(ភ្នំពេញ)៖ រឿងប្រជាធិបតេយ្យ និងសិទ្ធិមនុស្សនៅកម្ពុជា គឺជារឿងមួយដែលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងទាំងក្នុងជំនួបជាមួយអគ្គលេខាធិការអង្គការសហប្រជាជាតិ, អនុរដ្ឋមន្ត្រីស្តីទីក្រសួងការបរទេសអាមេរិក និងរដ្ឋមន្ត្រីការបរទេសអូស្ត្រាលី។
រឿងប្រជាធិបតេយ្យ និងសិទ្ធិមនុស្សនៅកម្ពុជា តែងតែមានការយល់ឃើញខុសគ្នារវាងរាជរដ្ឋាភិបាលកម្ពុជា និងភ្នាក់ងារអង្គការសហប្រជាជាតិ ក៏ដូចជាសហរដ្ឋអាមេរិក និងអូស្ត្រាលីផងដែរ។
ក្នុងឱកាសអញ្ជើញចូលរួមមហាសន្និបាតលើកទី៧៨ របស់អង្គការសហប្រជាជាតិនៅញូវយ៉ក សហរដ្ឋអាមេរិក សម្តេចធិបតី ហ៊ុន ម៉ាណែត ក៏បានជួបពិភាក្សាការងារជាមួយលោក អង់តូនីញ៉ូ ហ្គូទែរ៉េស អគ្គលេខាធិការអង្គការសហប្រជាជាតិ, លោកស្រី វិកតូរីយ៉ា នូឡែន (Victoria Nuland) អនុរដ្ឋមន្ត្រីស្តីទីក្រសួងការបរទេសអាមេរិក និងលោកស្រី ផេននី វ័ង រដ្ឋមន្ត្រីការបរទេសអូស្ត្រាលីផងដែរ។
ក្នុងសន្និសីទសារព័ត៌មានពេលសម្តេចធិបតី ហ៊ុន ម៉ាណែត អញ្ជើញដល់កម្ពុជាវិញនៅព្រឹកថ្ងៃទី២៥ ខែកញ្ញា ឆ្នាំ២០២៣នេះ លោក ហ្សង់-ហ្វ្រង់ស័រ បានឱ្យដឹងថា ក្នុងជំនួបទាំងនោះពេលចាប់ផ្តើមហាក់មានចោទប្រកាន់កម្ពុជា។ ប៉ុន្តែក្រោយស្តាប់ការពន្យល់របស់ម្តេចធិបតី ពួកគេបានបន្ទន់ឥរិយាបថ។
លោក ហ្សង់-ហ្វ្រង់ស័រ បានបញ្ជាក់យ៉ាងដូច្នេះ «ជាទូទៅដើមដំបូង ពួកគាត់ដូចជា សឹងថាប្រើសម្តីថ្លៃថ្នូរមែនពិត ប៉ុន្តែមានលក្ខណៈចោទប្រកាន់។ ប៉ុន្តែក្រោយពីស្តាប់ការពន្យល់យ៉ាងបរិបូរណ៍ និងយ៉ាងលំអិតពីសំណាក់សម្តេចមហាបវរធិបតី ហ៊ុន ម៉ាណែត រួចមក ខ្ញុំមិនអាចនិយាយថាគាត់ទទួលទាំងស្រុងទេ ក៏ប៉ុន្តែជំហររបស់ពួកគាត់ ត្រូវបានបន្ទន់បន្តិច ក្រោយបានស្តាប់ការពន្យល់លំអិតពីសំណាក់សម្តេចមហាបវរធិបតី ហ៊ុន ម៉ាណែត»។
សូមរំលឹកថា បើតាមការផ្សព្វផ្សាយលើបណ្តាញសង្គមរបស់សម្តេចធិបតី ហ៊ុន ម៉ាណែត បានគូសរំលេចថា ក្នុងជំនួបជាមួយអគ្គលេខាធិការអង្គការសហប្រជាជាតិនៅថ្ងៃទី២២ ខែកញ្ញា បន្ទាប់ពីបានស្តាប់ការពន្យល់របស់សម្តេចធិបតី ពាក់ព័ន្ធបញ្ហាប្រជាធិបតេយ្យ និងសិទ្ធិមនុស្សនេះទៅ លោកអគ្គលេខាធិការអង្គការសហប្រជាជាតិ បង្ហាញការពេញចិត្ត ហើយបញ្ជាក់ថា អង្គការសហប្រជាជាតិនៅតែបន្តដល់កម្មវិធីអភិវឌ្ឍន៍របស់កម្ពុជា។
បន្ថែមពីលើនេះក្នុងសុន្ទរកថា ថ្លែងក្នុងមហាសន្និបាតលើកទី៧៨ របស់អង្គការសហប្រជាជាតិ នៅថ្ងៃទី២២ ខែកញ្ញា ឆ្នាំ២០២៣ សម្ដេចមហាបវរធិបតី ហ៊ុន ម៉ាណែត ក៏បានគូសបញ្ជាក់ផងដែរ អំពីភាពចាស់ទុំខាងនយោបាយនៅក្នុងប្រទេសកម្ពុជា និងភាពភ្លៀវក្លារបស់ប្រជាជនកម្ពុជា ក្នុងការអនុវត្តសិទ្ធិប្រជាធិបតេយ្យ។
សម្ដេចធិបតី ហ៊ុន ម៉ាណែត បានគូសបញ្ជាក់ថា ដំណើរការកសាងលទ្ធិប្រជាធិបតេយ្យនៅកម្ពុជា ក៏មានការរីកចម្រើនជាលំដាប់ កាលពីខែកក្កដា ឆ្នាំនេះ កម្ពុជាបានរៀបចំការបោះឆ្នោតសកលប្រកបដោយជោគជ័យ ដោយមានគណបក្សនយោបាយចំនួន១៨ចូលរួមប្រកួតប្រជែង ប្រជាជនជាង ៨.២លាននាក់បានទៅបោះឆ្នោត ស្មើនឹងអត្រាអ្នកទៅបោះឆ្នោត ៨៤.៥៩ភាគរយ ដែលជាអត្រាខ្ពស់បំផុតចាប់តាំងពីការបោះឆ្នោត ដែលរៀបចំដោយអង្គការសហប្រជាជាតិក្នុងឆ្នាំ១៩៩៣។
បើតាមប្រសាសន៍របស់សម្ដេចធិបតី នាយករដ្ឋមន្ដ្រី, ការបោះឆ្នោតនេះត្រូវបានវាយតម្លៃយ៉ាងទូលំទូលាយថា សេរី និងយុត្តិធម៌ និងអាចទុកចិត្តបាន ដោយអ្នកសង្កេតការណ៍រាប់ពាន់នាក់ បូករួមទាំងអ្នកសង្កេតការណ៍អន្ដរជាតិ ៣៣៣នាក់ មកពីប្រទេសចំនួន៦៥៕
