(សៀមរាប)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃទី៨ ខែធ្នូ ឆ្នាំ២០២៣នេះ បានថ្លែងបញ្ជាក់ថា តំបន់រមណីយដ្ឋានអង្គរ នឹងត្រូវដកចេញពីបញ្ជីសម្បត្តិបេតិកភណ្ឌពិភពលោក បើមិនគោរពតាមលក្ខខណ្ឌបច្ចេកទេស ដែលកំណត់របស់អង្គការយូរណេស្កូ ដូច្នេះយើងត្រូវរួមគ្នាថែរក្សាកេរ្តិ៍ដំណែល ដែលដូនតាបន្សល់ទុកឱ្យរាប់ពាន់ឆ្នាំមកនេះ ឱ្យបន្តនៅរាប់ពាន់ឆ្នាំបន្តទៀត ដើម្បីកូនចៅជំនាន់ក្រោយ។
សម្តេចបានថ្លែងទៀតថា មានប្រទេសមួយចំនួន នៅលើពិភពលោក ដែលបានដាក់សម្បត្តិបេតិកភណ្ឌរបស់ខ្លួន ទៅក្នុងបញ្ជីសម្បត្តិបេតិកភណ្ឌពិភពលោក របស់អង្គការយូណេស្កូ ប៉ុន្តែមិនគោរពតាមលក្ខខណ្ឌកំណត់ ត្រូវបានអង្គការនេះ ដកសម្បត្តិបេតិកភណ្ឌទាំងនោះ ចេញពីបញ្ជីបេតិកភណ្ឌពិភពលោក មិនថាប្រទេសនោះជឿនលឿនប៉ុណ្ណានោះទេ។ សម្រាប់កម្ពុជាយើង មិនចង់ឃើញដូច្នេះទេ គឺចង់ឱ្យប្រាសាទរបស់យើង ទទួលបានការថែទាំ ដើម្បីរក្សាបានរាប់ពាន់ឆ្នាំតទៅទៀត។
សម្តេចបន្ថែមថា ការស្ម័គ្រចិត្តរបស់ប្រជាពលរដ្ឋផ្លាស់ទីលំនៅ ពីតំបន់រមណីយដ្ឋានអង្គរ មកភូមិធម្មជាតិរុនតាឯក និងពាក់ស្នែង គឺជាកិច្ចការដ៏សំខាន់ ដើម្បីគោរពតាមលក្ខខណ្ឌបច្ចេកទេស របស់អង្គការយូណេស្កូ។
ការថ្លែងរបស់សម្តេចនាយករដ្ឋមន្ត្រី ធ្វើឡើងក្នុងឱកាសអញ្ជើញសំណេះសំណាល ជាមួយប្រជាពលរដ្ឋរស់នៅភូមិរុនតាឯក និងពាក់ស្នែងជិត ៣ពាន់នាក់ នាព្រឹកថ្ងៃទី៨ ខែធ្នូ ២០២៣។
សម្តេចធិបតី ហ៊ុន ម៉ាណែត បានថ្លែងដូច្នេះថា «ប្រាសាទយើងមានអាយុកាល ១២០០ឆ្នាំ ត្រូវធានា និងថែរក្សាឱ្យបានរាប់ពាន់ឆ្នាំទៅទៀត។ ខ្ញុំថាមនុស្សម្នាក់ៗ បានអាយុ ១៥០ឆ្នាំចុះសប្បាយចិត្តហើយ តែព្រលឹងជាតិរបស់យើង ជាតិរបស់យើង ត្រូវនៅរាប់ពាន់ឆ្នាំ ប្រាសាទដែលជាកេរ្តិ៍ដំណែលរបស់ដូនតាយើង ដែលកសាងជាង១ពាន់ឆ្នាំហើយ ត្រូវនៅបន្តទៀត នេះជាអ្វីដែលយើងត្រូវថែរក្សា»។
សម្តេចបានបន្ថែមថា «បើយើងមិនទទួលអនុវត្តន៍តាមលក្ខខណ្ឌរបស់យូណេស្កូ តំបន់ប្រាសាទទាំងមូល អាចត្រូវបានដកចេញ ពីបញ្ជីនៃបេតិកភណ្ឌពិភពលោក ប្រទេសមួយចំនួនត្រូវបានដកចេញ ដោយសារមិនគោរពលក្ខខណ្ឌ នៅអង់គ្លេស នៅប្រទេសផ្សេងៗទៀត។ និមិត្តរូបនៃជាតិយើង ដែលក្លាយជាសម្បត្តិវប្បធម៌មនុស្សលោក ដាក់ក្នុងបញ្ជីបេតិកភណ្ឌពិភពលោក ត្រូវបានដកចេញ ដោយសារមិនអាចធានាបាន នូវលក្ខខណ្ឌបរិស្ថានមួយចំនួន ជាការសោកស្តាយ បុព្វបុរសយើងខំកសាង៤០០ឆ្នាំ ទុកឱ្យកូនចៅជំនាន់ក្រោយ រួមគ្នាថែទាំមិនបាន តើយ៉ាងម៉េច? អីចឹងហើយបានជាយើងត្រូវចាត់វិធានការមួយចំនួន ដើម្បីការពារ»។
សូមជម្រាបថា ប្រាសាទអង្គរត្រូវបានចុះបញ្ចូល ក្នុងបញ្ជីសម្បត្តិបេតិកភណ្ឌពិភពលោក របស់អង្គការយូណេស្កូ នៅថ្ងៃទី១៤ ខែធ្នូ ឆ្នាំ ១៩៩២ នាទីក្រុងសាន់តាហ្វេសហរដ្ឋ អាមេរិក។
ដើម្បីបំពេញតាមលក្ខខណ្ឌអង្គការយូណេស្កូ ជាពិសេសការពារតម្លៃជាសកលនៃរមណីយដ្ឋានអង្គរ បន្តស្ថិតក្នុងបញ្ជីបេតិកភណ្ឌពិភពលោក រាជរដ្ឋាភិបាលបង្កើតឡើងបានបង្កើតភូមិធម្មជាតិរុនតាឯក ស្ថិតនៅក្នុងឃុំរុនតាឯក ស្រុកបន្ទាយស្រី និងតំបន់ពាក់ស្នែង ស្ថិតស្ថិតនៅក្នុងឃុំពាក់ស្នែង ស្រុកអង្គរធំ ខេត្តសៀមរាប សម្រាប់ប្រជាពលរដ្ឋដែលផ្លាស់ចេញពីតំបន់រមណីយដ្ឋានអង្គរ។
បច្ចុប្បន្ននេះ ប្រជាពលរដ្ឋស្ម័ត្រចិត្តប្តូរទីលំនៅចេញ ពីតំបន់រមណីយដ្ឋានអង្គរ ទៅរស់នៅតំបន់អភិវឌ្ឍន៍រុនតាឯកមានចំនួន ៥,៨៦៥គ្រួសារ និងតំបន់អភិវឌ្ឍន៍ពាក់ស្នែងចំនួន ៤,០៣២គ្រួសារ៕
