច្ចប្រឹងប្រែងជួសជុលនិងស្តារប្រទេសឡើងវិញ ក្រោយមហន្តរាយគ្រោះរញ្ជួយផែនដី ដែលបានសម្លាប់​មនុស្សយ៉ាងហោច៣៧០០នាក់ និងបង្កការបំផ្លិចបំផ្លាញយ៉ាងខ្លាំង។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

រដ្ឋាភិបាលយោធាបានប្រកាសបទឈប់បាញ់ដំបូង កាលពីដើមខែមេសា ពោលគឺប៉ុន្មានថ្ងៃ ក្រោយគ្រោះរញ្ជួយដីថ្ងៃទី២៨ ខែមីនា ដើម្បីសម្រួលដល់កិច្ចប្រឹងប្រែងជួយជនរងគ្រោះនិងស្តារប្រទេស បន្ទាប់ពីក្រុមប្រដាប់អាវុធប្រឆាំងរបបសឹក បានប្រកាសដូចគ្នា។ ខាងក្រុមឧទ្ទាម ក៏បានសម្រេចពន្យារបទឈប់បាញ់របស់ពួកគេ រហូតដល់ចុងខែនេះផងដែរ។ ទោះជាយ៉ាងណាក៏ដោយ កន្លងមក ការវាយប្រហារដោយកាំភ្លើងធំនិងតាមផ្លូវអាកាសរបស់យោធា ត្រូវរាយការណ៍ថា បានបន្តនៅតាមផ្នែកខ្លះនៃប្រទេសមីយ៉ាន់ម៉ា។

គួរបញ្ជាក់ថា ប្រទេសអាស៊ានមួយនេះ បានធ្លាក់ទៅក្នុងភាពវឹកវរ ចាប់តាំងពីយោធាបានធ្វើរដ្ឋប្រហារ ផ្តួលរំលំរដ្ឋាភិបាលស៉ីវិល កាលពីខែកុម្ភៈ ឆ្នាំ២០២១។ ចលនាប្រឆាំងរដ្ឋប្រហារយោធា ដែលដំបូងឡើយចាប់ផ្តើមក្នុងទម្រង់ត្រឹមជាការធ្វើបាតុកម្មដោយសន្តិវិធី បានប្រែក្លាយជាការបះបោរប្រដាប់អាវុធ និងផ្ទុះជាសង្រ្គាមស៉ីវិល មកទល់សព្វថ្ងៃ៕