(ភ្នំពេញ)៖ នៅថ្ងៃទី១៨ ខែតុលា ឆ្នាំ២០២១នេះ អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បានបញ្ចេញផ្សាយនូវវីដេអូថ្មីមួយទៀត ក្រោមចំណងជើងថា «ហេតុអ្វីកម្ពុជាត្រូវមានច្បាប់ស្តីពីសញ្ជាតិខ្មែរតែមួយសម្រាប់ថ្នាក់ដឹកនាំកំពូល?»

វីដេអូនេះបានបង្ហាញនូវភាពចាំបាច់បំផុតរបស់រាជរដ្ឋាភិបាលក្នុងការផ្តួចផ្តើមគំនិត ឲ្យមានសេចក្តីព្រាងច្បាប់នេះបានកើតឡើងបន្ទាប់ពីមេឧទ្ទាម នៃក្រុមប្រឆាំងជ្រុលនិយមនៅកម្ពុជា បានយកព័ត៌មានមិនពិតមកធ្វើការចោទប្រកាន់ទាំងកំរោលនិងបើកការវាយប្រហារមកលើសម្តេចតេជោ ហ៊ុន សែន ទាំងបំពានថា សម្តេចមានសញ្ជាតិពីរ និងមានលិខិត ឆ្លងដែនរបស់ប្រទេសស៊ីព្រ។

ព័ត៌មានមិនពិតដែលមានចេតនាបង្ខូចកេរ៍ឈ្មោះ និងមួលបង្កាច់ដោយឥតអៀនខ្មាស់ក្នុងគោលបំណងបំផ្លាញជីវិតនយោបាយរបស់សម្តេចតេជោផង និងញុះញង់បង្កឲ្យមានភាពវឹកវរចលាចលបះបោរ ក្នុងសង្គមក្រោមឧបាយកលដ៍ពិសពុលនៃការអំពាវនាវ និងញុះញង់ឲ្យកងកំលាំងប្រដាប់អាវុធ និងប្រជាពលរដ្ធក្រោកឈរ ដើម្បីផ្តួលរំលំរាជរដ្ឋាភិបាលស្របច្បាប់នេះបានជំរុញឲ្យសម្តេចតេជោ នាយករដ្ឋមន្ត្រីផ្តួចផ្តើមគំនិតឲ្យមានច្បាប់នេះតែម្តងដើម្បីបង្ហាញអំពីភាពស្មោះត្រង់និងភក្តីភាព ដាច់ខាតនិងឥតងាករេរបស់សម្តេចចំពោះប្រទេសជាតិ និងចំពោះប្រជាពលរដ្ឋខ្មែរ។

មានប្រទេស និងដែនដីជាង៥០ នៅលើពិភពលោកដែល មានច្បាប់ស្តីពីការកំណត់ឲ្យមេដឹកនាំកំពូលៗនៃស្ថាប័នជាតិ មានសញ្ជាតិតែមួយ។ ច្បាប់នេះមានគោលដៅធានាថា ថ្នាក់ដឹកនាំប្រទេសនីមួយៗត្រូវតែដាច់ខាតស្មោះត្រង់ជាមួយផលប្រយោជន៍ជាតិ និងប្រជាជនរបស់ខ្លួន ដោយមិនត្រូវយកប្រយោជន៍បរទេសមកលាយឡំនោះឡើយ។
ក្រោយពេលដែលច្បាប់នេះចូលជាធរមាន អធិបតេយ្យភាពជាតិកម្ពុជានឹងកាន់តែត្រូវបានពង្រឹង ខណៈដែលការជ្រៀតជ្រែកពីបរទេសដោយផ្ទាល់ ឬដោយប្រយោល តាមរយៈការប្រើប្រាស់កូនអុករបស់ខ្លួនដែលមានសញ្ជាតិពីរ ក៍នឹងត្រូវបានទប់ស្កាត់ដោយប្រសិទ្ធិភាពផងដែរ។

ប្រជាពលរដ្ឋ មន្ត្រីរាជការស៊ីវិល កងកម្លាំងប្រដាប់អាវុធគ្រប់ប្រភេទ និស្សិត បញ្ញវ័ន្ត នៅទូទាំងប្រទេសដែលបានសម្តែងនូវការសាទរចំពោះច្បាប់ដ៏មានសារៈសំខាន់នេះ សង្ឃឹមយ៉ាងមុតមាំថា ច្បាប់នេះគឺជាឧបករណ៍គតិយុត្តិមួយដ៏រឹងមាំដើម្បីពង្រឹងឯកភាពជាតិ ក៏ដូចជាលើកស្ទួយកិត្យានុភាពជាតិកម្ពុជានៅលើឆាកអន្តរជាតិ ដោយមិនបណ្តែតបណ្តោយឲ្យអ្នកនយោបាយដែលយកសញ្ជាតិបរទេសជាធំ និងតែងតែមាក់ងាយប្រទេសសញ្ជាតិកំណើតរបស់ខ្លួន អាចឡើងកាន់តំណែងកំពូលរបស់ជាតិបាននោះឡើយ។

សូមទស្សនាវីដេអូដូចតទៅនេះ៖