(ព្រះសីហនុ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅរសៀលថ្ងៃទី១ ខែធ្នូ ឆ្នាំ២០២១នេះ បានថ្លែងប្រាប់ប្រជាពលរដ្ឋខេត្តព្រះសីហនុ ដែលខ្វះខាតទឹកសាបប្រើប្រាស់សម្រាប់ចិញ្ចឹមត្រី ឬស្រោចដំណាំ អាចទៅទទួលយកទឹកដែលចម្រោះស្អាចរួច នៅទីតាំងចម្រោះទឹកកខ្វក់ ដែលមានចំនួន៣ទីតាំងក្នុងខេត្តព្រះសីហនុ ដោយមិនគិតប្រាក់។
ការថ្លែងរបស់សម្តេចតេជោ ហ៊ុន សែន ធ្វើឡើងក្នុងឱកាសសម្តេចអញ្ជើញចុះពិនិត្យប្រព័ន្ធរំដោះទឹកកខ្វក់ ដែលបានសាងសង់រួចចំនួន២ទីតាំងក្នុងខេត្តព្រះសីហនុ ដើម្បីត្រូវសម្ពោធដាក់ឲ្យប្រើប្រាស់នៅថ្ងៃទី២ ខែធ្នូ ឆ្នាំ២០២១ស្អែកនេះ។
សម្តេចតេជោ ហ៊ុន សែន បានថ្លែងយ៉ាងដូច្នេះថា «បើនៅប្រទេសគេជឿនលឿនមួយទៀត គេអាចប្រើប្រាស់ទឹកនេះទៅជាទឹកទទួលទានបាន ប៉ុន្តែយើងមិនអំពាវនាវឲ្យប្រជាជនយើងទទួលយកទឹកនេះទៅទទួលទានទេ ប៉ុន្តែក្នុងករណីប្រជាជនយើងខ្វះទឹកសាប ដើម្បីចិញ្ចឹមត្រីសុំមកទទួលយកពីកន្លែងចម្រោះទឹក ព្រោះទាំង៣ទីតាំង មានទឹកជាង៣ម៉ឺនម៉ែត្រគូបក្នុង១ថ្ងៃ។ អីចឹងក្នុងករណីដែលប្រជាពលរដ្ឋត្រូវការទឹកដើម្បីស្រោចដំណាំ ឬចិញ្ចឹមត្រី សូមអញ្ជើញមកយកទឹកនៅទីនោះដោយមិនយកថ្លៃ»។
សម្តេចបានបញ្ជក់ថា ប្រព័ន្ធចម្រោះទឹកកខ្វក់ នៅខេត្តព្រះសីហនុនេះ ក៏ជាបច្ចេកវិទ្យាទំនើបចុងក្រោយមកពីប្រទេសអ៉ីស្ត្រាអែល ដែលសម្លាប់មេរោគដោយប្រព័ន្ធឡាស៊ែរ មុននឹងទម្លាក់ចូលសមុទ្រ។
សម្តេចនាយករដ្ឋមន្ត្រីបានថ្លែងថា នៅខេត្តជាប់មាត់សមុទ្រ និងខេត្តជាប់ទន្លេផ្សេងៗទៀត ក៏ចាំបាច់ត្រូវមានប្រព័ន្ធចម្រោះទឹកកខ្វក់ ដូចខេត្តព្រះសីហនុនេះផងដែរ ដើម្បីធានាបាននូវបរិស្ថានល្អ។
សម្តេចតេជោនាយករដ្ឋមន្ត្រីបានថ្លែងថា ការដែលរាជរដ្ឋាភិបាលខិតខំកសាងហេដ្ឋារចនាសម្ព័ន្ធទាំងផ្លូវ និងប្រព័ន្ធចម្រោះទឹកកខ្វក់នេះ គឺសម្រាប់មនុស្សជាន់បច្ចុប្បន្ន និងក្មេងជំនាន់ក្រោយផងដែរ។ បន្ទាប់ពីមានប្រព័ន្ធចម្រោះទឹកកខ្វក់នេះហើយ ប្រជាពលរដ្ឋមកលេង និងងូតទឹកក្នុងខេត្តព្រះសីហនុ មិនរងនូវហានិភ័យទាក់ទងនឹងការកើតរមាស់ ឬធំក្លិនស្អុយក្នុងសមុទ្រទៀតនោះទេ៕
