(កំពត)៖ សម្តេចកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអញ្ជើញជាអធិបតីក្នុងពិធីបុណ្យអភិសេក ព្រះអង្គ ព្រះឱសទិព្វ និងឆ្លងជណ្តើរកែវ ព្រះឥន្ទកោសិយ៍ នៅភ្នំម្រោម ស្ថិតក្នុងស្រុកបន្ទាយមាស ខេត្តកំពត នៅថ្ងៃទី២០ ខែឧសភា ឆ្នាំ២០២៣នេះ។
ការកសាងព្រះអង្គ ព្រះឱសទិព្វ និងឆ្លងជណ្តើរកែវព្រះឥន្ទកោសិយ៍នេះ គឺជាគំនិតផ្តួចផ្តើមកសាងដោយ សម្តេចកិត្តិសង្គហបណ្ឌិត ម៉ែន សំអន រួមជាមួយឧកញ៉ា អ្នកឧកញ៉ា លោក លោកស្រី អាជ្ញាធរគ្រប់លំដាប់ថ្នាក់នៃខេត្តកំពត និងពុទ្ធបរិស័ទ្ធជិតឆ្ងាយ ដើម្បីតម្កល់ទុកជាទីស្ការៈ និងជាសម្រាប់ទុកជារមណីយដ្ឋានទេសចរណ៍វប្បធម៌ផងដែរ ក្នុងការលើកស្ទួយវិស័យព្រះពុទ្ធសាសនា ដែលជាសាសនារបស់រដ្ឋ។
ឆ្លៀតក្នុងឱកាសនោះ សម្តេចកិត្តិសង្គហបណ្ឌិត ម៉ែន សំអន ក៏បានសំណេះសំណាលជាមួយប្រជាពលរដ្ឋ គឺចំថ្ងៃទិវាជាតិនៃការចងចាំ ថ្ងៃទី២០ ខែឧសភា ឆ្នាំ២០២២ គឺជាថ្ងៃដែលប្រជាជនកម្ពុជាគ្រប់ៗរូបបានចងចាំ និងមិនអាចបំភ្លេចបានឡើយនូវរបបប្រល័យពូជសាសន៍ ប៉ុល ពត ដែលបានសម្លាប់ប្រជាជនខ្មែរស្លូតត្រង់។
ប្រជាជនកម្ពុជាប្រារព្ធទិវាជាតិ នៃការចងចាំនេះឡើង គឺដើម្បីរំលឹកដល់ជនរងគ្រោះជាង៣លាននាក់ ដែលបានស្លាប់បាត់បង់អាយុជីវិតយ៉ាងអយុត្តិធម៌ និងទទួលរងទារុណកម្មយ៉ាងឈឺចាប់ខ្លោចផ្សាពីឧក្រិដ្ឋកម្ម ដែលបានកើតឡើងក្នុងរបបអាវខ្មៅប្រល័យពូជសាសន៍ដ៏យង់ឃ្នងនេះ។
សម្តេចកិត្តិសង្គហបណ្ឌិត បានបន្តទៀតថា ប្រសិនបើគ្មានថ្ងៃ៧ មករា ឆ្នាំ១៩៧៩ទេ ម្ល៉េះយើងគ្មានអាយុជីវិតទេ។ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជា បានដាក់ចេញនូវនយោបាយឈ្នះឈ្នះរបស់ ធ្វើឲ្យមានសុខសន្តិភាពពាសពេញប្រទេស ។
សម្តេចកិត្តិសង្គហបណ្ឌិត ម៉ែន សំអន បានអំពាវនាវដល់ប្រជាពលរដ្ឋទាំងអស់ត្រូវរួមគ្នាថែរក្សាសុខសន្តិភាព ថែរក្សានូវសមិទ្ធផលរបស់គណបក្សប្រជាជន ដែលជាមូលដ្ឋានគ្រឹះនៃការអភិវឌ្ឍប្រទេស។
នៅក្នុងពិធីនោះ សម្តេចកិត្តិសង្គហបណ្ឌិត ក៏បានធ្វើការចែកអំណោយ និងថវិកា ជូនដល់ចាស់ព្រឹទ្ធាចារ្យ ដូនជី តាជី និងប្រជាពលរដ្ឋជិត៦០០នាក់ ក្នុងម្នាក់ទទួលបានក្រម៉ា១ និងថវិកា ២ម៉ឺនរៀល៕
