(ភ្នំពេញ)៖ មន្ត្រីជាន់ខ្ពស់គណបក្សប្រជាជនកម្ពុជា បានបញ្ជាក់ទៅមហាជនដែលមកជួបជុំក្នុងពិធី «ទិវាជាតិនៃការចងចាំ» ២០ឧសភាថា ថ្ងៃទី២០ ខែឧសភា ជាទិវាជាតិនៃការចងចាំ នូវទង្វើដ៏យង់ឃ្នងនៃរបបកម្ពុជា ប្រជាធិបតេយ្យ ដែលជារបបប្រល័យពូជសាសន៍ យ៉ាងឃោរឃៅបំផុត ដែលកន្លងទៅត្រូវបានគេហៅថា «ទិវាចងកំហឹង» ដើម្បីជាការចង់កំហឹងទៅនឹងរបបខ្មែរក្រហម ដែលបានកាប់សម្លាប់ប្រជាពលរដ្ឋខ្មែរ។
ការបញ្ជាក់របស់លោក ជា ចាន់តូ សមាជិកគណៈអចិន្រ្តៃយ៍ គណៈកម្មាធិការកណ្តាល គណបក្សប្រជាជនកម្ពុជា និងជាប្រធានក្រុមការងារចុះមូលដ្ឋានខេត្តកំពង់ធំ ក្នុងវិធី២០ឧសភា «ទិវាជាតិនៃការចងចាំ» ប្រារព្ធធ្វើនៅវត្តក្ដីដូងស្ថិត ក្នុងឃុំក្ដីដូង ស្រុកកំពង់ស្វាយ ខេត្តកំពង់ធំនាថ្ងៃទី២០ ខែឧសភា ឆ្នាំ២០២៣។
លោក ជា ចាន់តូ បានបញ្ជាក់ឲ្យដឹងថា ថ្ងៃនេះជួបជុំគ្នា ដើម្បីបង្សុកូលរាប់បាត្រប្រគេនព្រះសង្ឃ ឧទ្ទិសកុសល ជូនដល់បងប្អូនជនរួមជាតិ បានរងគ្រោះបាត់បង់ជីវិត ដោយអំពើប្រល័យពូជសាសន៍ និងរំលឹកឡើងវិញ នូវទុក្ខលំបាកវេទនារបស់មាតុភូមិជាទីស្នេហា ក្នុងរបបប្រល័យពូជសាសន៍ប៉ុលពត។ ក្នុងនោះឧទ្ទិសមនុញ្ញផល កើតចេញនៅថ្ងៃនេះ ជូនដល់វិញ្ញាណក្ខន្ធយុទ្ធជន យុទ្ធនារី និងបងប្អូនជនរួមជាតិ ដែលបានបូជាជីវិត និងធ្វើពលីកម្មគ្រប់បែបយ៉ាង ក៏ដូចជាបងប្អូនជនរួមជាតិ បានរងគ្រោះបាត់បង់ជីវិត ក្នុងរបបប្រល័យពូជសាសន៍នោះ បានទៅកាន់សុគតិភពកុំបីឃ្លៀងឃ្លាតផងដែរ។
លោក ជា ចាន់តូ ក៏បានអំពាវនាវឲ្យប្រជាជនឲ្យទៅបោះឆ្នោត ជ្រើសតាំងតំណាងរាស្ត្រនីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ ឲ្យបានគ្រប់ៗគ្នា ទោះជាយ៉ាងនេះក៏មានតែគណបក្សប្រជាជនកម្ពុជា ដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន មួយគត់ធានានូវសុខសន្តិភាព សេរីភាព លទ្ធិប្រជាធិបតេយ្យ ស្ថិរភាពនយោបាយ និងវឌ្ឍនភាពសង្គម នឹងធ្វើឲ្យប្រជាជនរស់បានសុខដុមរមនា ហើយក៏គ្មានមានអ្វីមានតម្លៃលើសសន្តិភាពទេ ព្រោះសន្តិភាពជាមូលដ្ឋានគ្រឹះដ៏រឹងមាំបំផុត មិនអាចខ្វះបានក្នុងការកសាង និងអភិវឌ្ឍ ប្រទេសលើគ្រប់វិស័យ៕
