(ភ្នំពេញ)៖ សម្ដេចអគ្គមហាពញាចក្រី ហេង សំរិន ប្រធានរដ្ឋសភា បានផ្ញើសារថ្លែងអំណរព្រះគុណ ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រនៃកម្ពុជា ដែលទ្រង់បានព្រះរាជទានពរ ក្នុងឱកាសខួបចម្រើនជន្មាយុរបស់សម្តេច។
ក្នុងសារលិខិតនេះ សម្ដេចអគ្គមហាពញាចក្រី បានលើកឡើងដូច្នេះថា៖
«ទូលព្រះបង្គំជាខ្ញុំ សូមសម្តែងនូវកតញ្ញូតាធម៌យ៉ាងជ្រាលជ្រៅ ចំពោះព្រះរាជសារ និងកន្ត្រក ផ្កាដ៏ស្រស់ស្អាតរបស់ ព្រះករុណាជាអម្ចាស់ជីវិតលើត្បូង ក្នុងឱកាសខួបកំណើតរបស់ទូលព្រះបង្គំ ជាខ្ញុំ គម្រប់ ៨៩ ឈានចូល៩០ឆ្នាំ ។ ទូលព្រះបង្គំជាខ្ញុំ មានសេចក្តីសោមនស្សរីករាយជាអនេកប្បការ ចំពោះព្រះរាជសារ ប្រកបដោយអត្ថន័យយ៉ាងជ្រាលជ្រៅវិសេសវិសាលបំផុត។
ទូលព្រះបង្គំជាខ្ញុំ សូមលើកហត្ថបួងឧទ្ទិសសួងដល់គុណបុណ្យព្រះរតនត្រ័យ វត្ថុសក្តិសិទ្ធក្នុង លោក តាមជួយអភិបាលគ្រងរក្សា ព្រះករុណាជាអម្ចាស់ជីវិតលើត្បូង សូមព្រះអង្គ ទ្រង់មាន ព្រះរាជសុខភាពល្អបរិបូណ៍ ព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ ត្រជុំ សុខដុមរមនា ក្នុងសុខសន្តិភាព ដល់កូនចៅ និងប្រជារាស្ត្រ នៅគ្រប់ទីកន្លែង ។
សូមព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់ ទ្រង់ព្រះមេត្តាទទួលនូវភក្តីភាព និងការគោរពដ៏ខ្ពង់ខ្ពស់បំផុតពីទូលព្រះបង្គំជាខ្ញុំ»៕
