(សៀមរាប)៖ អាជ្ញាធរខេត្តសៀមរាប និងអាជ្ញាធរខេត្តឧត្តរមានជ័យ នាថ្ងៃទី១៩ ខែមករា ឆ្នាំ២០២៣នេះបានរួមគ្នាបើកកិច្ចប្រជុំពិភាក្សាលើការអនុវត្តគម្រោងកែលម្អរផ្លូវប្រវែង ៦៨គីឡូម៉ែត្រពីស្រុកស្វាយលើ ខេត្តសៀមរាប ទៅស្រុកត្រពាំងប្រាសាទ ខេត្តឧត្តរមានជ័យ នៅសាលាខេត្តសៀមរាប។

កិច្ចប្រជុំនេះដែរ បានពិភាក្សាលើការអនុវត្តគម្រោងកែលម្អរផ្លូវប្រវែង ៦៨គីឡូម៉ែត្រ ពីភូមិអង្កាញ់ ឃុំស្វាយលើ ស្រុកស្វាយលើ ខេត្តសៀមរាប ទៅដល់ភូមិត្រពាំង ប្រាសាទ ឃុំស្រុកត្រពាំងប្រាសាទ ខេត្តឧត្តរមានជ័យ ក្រោមកិច្ចដឹកនាំប្រជុំដោយលោក ទៀ សីហា អភិបាលខេត្តសៀមរាប និងលោក ប៉ែន កុសល្យ  អភិបាលខេត្តឧត្តរមានជ័យ ដោយមានតំណាងអញ្ជើញចូលរួមពីក្រសួងសាធារណការ និងដឹកជញ្ជូន ក្រសួងសេដ្ឋកិច្ច និងហិរញ្ញវត្ថុ តំណាងក្រុមហ៊ុន មន្ទីរជំនាញពាក់ព័ន្ធនៃខេត្តទាំងពីរ នាយករដ្ឋបាលសាលាខេត្ត ទីចាត់ការហិរញ្ញវត្ថុ និងអាជ្ញាធរស្រុក ឃុំ ពាក់ព័ន្ធនៃខេត្តទាំងពីរផងដែរ។

លោក ប៉ែន កុសល្យ បានលើកឡើងថា ផ្លូវមួយខ្សែប្រវែង ៦៨គីឡូម៉ែត្រ ដែលឆ្លកាត់ភូមិសាស្ត្រខេត្តសៀមរាប និងខេត្តឧត្តរមានជ័យ ដែលមានគម្រោងស្ថាបនាផ្លូវ DBST ឆ្លងកាត់ភូមិអង្កាញ់ ឃុំស្វាយលើ ទៅភូមិអភិវឌ្ឍន៍ ឃុំកន្ទួត ស្រុកស្វាយលើ ខេត្តសៀមរាប មានប្រវែង ៤១គីឡូម៉ែត្រ និងភូមិទំនប់ថ្មី ទៅភូមិត្រពាំងប្រាសាទ ឃុំស្រុកត្រពាំងប្រាសាទ ខេត្តឧត្តរមានជ័យ មានប្រវែង ២៧គីឡូម៉ែត្រ ដែលស្ថាបនាដោយក្រុមហ៊ុន លី ឈួន ត្រូវបានរាជរដ្ឋាភិបាល បានឲ្យផ្អាកមួយរយៈ ក៏ត្រូវបានរងការរឹះគុណពីប្រព័ន្ធបណ្តាញសង្គមទៀតផង។

ផ្លូវមួយខ្សែនេះ បានផ្តល់អត្ថប្រយោជន៍ដល់ខេត្តទាំងពីរ ក្នុងការដឹកជញ្ជូនកសិផលរបស់ប្រជាកសិករទៅកាន់ទីផ្សារ និងប្រើពេលវេលាខ្លីឆ្ពោះទៅ កាន់ច្រកព្រំដែន។ ម៉្យាងទៀតផ្លូវនេះគឺជាផ្លូវយុទ្ធសាស្ត្ររបស់កងទ័ព និងជួយសម្រួលនូវភាពងាយស្រួលរបស់ប្រជាពលរដ្ឋ ក្នុងភូមិសាស្ត្រនៃខេត្តទាំងពីរផងដែរ។

ឆ្លងតាមកិច្ចពិភាក្សា នៃអង្គប្រជុំទាំងមូលក៏បានផ្តោតសំខាន់ទៅលើបច្ចេកទេសក្នុងការស្ថាបនាផ្លូវ និងថវិកា។ ក្នុងនោះដែរ តំណាងក្រុមហ៊ុន លី ឈួន ក៏បានលើកឡើងដែរថា ក្រោយពីការទូទាត់នូវថ្លៃសំណងដល់ក្រុមហ៊ុនរួចរាល់ ប្រសិនបើក្រសួងឲ្យក្រុមហ៊ុនបន្តធ្វើក្រុមហ៊ុននឹងធ្វើបន្តផងដែរ។ ក្នុងនោះដែរ តំណាងក្រសួងសាធារណការ ក៏បានបញ្ជាក់ថា គម្រោងផ្លូវមួយខ្សែនេះ គឺត្រូវបានប្រគល់ឲ្យកងវិស្វកម្មកងទ័ពស្ថាបនាបន្ត នៅក្នុងភូមិសាស្ត្រខេត្តសៀមរាប ប្រវែង៤១ គីឡូម៉ែត្រ និងប្រវែង ២៧គីឡូម៉ែត្រ ក្នុងភូមិសាស្ត្រខេត្តឧត្តរមានជ័យ ត្រូវបានប្រគល់ឲ្យមន្ទីរសាធារណការ និងដឹកជញ្ជូនខេត្តឧត្តរមានជ័យជាអ្នកស្ថាបនា ក្នុងគម្រោងផែនការ៣ឆ្នាំរំកិលរបស់ក្រសួង ដែលនឹងធើ្វឲ្យរួចរាល់នៅឆ្នាំ២០២៤ ហើយគម្រោងផ្លូវនេះ មិនបានប្រគល់ឲ្យក្រុមហ៊ុន លី ឈួន ធ្វើបន្តទៀតឡើយ។

