(វ៉ាទីកង់)៖ រយៈពេលកាន់តំណែងជាសម្តេចប៉ាប Francis នឹងមិនស្ថិតស្ថេរយូរអង្វែងឡើយ ហើយសម្តេចប៉ាប បានត្រៀមជាស្រេចក្នុងការលាលែង ជាជាងការកាន់តំណែងនេះអស់មួយជីវិត ដូចអតីតសម្តេចប៉ាបមុនដែរ នេះបើយោងតាមសេចក្តីរាយការណ៍របស់ភ្នាក់ងារសារព័ត៌មាន Channel News Asia ចេញផ្សាយនៅថ្ងៃទី១៣ ខែមីនា ឆ្នាំ២០១៥នេះ។ ការទម្លាយរឿងនេះ បានធ្វើឡើងក្នុងពេលសម្តេចប៉ាប ធ្វើបទសម្ភាសន៍ជាមួយភ្នាក់ងារមជ្ឈមណ្ឌលផ្សព្វផ្សាយ Televisa របស់ប្រទេស ម៉ិចស៊ិក ក្នុងខួបពីរឆ្នាំនៃការជាប់ឆ្នោតរបស់សម្តេច។
មេដឹកនាំសាសនាកាតូលិករូបនេះបានបញ្ជាក់ លោកមិនទាស់ចិត្តក្នុងការធ្វើសម្តេចប៉ាបនោះទេ ប៉ុន្តែលោកចង់ដូចមនុស្សទូទៅ ដែលអាចចេញទៅខាងក្រៅ ដោយគ្មានការកត់សម្គាល់ពីអ្នកដទៃ។
សូមជម្រាបថា សម្តេចប៉ាប Benedict បានក្លាយជាមេដឹកនាំវិហារកាត់តូលិកទីក្រុង រ៉ូមទីមួយ ដែលបានលាលែងពីដំណែងកាលពីឆ្នាំ២០១៣កន្លងទៅនេះ ដោយមិនបន្តអស់មួយជីវិត ដែលនេះជារឿងមិនធ្លាប់មាន ក្នុងរយៈពេល៦០០ឆ្នាំកន្លងមក៕
