(ប៉េកាំង, ចិន)៖ ដូចទៅនឹងជំនួបជាមួយប្រធានាធិបតីចិន និងប្រធានសភាប្រជាជនចិនដែរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រាប់លោក លី ឈាង នាយករដ្ឋមន្ត្រីចិនថា រាជរដ្ឋាភិបាលកម្ពុជា នៅតែបន្តនយោបាយចិនតែមួយដោយឥតងាករេនោះឡើយ។
ដំណើរបំពេញទស្សនកិច្ចជាផ្លូវការលើកដំបូងនៅក្នុងប្រទេសចិន ក្រោយឡើងកាន់តំណែងជានាយករដ្ឋមន្ត្រីរបស់កម្ពុជា សម្តេចមហាបវរធិបតី ហ៊ុន ម៉ាណែត ទទួលបានការបដិសណ្ឋារកិច្ច និងស្វាគមន៍យ៉ាងកក់ក្តៅបំផុតសមភាគីរបស់សម្តេច គឺលោក លី ឈាង នាយករដ្ឋមន្ត្រីចិន។
រយៈពេលត្រឹមតែជាងមួយសប្តាហ៍ប៉ុណ្ណោះ សម្តេចមហាបវរធិបតី ហ៊ុន ម៉ាណែត និងលោក លី ឈាង បានជួបពិភាក្សាការងារជាមួយគ្នារហូតដល់ទៅពីរដង។ លើកទី១ត្រូវបានធ្វើឡើងកាលពីសប្តាហ៍ទី១នៃខែកញ្ញា ពេលអញ្ជើញចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនៅប្រទេសឥណ្ឌូនេស៊ី។ ការជួបគ្នាជាលើកទី២លើទឹកដីមិត្តចិន ធ្វើឱ្យសម្តេចធិបតី ហ៊ុន ម៉ាណែត និងលោក លី ឈាង មានភាពស្និទ្ធស្នាលគួរឱ្យកត់សម្គាល់។
លោកនាយករដ្ឋមន្ត្រីចិន បានវាយតម្លៃខ្ពស់ចំពោះសម្តេចធិបតី ហ៊ុន ម៉ាណែត ដែលបានជ្រើសយកប្រទេសចិន ជាប្រទេសទី១ សម្រាប់ការបំពេញទស្សនកិច្ចផ្លូវការ បន្ទាប់ពីចូលកាន់តំណែងជានាយករដ្ឋមន្ត្រីកម្ពុជា។ សម្រាប់លោកនាយករដ្ឋមន្ត្រីចិន ដំណើរទស្សនកិច្ចនេះ ជាការបង្ហាញឱ្យឃើញនូវមនោសញ្ចេតនា និងទំនាក់ទំនងដ៏ស៊ីជម្រៅ។
ក្រៅតែពីលើកឡើងនូវទំនាក់ទំនង និងកិច្ចសហប្រតិបត្តិការនានាហើយនោះ សម្តេចធិបតី ហ៊ុន ម៉ាណែត និងលោក លី ឈាង ក៏បានលើកបង្ហាញពីគោលនយោបាយទ្វេភាគី តំបន់ និងអន្តរជាតិផងដែរ។
សម្ដេចធិបតី ហ៊ុន ម៉ាណែត បានគូសបញ្ជាក់ថា រាជរដ្ឋាភិបាលកម្ពុជា ក្រោមការដឹកនាំរបស់សម្ដេចធិបតីផ្ទាល់នោះ គឺនៅតែបន្តរក្សាជំហរដដែល ជាពិសេសបន្តអនុវត្តនយោបាយចិនមួយយ៉ាងខ្ជាប់ខ្ជួន។ សម្តេចធិបតីនាយករដ្ឋមន្ត្រី បានបញ្ជាក់បន្ថែមថា កម្ពុជានៅតែបន្តគាំទ្រចិន ក្នុងក្របខ័ណ្ឌតំបន់ និងពិភពលោក ព្រមទាំងបន្តគាំទ្រនូវគំនិតផ្តួចផ្តើមនានារបស់ចិនផងដែរ។
បន្ថែមពីលើនេះ សម្ដេចធិបតី ហ៊ុន ម៉ាណែត ក៏បានប្រកាសគាំទ្រចំពោះការរៀបចំវេទិកាគំនិតផ្ដួចផ្ដើមខ្សែក្រវាត់ និងផ្លូវលើកទី៣ ហើយសម្តេចក៏បានបញ្ជាក់ពីការអញ្ជើញចូលរួមក្នុងវេទិកានោះនាខែតុលាខាងមុខផងដែរ។ បន្ថែមពីលើនេះ កម្ពុជាត្រៀមខ្លួនជាស្រេចក្នុងការបន្តអនុវត្តនូវគម្រោងដែលបានព្រមព្រៀងគ្នា និងខិតខំស្វែងរកនូវគម្រោងថ្មីៗបន្ថែមទៀត ដើម្បីអនុវត្តសម្រាប់ជាផលប្រយោជន៍ជូនប្រជាជនទាំងពីរឱ្យបានកាន់តែប្រសើរ។
សម្តេចធិបតី ហ៊ុន ម៉ាណែត និងលោក លី ឈាង បានឯកភាពគ្នាបន្តជំរុញកិច្ចសហប្រតិបត្តិការជាមួយគ្នា ហើយបន្តគាំទ្រគ្នា ព្រមទាំងជួយជ្រោមជ្រែងគ្នាទៅវិញទៅមក ក្នុងក្របខ័ណ្ឌតំបន់ និងសកលលោក។
សូមបញ្ជាក់ថា ក្នុងជំនួបជាមួយមេដឹកនាំចិន ទាំងប្រធានាធិបតី នាយករដ្ឋមន្ត្រី និងប្រធានសភា សម្តេចធិបតី ហ៊ុន ម៉ាណែត សុទ្ធតែបានបង្ហាញជំហរនយោបាយកម្ពុជាដោយរក្សានយោបាយចិនតែមួយខ្ជាប់ខ្ជួនឥតប្រែប្រួលនោះឡើយ៕
