(ពោធិ៍សាត់)៖ លោក ចេង ឡៃ អភិបាលរង នៃគណៈអភិបាលខេត្តពោធិ៍សាត់ នាថ្ងៃទី២៩ ខែមីនា ឆ្នាំ២០២៣ បានដឹកនាំក្រុមការងារថ្នាក់ខេត្ត ស្រុក ឃុំ និងមន្ទីរអង្គភាពពាក់ព័ន្ធ ចុះជួបប្រជុំជាមួយបងប្អូនប្រជាពលរដ្ឋ ចំនួន២៧គ្រួសារ ដែលត្រូវដោះដូរដី ចេញពីអនុស្ថានីយ៍អូរសោម ឱ្យទៅកាន់ទីតាំងដី ស.ជ.ណ ថ្មី។
ក្នុងជំនួបនេះត្រូវបានធ្វើឡើង នៅទីតាំងដី ស.ជ.ណ ថ្មី ដែលស្ថិតក្នុងភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ (រ៉បនឹងផ្លូវជាតិលេខ១០) ដោយបានការចូលរួមពីលោក អេង គន្ធា អគ្គនាយរងអគ្គីសនីកម្ពុជា តំណាងលោក កែវ រតន: រដ្ឋមន្រ្តីប្រតិភូអមនាយករដ្ឋមន្ត្រី និងជាអគ្គនាយកអគ្គីសនីកម្ពុជា។
លោក ចេង ឡៃ តំណាងលោក ខូយ រីដា អភិបាលខេត្តពោធិ៍សាត់ បានជំរាបជូនថា គោលបំណងរបស់ក្រុមការងារ ដែលចុះមកនាពេលនេះ គឺដើម្បីត្រួតពិនិត្យមើលថា តើបងប្អូនបងប្អូនប្រជាពលរដ្ឋ ចំនួន២៧គ្រួសារ ទទួលបានដីដែលអាជ្ញាធរមានសមត្ថកិច្ច បានធ្វើការដោះដូរ ពីទីតាំងចាស់មកទីតាំងថ្មី តាមស្មារតី ស.ជ.ណ លេខ៤៧១ ចុះថ្ងៃទី២៨ ខែសីហា ឆ្នាំ២០២១ របស់រាជរដ្ឋាភិបាលកម្ពុជា បានគ្រប់គ្នាហើយឬនៅ។
លោកអភិបាលរងខេត្ត បន្ថែមថា ស្របពេលដែលក្រុមការងារបានឈូសឆាយ កំណត់ព្រំដីឡូត៍ សាងសង់ផ្លូវក្រាលគ្រួសក្រហម និងបានរៀបចំចាប់ឆ្នោតលើក្រដាស និងលើដីជាក់ស្តែងរួចរាល់ហើយនោះ ដល់ពេលដែលបងប្អូន ត្រូវបំពេញនីតិវិធី ទំរង់បែបបទ នៃការប្រមូលទិន្នន័យក្បាលដី ជាផ្លូវការ ផ្លូវច្បាប់ ងាយស្រួលដល់មន្ត្រីជំនាញ ចុះវាស់វែងលក្ខណ:ជាប្រព័ន្ធ ឈានដល់ការចេញប័ណ្ណកម្មសិទ្ធិ ជូនបងប្អូនប្រជាពលរដ្ឋ បានកាន់កាប់ប្រើប្រាស់ និងអាស្រ័យផលស្របច្បាប់។
បងប្អូនប្រជាពលរដ្ឋទាំង២៧គ្រួសារ បានសម្តែងក្តីរីករាយចំពោះថ្នាក់ដឹកនាំខេត្ត អគ្គីសនីកម្ពុជា ជាពិសេសប្រមុខរាជរដ្ឋាភិបាលកម្ពុជា ដែលមានគោលនយោបាយដោះដូរដីធ្លី ជូនពួកគាត់បានសមស្រប ព្រមទាំងជួយឱ្យពួកគាត់ម្នាក់ៗមានលំនឹង និងមានភាពកក់ក្តៅក្នុងចិត្ត ក្នុងការរស់នៅ និងអាស្រ័យផល មានប័ណ្ណកម្មសិទ្ធិស្របច្បាប់ទៅថ្ងៃខាងមុខ។
បើតាមលោក អេង គន្ធា, បងប្អូនប្រជាពលរដ្ឋ ចំនួន២៧គ្រួសារ ដែលទទូលបានដីសំណងទីតាំងថ្មី គឺនៅមិនឆ្ងាយប៉ុន្មានពីទីតាំងដីចាស់ (ដីអនុស្ថានីយ៍អូរសោម) ប៉ុន្មាននោះទេ។ គ្រួសារនីមួយៗទទួលបានដីទៅតាមទំហំជាក់ស្តែង ដែលបានព្រមព្រៀមគ្នា កាលពីពេលកន្លងមក។
លោកថា នាពេលខាងមុខ បងប្អូនប្រជាពលរដ្ឋទាំង២៧គ្រួសារ នឹងត្រូវទទួលបានប័ណ្ណកម្មសិទ្ធិស្របច្បាប់ជាក់ជាពុំខាន។ ចំពោះបងប្អូនដែលចូលមកតាំងលំនៅលើទីតាំងដីថ្មី លោក កែវ រតន: ក្នុងនាមអគ្គីសនីកម្ពុជា ក៏បានសម្រេចផ្តល់ជូនស័ង្កសី ក្នុងមួយគ្រួសារ ចំនួន៣០សន្លឹក ចានបង្គន់អនាម័យ ចំនួន០១ ព្រមទាំងតបណ្តាញអគ្គិសនីចូល និងខួងអណ្តូងទឹក សម្រាប់ប្រើប្រាស់រួមជូនបងប្អូនផងដែរ។
ក្នុងថ្ងៃដដែលនោះ លោក ចេង ឡៃ ក៏បានចុះសម្របសម្រួលបញ្ចប់ទំនាស់ព្រំដីផ្លូវ ក្នុងឃុំអូរសោម ដែលប៉ះពាល់ដល់ការអនុវត្តគម្រោងសាង់សង់ផ្លូវប៉េតុង ចំនួន៦ខ្សែ ប្រវែងជាង២០គីឡូម៉ែត្រ ប្រកបដោយបរិយាកាសចូលរួម និងសម្បទានឱ្យគ្នាទៅទៅវិញទៅមក ស្របតាមគោលនយោបាយ ឈ្នះ-ឈ្នះ៕
