(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅថ្ងៃទី២១ ខែកុម្ភៈ ឆ្នាំ២០២៤នេះ បានលើកឡើងថា សម្តេចមិនចង់ឲ្យរដ្ឋក្លាយជាអ្នកចង្អុល ឬដឹកមុខវិស័យឯកជននោះទេ គឺចង់ឃើញរដ្ឋ និងវិស័យឯកជនសហការគ្នា ដើម្បីពង្រឹងសមត្ថភាព និងដើរបានវែងឆ្ងាយ។
ការលើកឡើងបែបនេះ ធ្វើឡើងក្នុងឱកាសដែល សម្តេចធិបតី ហ៊ុន ម៉ាណែត អញ្ជើញជាអធិបតី បិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ នារសៀលថ្ងៃទី២១ ខែកុម្ភៈ ឆ្នាំ២០២៤នេះ។
សម្តេចធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «វិស័យឯកជនសូមចូលរួម ព្រោះរដ្ឋមិនចង់ដើរតួនាទី ជាអ្នកចង្អុលនោះទេ ខ្ញុំចង់ឲ្យតែរដ្ឋដកខ្លួនថយ ឲ្យបានកាន់តែច្រើន ទុកឲ្យឯកជន ចូលរួមគិត ចូលរួមដឹកនាំអនុវត្ដតែម្ដង នៅក្នុងការធ្វើ»។
សម្តេចធិបតី ហ៊ុន ម៉ាណែត បានបញ្ជាក់ទៀតថា ភាពជាដៃគូរវាងរដ្ឋ និងវិស័យឯកជន មិនមែនត្រឹមតែរួមគ្នាគិតនោះទេ គឺរួមគ្នាធ្វើ ហើយរួមគ្នាទទួលខុសត្រូវ។
បន្ថែមពីនោះទៀត សម្តេចធិបតី ហ៊ុន ម៉ាណែត បានលើកឡើងថា អ្វីដែលរដ្ឋអាចជួយ គ្រាន់តែបង្កើតយុទ្ធការ ជួយសម្របសម្រួល ផ្ដល់គោលការណ៍មួយចំនួន ប៉ុន្ដែវិស័យឯកជន គឺជាអ្នកមកជាមួយគ្នា គិតគូរជាមួយគ្នា លើកយោលបល់មករដ្ឋ ហើយរដ្ឋឯកភាព ហើយរួមគ្នាអនុវត្ដ។
សម្តេចធិបតី ហ៊ុន ម៉ាណែត បានថ្លែងថា «គោលការណ៍បែបនេះ ខ្ញុំគិតថា មានតែវិធីសាស្ដ្រហ្នឹងទេ ទើបយើងអាចជោគជ័យ ហើយធានានូវភាពប្រកួតប្រជែងរបស់យើងរយៈពេលវែង ព្រោះថា ធនធានយើងតិចណាស់ ប៉ុន្ដែផ្គុំគ្នា គឺយើងធ្វើបាន»។
ជាមួយគ្នានេះ សម្តេចធិបតី ហ៊ុន ម៉ាណែត ក៏បានលើកទឹកចិត្ត ដល់អ្នកសេដ្ឋកិច្ចក្រៅប្រព័ន្ធ ឲ្យចូលក្នុងប្រព័ន្ធផងដែរ។ សម្ដេចបានថ្លែងថា ប្រទេសយើងតូច តែបើយើងរួមគ្នា ជាពិសេសរួមគ្នារវាងវិស័យឯកជន និងរាជរដ្ឋាភិបាល នឹងក្លាយទៅជាកម្លាំងធំណាស់៕