បើតាមការបញ្ជាក់របស់តំណាងក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា ក្រសួងបានផ្តល់ថវិកាចំនួន២លានដុល្លា សម្រាប់ធ្វើការសម្រួលផ្លូវឡើងវិញក្នុងភូមិសាស្ត្រខេត្តទាំងពីរ និងធ្វើសំណង់សិល្បៈការ្យ ក្នុងភូមិសាស្ត្រខេត្តសៀមរាប និងធ្វើស្ពាន៣០កន្លែង ក្នុងភូមិសាស្ត្រស្រុកត្រពាំងប្រាសាទផងដែរ។

លោក ទៀ សីហា បានលើកឡើងថា សក្តានុពលរបស់ខេត្តមានវិស័យកសិកម្ម និងវិស័យទេសចរណ៍ ដែលជាវិស័យសេដ្ឋកិច្ចមួយមិនចេះរីងស្ងួនរបស់កម្ពុជា។ ដោយកត្តានេះទោះបីប្រទេសកម្ពុជាបានជួបនូវវិបត្តិជំងឺកូវីដ-១៩ ប្រមុខរាជរដ្ឋាភិបាលបានផ្តល់ថវិកា ក្នុងការស្ថាបនាផ្លូវ៣៨ខ្សែ ក្នុងក្រុងសៀមរាប និងកែលម្អរដងស្ទឹងប្រវត្តិសាស្ត្រសៀមរាប ក្នុងគោលដៅលើកម្ពស់វិស័យទេសចរណ៍ ក្រោយពេលវិបត្តិជំងឺកូវីដ១៩ មានភាពធូស្រាលនៅកម្ពុជា ក៏បានធ្វើឲ្យវិស័យទេសចរណ៍នៅខេត្តសៀមរាប កាន់តែមានភាពប្រសើរឡើងវិញ។ទាំងនេះក៏សរបញ្ជាក់ថា ប្រមុខរាជរដ្ឋាភិបាល បានដាក់វិនិយោគ ក្នុងស្ថាបនាផ្លូវថ្នល់នេះ គឺដើមី្បសេដ្ឋកិច្ចប្រទេសជាតិ និងប្រជាពលរដ្ឋ។

ទន្ទឹមនឹងនេះដែរ លោក ទៀ សីហា និងលោក ប៉ែន កុសល្យ បានធ្វើការថ្លែងអំណរគុណដល់ក្រសួងដែលតែងគាំទ្ររាល់ការចំណាយ លើកិច្ចអភិវឌ្ឍន៍លើហេដ្ឋារចនាសម្ព័ន្ធរូបវ័ន្ត នៅទូទាំងប្រទេស។ ក្នុងនោះដែរ លោកទាំងពីរ ក៏បានជម្រុញឲ្យក្រុមហ៊ុន លីឈួន ធ្វើការពន្លឿនការរៀបចំធ្វើឯកសារ ដើមី្បធ្វើការទូទាត់រាល់សំណងក្នុងរយៈពេលស្ថាបនាផ្លូវមួយខ្សែនេះ។ ផ្លូវមួយខ្សែនេះ ជាគម្រោងផែនការ៣ឆ្នាំរំកិលរបស់ក្រសួងសាធារណៈការ និងដឹកជញ្ជូន ព្រមទាំងបានធ្វើការប្រគល់ឲ្យកងវិស្វកម្មកងទ័ព និងមន្ទីរសាធារណការ និងដឹកជញ្ជូនខេត្តឧត្តរមានជ័យ ធ្វើការស្ថាបនា ហើយផ្លូវមួយនេះ ក៏ជាផ្លូវយុទ្ធសាស្ត្ររបស់កងទ័ពទៀតផង។

ជាមួយនេះដែរ ក្រសួងជំនាញក៏ត្រូវរៀបចំបង្កើតក្រុមការងារក្នុងការត្រួតពិនិត្យលើការងារនេះ ព្រមទាំងត្រូវអនុវត្តទៅតាមលិខិត្តរបស់ក្រសួងេសដ្ឋកិច្ច និងហិរញ្ញវត្ថុ និងក្រសួងសាធារណការ និងដឹកជញ្ជូន ឲ្យទទួលបានលទ្ធផលល្អផងដែរ៕