(ភ្នំពេញ)៖ នៅវេលាម៉ោងជាង១រំលងអាធ្រាត្រថ្ងៃទី២០ ឈានចូល ២១ ខែឧសភា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នឹងដឹកនាំគណៈប្រតិភូជាន់ខ្ពស់ហោះចេញពីកម្ពុជា ឆ្ពោះទៅកាន់ទីក្រុងដាវ៉ូស-ក្លូស្ទ័រ ប្រទេសស្វីស ដើម្បីចូលរួមវេទិកាសេដ្ឋកិច្ចពិភពលោក ដែលធ្វើឡើងចាប់ពីថ្ងៃទី២២ ដល់ថ្ងៃទី២៦ ខែឧសភា ឆ្នាំ២០២២។

កិច្ចប្រជុំប្រចាំឆ្នាំ២០២២ នានិទាឃរដូវនេះ នឹងផ្តោតកិច្ចពិភាក្សាជុំវិញមូលបទ «ប្រវត្តិសាស្ត្រនៅចំណុចរបត់៖ គោលនយោបាយរបស់រដ្ឋាភិបាល និងយុទ្ធសាស្ត្រធុរកិច្ច» នឹងត្រូវបានអញ្ជើញចូលរួមដោយថ្នាក់ដឹកនាំជិត ២.៥០០នាក់ មកពីវិស័យនយោបាយ ធុរកិច្ច សង្គមស៊ីវិល និងប្រព័ន្ធផ្សព្វផ្សាយ។

យោងតាមក្រសួងការបរទេសកម្ពុជា បានឱ្យដឹងថា វត្តមានរបស់សម្តេចតេជោអញ្ជើញទៅចូលរួមវេទិកាសេដ្ឋកិច្ចពិភពលោកនាពេលនេះ ធ្វើឡើងតបតាមការអញ្ជើញរបស់ លោកសាស្រ្តាចារ្យ ក្លោស ឆ្វាប់ ស្ថាបនិក និងជាប្រធានប្រតិបត្តិវេទិកាសេដ្ឋកិច្ចពិភពលោក។

អញ្ជើញអមសម្តេចតេជោនាយករដ្ឋមន្រ្តី ហ៊ុន សែន ក្នុងការចូលរួមវេទិកាសេដ្ឋកិច្ចពិភពលោកនៅឆ្នាំនេះរួមមាន លោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន, លោក ប៉ាន សូរស័ក្តិ រដ្ឋមន្រ្តីក្រសួងណាពិជ្ជកម្ម និងមន្ត្រីជាន់ខ្ពស់នៃរាជរដ្ឋាភិបាលកម្ពុជាមួយចំនួនផ្សេងទៀត ព្រមទាំងសមាជិកមួយចំនួនរបស់សភាពាណិជ្ជកម្មកម្ពុជា ផងដែរ។

ក្រសួងការបរទេសកម្ពុជា បានឱ្យដឹងដែរថា ក្នុងឱកាសចូលរួមក្នុងវេទិកានេះ សម្តេចតេជោនាយករដ្ឋមន្រ្តី ហ៊ុន សែន នឹងអញ្ជើញថ្លែងសុន្ទរកថាប្រកបដោយអត្ថន័យខ្លឹមសារនៅក្នុងពិធីបិទកិច្ចពិភាក្សាជាមួយភាគីពាក់ព័ន្ធក្រោមប្រធានបទ «ទស្សនវិស័យយុទ្ធសាស្ត្រលើអាស៊ាន» និងនៅក្នុងកម្មវិធីអាហារការងារថ្ងៃត្រង់ក្រៅផ្លូវការជាមួយថ្នាក់ដឹកនាំសេដ្ឋកិច្ចពិភពលោក ក្រោមប្រធានបទ «ការស្តារសន្តិភាព និងសណ្តាប់ធ្នាប់ឡើងវិញ»

ក្រៅពីអញ្ជើញចូលរួមក្នុងវេទិកាខាងលើ សម្តេចតេជោនាយករដ្ឋមន្ត្រី ក៏រំពឹងថានឹងមានជំនួបពិភាក្សាការងារជាមួយថ្នាក់ដឹកនាំនៃប្រទេសមួយចំនួន ក៏ដូចជា ទទួលការចូលជួបសម្តែងការគួរសមពីសំណាក់ឥស្សរជននយោបាយ និងធុរជនពិភពលោក ផងដែរ។

