(សៀមរាប)៖ វេទិកាសន្តិភាពកម្ពុជា (វ.ស.ក) នៅថ្ងៃទី៧ ខែកក្កដា ឆ្នាំ២០២២នេះ បានរៀបចំបើកមហាសន្និបាតលើកទី១ របស់ខ្លួនចាប់តាំងពីបានចុះបញ្ជីជាផ្លូវការនៅក្នុងក្រសួងមហាផ្ទៃ និងធ្វើសកម្មភាព១ឆ្នាំ ៥ខែ ដោយមានសមាជិក សមាជិកា ចូលរួមចំនួន១,០០០នាក់។

ពិធីបើកមហាសន្និបាតនេះ បានធ្វើឡើងក្រោមអធិបតីភាព លោក សួន សេរីរដ្ឋា រដ្ឋលេខាធិការ ក្រសួងអភិវឌ្ឍន៍ជនបទ និងប្រធានក្រុមប្រឹក្សាភិបាលវេទិកាសន្តិភាពកម្ពុជា (វ.ស.ក) ខណៈពិធីបិទនឹងធ្វើឡើងក្រោមអធិបតីភាព លោក ហ៊ុន ម៉ានី សមាជិករដ្ឋសភា ប្រធានគណៈកម្មាធិការទី៧ នៃរដ្ឋសភា និងជាប្រធានសហភាពសហព័ន្ធយុវជនកម្ពុជា (ស.ស.យ.ក)។

បើតាម លោក ខុន បេឡា នាយកប្រតិបត្តិនៃវេទិកាសន្តិភាពកម្ពុជា បានឱ្យដឹងថា វេទិកាសន្តិភាពកម្ពុជា ជាអង្គការមិនមែនរដ្ឋាភិបាល ដែលបានផ្តួចផ្តើមឡើងពីឆន្ទៈរបស់ក្រុមយុវជន និងប្រជាពលរដ្ឋខ្មែរ ជាអ្នកស្រឡាញ់សន្តិភាព ស្គាល់អំពីតម្លៃពិតប្រាកដ នៃសន្តិភាព និងប្តេជ្ញាការពារសន្តិភាពយ៉ាងមុតមាំដែលបានមកពីការលះបង់ពិកម្មតស៊ូដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលលោកបានខិតខំប្រឹងប្រែងស្វែងរកដោយលំបាកយកមកផ្តល់ជូនប្រជាពលរដ្ឋខ្មែរ។

លោកបានបន្តថា វេទិការសន្តិភាពកម្ពុជា បង្កើតឡើងក្នុងគោលបំណងរៀបចំឱ្យមានវេទិកាសាធារណៈ សម្រាប់ប្រជាពលរដ្ឋស្ថិតនៅក្នុងរាជធានីភ្នំពេញ នៅតាមបណ្តាខេត្ត ក្រុង ស្រុក ខណ្ឌ សង្កាត់ សម្រាប់សិស្សនៅតាមវិទ្យាល័យ និងសម្រាប់និស្សិតនៅមហាវិទ្យាល័យនានា ដើម្បីផ្សព្វផ្សាយពន្យល់ឱ្យប្រជាពលរដ្ឋ និងយុវជនខ្មែរ សិស្ស និស្សិតយល់ដឹងពីឬសគល់នៃដំណើរប្រវត្តិដ៏លំបាកអំពីការកសាងសន្តិភាព អំពីតម្លៃសន្តិភាព និងផលប្រយោជន៍នានាដែលទទួលបានពីសន្តិភាព ដោយក្តីគោរពដ៏ខ្ពង់ខ្ពស់បំផុតចំពោះមគ្គុទេសក៍សន្តិភាព និងភាពដឹកនាំរបស់សម្តេចតេជោ ហ៊ុន សែន។

លោក ខុន បេឡា បានបញ្ជាក់ថា ក្នុងដំណើរសកម្មភាពរបស់ខ្លួនរយៈពេល១ឆ្នាំ ៥ខែ ដែលចំពេលស្ថានភាពជំងឺកូវីដ១៩ នៅកម្ពុជា បាននឹងកំពុងរាតត្បាតយ៉ាងខ្លាំងក៏ដោយ ប៉ុន្តែ វេទិកាសន្តិភាពកម្ពុជា បានធ្វើសកម្មភាពមនុស្សធម៌របស់ខ្លួនជាច្រើននៅតាមបណ្តារាជធានី-ខេត្តនានា ជាដើម៕