(ព្រៃវែង)៖ លោក សួន សុម៉ាលីន អភិបាលខេត្តព្រៃវែង បានថ្លែងជំរុញមន្ទីរអង្គភាព រដ្ឋបាលក្រុង ស្រុក អង្គភាពពាក់ព័ន្ធទាំងអស់ ត្រូវបន្តខិតខំយកចិត្តទុកដាក់អនុវត្តតួនាទីភារកិច្ចរបស់ខ្លួនឲ្យកាន់តែល្អប្រសើរឡើងបន្ថែមទៀត ធ្វើយ៉ាងណាដើម្បីឲ្យការងារបម្រើសេវាសាធារណៈជូនប្រជាពលរដ្ឋឲ្យបានល្អប្រសើរស្របតាមយុទ្ធសាស្រ្តចក្ខុវិស័យ របស់រាជរដ្ឋាភិបាលដែលបានដាក់ចេញ។
លោក សួន សុម៉ាលីន បានលើកឡើងយ៉ាងដូចនេះនារសៀលថ្ងៃទី៥ ខែធ្នូ ឆ្នាំ២០២៣ នៅសាលាខេត្តព្រៃវែង នាឱកាសដែលលោកដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្តព្រៃវែង ដោយមានការចូលរួមពីលោក លោកស្រីអភិបាលរងខេត្ត ប្រធានសាលាដំបូងខេត្ត ព្រះរាជអាជ្ញានៃអយ្យការអមសាលាដំបូងខេត្ត លោកនាយក នាយករងរដ្ឋបាលសាលាខេត្ត លោកមេបញ្ជាការកងកម្លាំងទាំងបី លោក លោកស្រីប្រធានមន្ទីរ-អង្គភាពជុំវិញខេត្ត លោក លោកស្រីអភិបាលក្រុង ស្រុក ប្រធានច្រកទ្វារទាំង៦ គយនិងអន្តោប្រវេសន៍ព្រំដែន ក្រុមមេធាវីប្រចាំរដ្ឋបាលខេត្ត និងមន្រ្តីរាជការជាច្រើនរូបទៀត សរុបប្រមាណចំនួន១០០រូប។
លោក សួន សុម៉ាលីន បន្ថែមទៀតថា នៅក្នុងកិច្ចប្រជុំនោះដែរមន្ទីរអង្គភាព រដ្ឋបាល ក្រុង ស្រុក កងកម្លាំងទាំងបី បានលើកឡើងអំពីផែនការសកម្មភាពរបស់ខ្លួនដែលអនុវត្តកន្លងមក ដើម្បីបង្ហាញអំពី លទ្ធផលដែលខ្លួនបានអនុវត្តមកនោះជូនគណៈអធិបតីដើម្បីធ្វើការពិនិត្យ និងដាក់ផែនការសកម្មភាពបន្ថែមទៀតដល់មន្ទីរអង្គភាព រដ្ឋបាលក្រុង ស្រុក កងកម្លាំងទាំងបី អង្គភាពពាក់ព័ន្ធ ដើម្បីអនុវត្តបន្តរទៀត។
លោកអភិបាលខេត្ត ក៏បានស្នើរដល់រដ្ឋបាល ក្រុង ស្រុក ទាំងអស់ត្រូវពង្រឹងអនុវត្តនូវគោលនយោបាយ ភូមិ ឃុំ មានសុវត្ថិភាពឲ្យមានប្រសិទ្ធភាព ដើម្បីធានាសុខសុវត្ថិភាពជូនប្រជាពលរដ្ឋនៅតាមមូលដ្ឋានប្រកបដោយសុវត្ថិភាពខ្ពស់។
លោក សួន សុម៉ាលីន ក៏បានណែនាំដល់លោក អភិបាលរងខេត្តដើម្បីដឹកនាំរៀបចំគណៈកម្មការដើម្បីបង្កើតនូវផ្សាររាត្រី ក៏ដូចជាផ្សារចុងសប្តាហ៍ដើម្បីលក់នៅផលិតផលផ្សេងៗទៅតាមស្ដូកដែលយើងមានស្រាប់ តែនេះក៏ជាការបង្កើននូវប្រាក់ចំណូលបន្ថែមដល់បងប្អូនអាជីវករមួយកម្រិតទៀតសម្រាប់ដាក់លក់នៅផលិតផលរបស់គាត់ នៅពេលរាត្រីដល់ប្រជាពលរដ្ឋក្មេងចាស់ប្រុសស្រី ឬអ្នកមកពីបណ្ដាលខេត្តផ្សេងៗសម្រាកស្នាក់នៅក្នុងខេត្តយើងនេះអាចដើរទិញនៅផលិតផលទាំងអស់នោះនៅពេលរាត្រីបានផងដែរ៕
