(ព្រះវិហារ)៖ មន្ត្រី កម្មករ ដែលមានស្នាដៃចំនួន១១រូប ទទួលបានបណ្ណសរសើរ និងថវិកា១០០ដុល្លារជាការលើកទឹកចិត្ត នៅក្នុងកិច្ចប្រជុំឆ្លងរបាយការណ៍លទ្ធផលការងារប្រចាំខែមករា និងទិសដៅអនុវត្តសម្រាប់ខែកុម្ភៈ ឆ្នាំ២០២៣ ក្រោមវត្តមានលោក អ៊ុក គឹមសាន្ត អភិបាលរងខេត្តព្រះវិហារ ទទួលបន្ទុកមន្ទីរសាធារណការ និងដឹកជញ្ជូន តំណាងលោក គីម រិទ្ធី អភិបាលខេត្ត និងលោក សំ លាងទ្រី ប្រធានមន្ទីរសាធារណការខេត្ត ដោយមានការចូលរួម ពីអនុប្រធានមន្ទីរ លោក លោកស្រី ជាប្រធាន អនុប្រធាន ការិយាល័យ ព្រមទាំងមន្ត្រីរាជការ មន្ត្រីជាប់កិច្ចសន្យា ប្រធានការដ្ឋាន ជាច្រើនរូបទៀត នៅរសៀលថ្ងៃទី២៦ ខែមករា ឆ្នាំ២០២៣។
នៅក្នុងឱកាសនោះ លោក សំ លាងទ្រី បានមានថ្លែងជម្រាបជូនលោក អ៊ុក គឹមសាន្ត ពីផែនការសកម្មភាពការងារដែលមន្ទីរ បាននិងកំពុងអនុវត្ត មានដូចដូចជាការបែងចែកតួនាទីភារកិច្ចដល់មន្ត្រីទាំងអស់ ដើម្បីឱ្យមន្ត្រីទាំងអស់ នៅក្នុងមន្ទីរសាធារណការ និងដឹកជញ្ជូនខេត្ត មានការជាប់ខ្លួន ក៏ដូចជាបទបញ្ជាផ្ទៃក្នុងដែលបានធ្វើឡើងក្នុងមួយឆ្នាំម្តង ក្នុងគោលបំណងឱ្យមន្ត្រីទាំងអស់អនុវត្តឱ្យបានតាមបទបញ្ជាដែលបានដាក់ចេញ។
លោកប្រធានមន្ទីរ បានលើកឡើងផងដែរពីលទ្ធផលការប្រចាំខែមករា ដែលមន្ទីរបានដាក់ផែនការ ទិសដៅអនុវត្តមានចំនួន២៩ចំណុច ហើយលទ្ធផលដែលយើងធ្វើជាក់ស្តែងគឺយើងធ្វើបានរហូត៣០ចំណុច ពោលគឺយើងធ្វើលើស ផែនការ ១ចំណុច ហើយសម្រាប់ទិសដៅខែកុម្ភៈ ខាងមុខនេះ គឺមន្ទីរដាក់ទិសដៅ២៩ចំណុចដដែល។ ពាក់ព័ន្ធនឹងរចនាសម្ព័ន្ធការងាររបស់មន្ទីរជាក់ស្តែង គឺមន្ទីរមានមន្ត្រីរាជការក្របខណ្ឌចំនួន៣៤រូប និងមន្ត្រីជាប់កិច្ចសន្យា ចំនួន៥០រូប ប៉ុន្តែដោយទំហំការងាររបស់មន្ទីរច្រើន មន្ទីរបង្ខំចិត្តជួលមន្ត្រីខាងក្រៅបន្ថែមប្រមាណ ៥០រូបបន្ថែមទៀត សរុបមន្ត្រីទាំងអស់នៅក្នុងមន្ទីរមានជាង១០០នាក់។
លោក សំ លាងទ្រី បានថ្លែងលើកឡើងពីសកម្មភាពការងាររួមរបស់មន្ទីរ មានត្រួតពិនិត្យលក្ខណៈបច្ចេកទេសយានយន្ត ការងារចុះបញ្ជីយានយន្តដែលមកដល់ថ្ងៃនេះយើងមានកន្លែងចុះបញ្ជីយានយន្តចំនួន៤ទីតាំង មានស្ថានីយ៍ថ្លឺងរថយន្ត១កន្លែងនៅស្រុករវៀង។