ក្នុងឱកាសស្នាក់នៅប្រទេសស្វីស សម្តេចតេជោនាយករដ្ឋមន្ត្រី ហ៊ុន សែន នឹងអញ្ជើញថ្លែងសុន្ទរកថាបើក «រាត្រីកម្ពុជា» (CAMBODIA NIGHT) ដែលជាព្រឹត្តការណ៍រៀបចំដោយក្រុមហ៊ុន វើលដ៏ ប្រ៊ីជ គ្រុប (WorldBridge Group) ក្នុងគោលបំណងដើម្បីលើកស្ទួយអំពីធុរកិច្ចបរទេស នៅក្នុងប្រទេសកម្ពុជា។

វេទិកាសេដ្ឋកិច្ចពិភពលោក គឺជាវេទិកាសាកលដ៏មានសារៈសំខាន់។ វត្តមានរបស់សម្តេចតេជោ គឺជាសក្ខីភាព នៃការទទួលស្គាល់ជាសកលលើគុណវុឌ្ឍន៍ និងភាពប៉ិនប្រសប់របស់សម្តេច បានដឹកនាំនាវា «កម្ពុជា» ឆ្ពោះទៅរកការអភិវឌ្ឍ វឌ្ឍនភាព និងវិបុលភាពលើគ្រប់វិស័យ។ សន្តិភាពនេះហើយ គឺជាគុណតម្លៃនៃការដឹកនាំដែលកម្ពុជាមាន និងសម្រាប់អ្នកដឹកនាំប្រទេសនៅលើសកលលោក យកគំរូ និងគួរខំរក្សា។

វេទិកាសេដ្ឋកិច្ចពិភពលោកឆ្នាំ២០២២នេះ មិនត្រឹមតែជាការចែករំលែក និងពិភាក្សាក្នុងនាមកម្ពុជាប៉ុណ្ណោះទេ ប៉ុន្តែក៏បានបង្ហាញពីភាពជាប្រធានរបស់កម្ពុជាក្នុងក្របខណ្ឌអាស៊ាន ការលើកស្ទួយបេសកកម្មអាស៊ាន ដល់ពិភពលោក និងសមត្ថភាពកុលបុត្រខ្មែរលើនយោបាយអន្តរជាតិ។

វត្តមានផ្ទាល់របស់សម្តេចតេជោនៅក្នុងកិច្ចប្រជុំនេះ គឺបានបង្ហាញអំពីកិត្យានុភាពរបស់កម្ពុជា និងការនាំមកនូវកិត្តិយសដ៏ធំធេងជាប្រវត្តិសាស្ត្រជូនកម្ពុជា។

បើទោះបីជាត្រូវមមាញឹកជាមួយកិច្ចប្រជុំនានា ដែលរៀបចំឡើងនៅក្នុងវេទិកាសេដ្ឋកិច្ចពិភពលោកឆ្នាំ២០២២នេះយ៉ាងណាក្តី តែវត្តមានដ៏កម្ររបស់សម្តេចនៅប្រទេសស្វីសនាពេលនេះ សម្តេចតេជោនាយករដ្ឋមន្ត្រី ក៏នឹងឆ្លៀតជួបសំណេះសំណាលជាមួយប្រជាពលរដ្ឋខ្មែរដែលរស់នៅប្រទេសស្វីស និងបណ្តាប្រទេសអឺរ៉ុបផងដែរ។ ការឆ្លៀតជួបសំណេះសំណាលរបស់សម្តេចតេជោជាមួយប្រជាពលរដ្ឋខ្មែរនៅក្រៅប្រទេស គឺជាការបង្ហាញឱ្យឃើញនូវការនឹករលឹក និងស្មារតីនៃការយកចិត្តទុកដាក់ គិតគូរ ចំពោះប្រជាពលរដ្ឋខ្មែរនៅក្រៅប្រទេសទាំងអស់។

សូមបញ្ជាក់ថា នៅក្នុងឆ្នាំ២០២២នេះ បូករួមទាំងការអញ្ជើញទៅប្រទេសស្វីសនេះផង សម្តេចតេជោ ហ៊ុន សែន បានអញ្ជើញបំពេញបេសកកម្មការងារនៅក្រៅប្រទេសចំនួន៥លើកហើយ។

លើកទី១ អញ្ជើញទៅកាន់ប្រទេសមីយ៉ាន់ម៉ា កាលពីខែមករា, លើកទី២ អញ្ជើញទៅកាន់ប្រទេសកូរ៉េខាងត្បូង កាលពីខែកុម្ភៈ, លើកទី៣ អញ្ជើញទៅកាន់ប្រទេសជប៉ុន កាលពីខែមេសា និងលើកទី៤ អញ្ជើញទៅកាន់សហរដ្ឋអាមេរិកនៅខែឧសភានេះ៕