(កំពង់ធំ)៖ លោក ខាន់ ខុន អនុរដ្ឋលេខាធិការ ក្រសួងធម្មការ និងសាសនា តំណាង លោកបណ្ឌិត ចាយ បូរិន រដ្ឋមន្ត្រីក្រសួងធម្មការ និងសាសនា នៅថ្ងៃអាទិត្យ ទី២៤ ខែកញ្ញា ឆ្នាំ២០២៣ បានអញ្ជើញចែកអំណោយ ជាសម្ភារគ្រឿងឧបភោគ បរិភោគចំនួន ៥០គ្រួសារ និង កង់ចំនួន១១ ដល់កុមារកំព្រា និងក្រីក្រ នៅភូមិពោធិបាក់ក សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ។
ការចែកអំណោយ មានការចូលរួមពីលោកស្រី ខឹម បុប្ផា ប្រធានប្រតិបត្តិ សមាគមបេសកកម្មដំណឹងល្អ និងជានាយិកា មហ៊ុនប៊ីម៉ារៀលអ៉ីស្ទេត ឯ.ក និងសហការី ព្រមទាំងលោក កែវ វុឌ្ឍី អនុប្រធានមន្ទីរធម្មការ និងសាសនា ខេត្តកំពង់ធំ និងសហការី និងអាជ្ញាធរមូលដ្ឋាន។
ចំពោះការចែកអំណោយ ក្នុងមួយគ្រួសារ ទទួលបានអង្ករ ចំនួន១០ គីឡូក្រាម មី១កេះ ត្រីខ ១យួរ និងទឹកត្រី ១យួរ ហើយនេះជាអំណោយរបស់ សមាគមបេសកកម្មដំណឹងល្អ តាមរយៈក្រសួងធម្មការ និងសាសនា។
នៅក្នុងពិធីសំណេះសំណាលសួរសុខទុក្ខ ជាមួយប្រជាពលរដ្ឋ លោកអនុរដ្ឋលេខាធិការ បាននាំក្ដីនឹករលឹក គោរពស្រលាញ់របស់ លោកបណ្ឌិត ចាយ បូរិន រដ្ឋមន្រ្តី ក្រសួងធម្មការ និងសាសនា ពីការដឹកនាំ ការគោរពស្រលាញ់គ្នា ទៅវិញទៅមក ដោយរួមរស់ក្នុងម្លប់សន្តិភាព នូវស្នាមញញឹម និងភាពរីករាយ ដោយមិនប្រកាន់ពូជសាសន៍ សាសនា ឬនិន្នាការនយោបាយអ្វីឡើយ ពីព្រោះយើង គឺជា ខ្មែរ យើងគឺតែមួយ ហើយអ្វីដែលយើងធ្វើ សុទ្ធតែដើម្បីប្រទេសជាតិ និងការអភិវឌ្ឍ ដោយរក្សានូវការរួមសាម្គីភាព ។
ជាពិសេស គឺគោរពតាម គោលនយោបាយរបស់ គណៈបក្សប្រជាជនកម្ពុជា ដែលមាន សម្ដេចអគ្គមហាសេនាបតីតេជោ ហ៊ុន សែន ប្រធានគណបក្ស ដែលជានិច្ចជាកាលតែងតែ ណែនាំដល់មន្រ្តីគ្រប់រូប គឺត្រូវចុះ សំណេះសំណាលសួរសុខទុក្ខ និងជួយឲ្យបានទាន់ពេល ដែលជាភាពចាំបាច់ របស់ប្រជាជនក្នុងសហគមន៍ ក្រោមដំបូលសុខសន្តិភាព ស្ថិរភាពនយោបាយ នៅកម្ពុជា និងការធានា របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការដឹកនាំ កែសម្រួល ធ្វើយ៉ាងណា ដើម្បីបម្រើដល់សេចក្ដីត្រូវការជាក់ស្ដែង របស់ប្រជាជននៅតាមមូលដ្ឋាន។
សូមជម្រាបថា សមាគមបេសកកម្មដំណឹងល្អ ជាសមាគមរបស់គ្រីស្ទសាសនិក ក្នុងប្រទេស និងក្រៅប្រទេស ដែលចូលរួមគ្នាបរិច្ចាគ ជាថវិកា នឹងការអធិដ្ឋាន ដើម្បីចូលរួមជួយដល់ប្រជាជន តាមសហគមន៍និមួយៗ ដែលមិនទាន់មានទឹកស្អាតប្រើប្រាស់ ហើយខ្វះខាតទឹក ប្រើនៅរដូវប្រាំង និង ចែកអំណោយ សម្រាបចាស់ជរា ស្ត្រីមេម៉ាយ និងអ្នកងាយរងគ្រោះផ្សេងៗ ៕