លោកប្រធានក៏បានជម្រាបជូនលោកអភិបាលរងខេត្ត ពីវស័យសាធារណការផងដែរថា មន្ទីរសាធារណការជាអង្គភាពចំណូលគ្រប់ចំណាយគ្រប់ មិនមែនជាអង្គភាពធ្វើអាជីវកម្មទេ ហើយមន្ទីរសាធារណការខេត្តគ្រប់គ្រង តែផ្លូវជាតិ និងផ្លូវខេត្តទេដែលមានប្រវែងសរុប៨៣៥គីឡូម៉ែត្រ ចំពោះផ្លូវនៅក្នុងទីរួមខេត្តក៏មិនគ្រប់គ្រងដោយមន្ទីរដែរ ប៉ុន្តែដើម្បីខេត្ត ដើម្បីប្រជាពលរដ្ឋ មន្ទីរបានធ្វើការជួសជុល ថែទាំជូនដោយមិនគិតអ្វីទាំងអស់។
លើសពីនេះទៀត លោកប្រធានមន្ទីរ ក៏បានជម្រាបជូនពីបញ្ហាប្រឈមមួយចំនួនដែលកើតមានឡើង ទាក់ទងនិងវិស័យសាធារណការនិងដឹកជញ្ជូន ក៏ដូចជាវិស័យមួយចំនួនទៀត ដែលមន្ត្រីចុះអនុវត្តជាក់ស្តែងតែងជួបប្រទះ និងបានសំណូមពរដល់លោកអភិបាលរងខេត្ត ទទួលបន្ទុកសាធារណការនិងដឹកជញ្ជូន ជួយរកវិធានការដោះស្រាយ ដើម្បីឱ្យដំណើរការការអនុវត្តការងាររបស់មន្ទីរ ប្រព្រឹត្តទៅដោយរលូន។
បន្ទាប់ពីស្តាប់ការលើកឡើងពី លោកប្រធានមន្ទីរ និងមន្ត្រីជំនាញ នៃមន្ទីរសាធាររណការ និងដឹកជញ្ជូនខេត្តរួចមក លោក អ៊ុក គឹមសាន្ត បានមានថ្លែងកោតសរសើរដល់ថ្នាក់ដឹកនាំ មន្ត្រីរាជការ នៃមន្ទីរសាធារណការខេត្តទាំងអស់ ដែលបានខិតខំបំពេញតួនាទី ភារកិច្ច បានយ៉ាងល្អប្រសើរ ពិសេសលោកអភិបាលរងខេត្ត បានកោតសរសើរចំពោះការរៀបចំសោភ័ណ្ណភាព នៅក្នុងបរិវេណមន្ទីរ ក៏ដូចជានៅតាមការិយាល័យធ្វើការ បានយ៉ាងស្រស់ស្អាតនិងមានភាពទាក់ទាញ។
ទាក់ទងនិងបញ្ហាប្រឈមដែលថ្នាក់ដឹកនាំមន្ទីរ ក៏ដូចជាមន្ត្រីជំនាញបានលើកឡើងលោក អ៊ុក គឹមសាន្ត សន្យានឹងពាំនាំជម្រាបជូនលោក គីម រិទ្ធីអភិបាលខេត្តព្រះវិហារ ដើម្បីរកនិតិវិធីដោះស្រាយ ធ្វើយ៉ាងណាឱ្យដំណើរការការងារ របស់មន្ទីរប្រព្រឹត្តទៅដោយរលូន ដើម្បីផលប្រយោជន៍រួមរបស់ប្រជាពលរដ្ឋ។ លោក អ៊ុក គឹមសាន្ត ក៏បានប្រគល់បណ្ណសរសើរ និងថវិកា១០០ដុល្លា លើកទឹកចិត្តដល់មន្ត្រី កម្មករ ដែលមានស្នាដៃចំនួន ១១រូបផងដែរ៕
