(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានជំរុញឱ្យក្រុមហ៊ុនសាជីវកម្មស្ពានថ្នល់ចិន សាងសង់ផ្លូវល្បឿនលឿនភ្នំពេញ-បាវិត ព្រមទាំងការសិក្សាផ្លូវល្បឿនលឿនភ្នំពេញ-សៀមរាប, សៀមរាប-ប៉ោយប៉ែត ឱ្យបានលឿន ដើម្បីឆ្លើយតបនឹងសេចក្តីត្រូវការរបស់ប្រជាពលរដ្ឋកម្ពុជា។
សម្តេចតេជោ បានជំរុញបែបនេះ ក្នុងឱកាសដែលសម្តេចអនុញ្ញាតឱ្យលោកលោក ទូ ហ្វី ប្រធានក្រុមហ៊ុនសារជីវកម្មស្ពានថ្នល់ចិន ចូលជួបសម្តែងការគួរសមនៅរសៀលថ្ងៃទី០៧ ខែមិថុនា ឆ្នាំ២០២៣នេះ។
លោក អ៊ាង សុផល្លែត ជំនួយការផ្ទាល់របស់សម្តេចតេជោ ហ៊ុន សែន បានឱ្យដឹងថា ក្នុងជំនួបនោះ លោក ទូ ហ្វី បានគោរពថ្លែងអំណរគុណសម្ដេចតេជោនាយករដ្ឋមន្ត្រី ដែលបានផ្ដល់កិត្តិយសអញ្ចើញជាគណៈអធិបតី បើកការដ្ឋានសាងសង់ផ្លូវល្បឿនលឿនភ្នំពេញ ទៅក្រុងបាវិត និងអនុញ្ញាតឱ្យក្រុមហ៊ុនចុះហត្ថលេខាសិក្សាសាងសង់ផ្លូវល្បឿនលឿន ភ្នំពេញ-សៀមរាប, សៀមរាប-ប៉ោយប៉ែត។
ឆ្លៀតក្នុងឱកាសនោះ លោក ទូហ្វី បានបង្ហាញការប្ដេជ្ញាចិត្តថា ក្រុមហ៊ុននឹងជំរុញការ សាងសង់ផ្លូវល្បឿនលឿនភ្នំពេញ-បាវិត ឱ្យបានលឿន តាមដែលអាចធ្វើទៅបាន និងបញ្ជូនក្រុមអ្នកបច្ចេកទេស មកធ្វើការសិក្សាផ្លូវល្បឿនលឿនភ្នំពេញ-សៀមរាប, សៀមរាប-ប៉ោយប៉ែត នៅក្នុងរយៈពេលដ៏ខ្លីខាងមុខនេះ។
សម្ដេចតេជោ បានសម្ដែងការរីករាយជាមួយវត្តមានរបស់ក្រុមហ៊ុន នៅកម្ពុជា ដែល មាន រយៈពេលជាង២០ឆ្នាំមកហើយ ហើយបានចូលរួមចំណែកក្នុងការកសាងហេដ្ឋារចនាសម្ព័ន្ធ បានយ៉ាងច្រើន។ ជាពិសេសថ្មីៗនេះ ការសាងសង់ផ្លូវល្បឿនលឿន ភ្នំពេញ-ក្រុងព្រះសីហនុ បានយ៉ាងជោគជ័យ៕