(ស្វាយរៀង)៖ លោក ខៀវ សំអុល ប្រធានមន្ទីរអប់រំ យុវជន និងកីឡា ខេត្តស្វាយរៀង បានអញ្ជើញបើកសន្និបាតបូកសរុបលទ្ធផលការងារអប់រំ យុវជន និងកីឡា ឆ្នាំសិក្សា២០២០-២០២១ និងលើកទិសដៅសកម្មភាពការងារ ឆ្នាំសិក្សា ២០២១-២០២២ នាព្រឹថ្ងៃទី១៧ ខែមិថុនា ឆ្នាំ២០២២។

ពិធីបើកសន្និបាតបូកសរុបនេះដែរក៏មានការចូលរួមពីសំណាក់លោក លោកស្រី អនុប្រធានមន្ទីរអប់រំយុវជន និងកីឡាខេត្ត លោក លោកស្រី ប្រធានការិយាល័យអប់រំក្រុង ស្រុក នាយក នាយិកាជាច្រើននាក់ផងដែរ។

លោក ខៀវ សំអុល បានកោតសរសើរមន្រ្តីអប់រំគ្រប់លំដាប់ថ្នាក់ ព្រមទាំងសាស្រ្តាចារ្យ លោកគ្រូអ្នកគ្រូ និងបុគ្គលិកសិក្សាទាំងអស់ ដែលបានខិតខំបំពេញភារកិច្ច របស់ខ្លួនអស់រយៈពេលមួយឆ្នាំសិក្សាកន្លងមក ទៅតាមតួនាទីនិងមុខងាររៀងៗខ្លួនទទួលបានជោគជ័យ។

លោកបន្តថា ក្នុងរយៈពេល២ឆ្នាំនៅសកលលោកក៏ដូចជាប្រទេសកម្ពុជាបានជួបវិបត្តកូវីដ ដែលបានរីករាលដាល បង្កការរាំងស្ទះដល់ការសិក្សារៀនសូត្រដល់សិស្សានុសិស្ស នៅក្នុងសាលារៀនទូទាំងខេត្តស្វាយរៀង។

ជាការឆ្លើយតបផលប៉ះពាល់នេះ មន្ទីរអប់រំ យុវជន និងកីឡាខេត្ត សហការជាមួយការិយាល័យអប់រំ យុវជន និងកីឡា នៃរដ្ឋបាលក្រុងស្រុក នាយក លោកគ្រូ និងអាជ្ញាធរពាក់ព័ន្ធ ដៃគូអភិវឌ្ឍន៍ បានខិតខំប្រឹងប្រែង រៀបចំយន្តការក្នុងការបង្រៀនតាមរូបភាពផ្សេងៗ ដូចជា ការបង្រៀនពីចម្ងាយការបង្រៀនតាមប្រព័ន្ធអេឡិចត្រូនិក (Online) ការរៀនជាបណ្តុំ ការចែកសន្លឹកកិច្ចដល់សិស្សានុសិស្ស និងការជួបផ្ទាល់ របស់លោកគ្រូអ្នកគ្រូដល់ទាំងអស់ទូទាំងខេត្ត។

លោកបន្តថា វិស័យអប់រំមានការវិវត្តន៍គួរឱ្យកត់សម្គាល់ទាំងហេដ្ឋារចនាសម្ព័ន្ធ សម្ភាររូបវ័ន្តនានា រូមទាំងគុណភាពអប់រំ តាមរយៈការអនុវត្តយុទ្ធសាស្ត្រកំណែទម្រង់វិស័យអប់រំ យុវជន និងកីឡា។ លោក ខៀវ សំអុល ក៏បានណែនាំដល់លោកលោកស្រី ដែលជាបុគ្គលិកអប់រំទាំងអស់នៅទូទាំងខេត្តស្វាយរៀង ពិសេសលោកគ្រូ អ្នកគ្រូ និងនាយកសាលានានា ត្រូវពង្រឹងនូវការគ្រប់គ្រងសាលារៀនឲ្យមានវិន័យល្អ ពិសេសលើគ្រូបង្រៀនតែម្តងហើយ។

ក្នុងពិធីបើកសន្និបាតបូកសរុបនាពេលនេះ គឺជាការប្រមូលផ្តុំគ្រប់ជំនាញគ្រប់ផ្នែក ដើម្បីរួមចំណែកក្នុងការផ្តល់យោបល់ និងពិភាក្សា ដើម្បីរកឱ្យឃើញក្នុងការអភិវឌ្ឍន៍វិស័យអប់រំយុវជន និងកីឡាខេត្តស្វាយរៀង ឱ្យមានការរីកចម្រើនជាបន្តបន្ទាប់ទៀតផងដែរ៕