(ភ្នំពេញ)៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានរំលឹកថា មានការផ្តួចផ្តើមគំនិតហាមមិនឱ្យនាំរថយន្តចាស់ចូលប្រទេស តែសម្តេចច្រានចោល ហើយរដ្ឋាភិបាលគ្មានគោលការណ៍ហាមប្រជាពលដ្ឋមិនឱ្យទិញរថយន្តច្រើននោះទេ គឺរដ្ឋមានតែខិតខំដោះស្រាយបញ្ហាគមនាគមន៍ឱ្យបានល្អជូនប្រជាពលរដ្ឋ ដើម្បីជៀសវាងការកកស្ទះ។
ការរំលឹករបស់សម្ដេចធិបតី ហ៊ុន ម៉ាណែត ពាក់ព័ន្ធនឹងការហាមនាំចូលរថយន្តចាស់មកកម្ពុជា បានធ្វើក្រោយមានការស្នើសុំលើការកំណត់ឆ្នាំ នៃការនាំចូលរថយន្តពីបរទេស។
ការរំលឹកឱ្យដឹងបែបនេះរបស់សម្តេចធិបតី ហ៊ុន ម៉ាណែត បានធ្វើឡើងនៅព្រឹកថ្ងៃទី១៧ ខែមិថុនា ឆ្នាំ២០២៤នេះ ក្នុងឱកាសដែលសម្តេចបានអញ្ជើញជាអធបិតភាពក្នុងពិធីបើកការដ្ឋានសាងសង់ស្ពានអាកាសភ្លោះ ស្ថិតនៅចំណុចប្រសព្វមហាវិថី «សម្តេចតេជោ ហ៊ុន សែន» និងផ្លូវជាតិលេខ២ ព្រំប្រទល់រវាងរាជធានីភ្នំពេញ និងខេត្តកណ្តាល។
សម្តេចធិបតី ហ៊ុន ម៉ាណែត បានរំលឹកយ៉ាងដូច្នេះថា៖ «ថ្ងៃមុនក៏មានការគិតគូរអំពីនាំចូលរថយន្តកំណត់ឆ្នាំ ខ្ញុំថាកុំអី ត្រូវពង្រឹងការត្រួតពិនិត្យប្រព័ន្ធឆែកបច្ចេកទេសយើងឱ្យមាំវិញ មានការប្រជុំគិតគូរពីបរិស្ថាន អ៊ឹចឹងក៏មានការស្នើសុំថាគួរតែហាមមិនឱ្យនាំចូលរថយន្តដែលលើសអាយុ ១០ឆ្នាំ ឆ្នាំ២០៣០ ហាមមិនឱ្យនាំចូលយករយន្តអាយុ ៥ឆ្នាំ ដើម្បីថារថយន្តល្អ និងកុំឱ្យខូចបរិស្ថាន ខ្ញុំថាដកចោលទៅ»។
ជាមួយគ្នានេះដែរ សម្ដេចធិបតី ហ៊ុន ម៉ាណែត បានប្រកាសអនុញ្ញាតឱ្យនាំចូលរថយន្តពីបរទេសដោយមិនកំណត់ឆ្នាំ តែត្រូវពង្រឹងការត្រួតពិនិត្យលើប្រព័ន្ធបច្ចេកទេសរថយន្តឱ្យបានត្រឹមត្រូវ។
ត្រង់ចំណុចនេះ សម្ដេចធិបតី ហ៊ុន ម៉ាណែត បានលើកឡើងថា ដំបូងឡើយក្រុមការងារអន្តរក្រសួង គ្រោងស្នើឱ្យកំណត់ឆ្នាំ ដោយហាមមិនឱ្យនាំចូល រថយន្តចាស់ចូលមកកម្ពុជាមិនឱ្យលើសអាយុ១០ឆ្នាំ ដើម្បីធានាដល់បរិស្ថាន ក៏ដូចជាបញ្ចៀសការនាំរថយន្តចាស់ៗចូល មកប្រើប្រាស់នៅក្នុងប្រទេសកម្ពុជា។ ប៉ុន្តែសំណើរនេះ ត្រូវបានសម្ដេចបដិសេធ។
សម្ដេចធិបតី ហ៊ុន ម៉ាណែត បានគូសបញ្ជាក់បន្ថែមថា៖ «ខ្ញុំយល់ពីការថែទាំបរិស្ថាន យើងមិនចង់ឱ្យយករថយន្តដែលចាស់យកមកពិបាក ខុសបច្ចេកទេស អាចគ្រោះថ្នាក់ កាត់អីផ្សេងៗ។ អ៊ីចឹងខ្ញុំថា មិនបាច់ដាក់កំណត់ឆ្នាំទេ ប៉ុន្តែពង្រឹងការត្រួតពិនិត្យបច្ចេកទេសរថយន្តឱ្យបានច្បាស់ នេះទើបត្រឹមត្រូវ ហើយយើងធ្វើបែបហ្នឹងទៅ»។
បន្ថែមពីនេះ សម្តេចធិបតី ហ៊ុន ម៉ាណែត ក៏បានប្រកាសអនុញ្ញាតឱ្យនាំចូលរថយន្តពីបរទេសដោយមិនកំណត់ឆ្នាំ តែត្រូវពង្រឹងការត្រួតពិនិត្យលើប្រព័ន្ធបច្ចេកទេសរថយន្តឱ្យបានត្រឹមត្រូវ។ រាជរដ្ឋាភិបាលលើកទឹកចិត្តដល់រោងចក្រផលិតរថយន្តនៅក្នុងស្រុក ហើយក៏ជំរុញឱ្យមានការប្រកួតប្រជែងក្នុងការនាំចូលរថយន្តមួយទឹកពីបរទេសចូលមកប្រើប្រាស់នៅក្នុងប្រទេសផងដែរ ជាពិសេសការធានាតម្លៃសមរម្យ ដើម្បីអនុញ្ញាតឱ្យប្រជាពលរដ្ឋអាចទិញរថយន្តទាំងនោះមកប្រើប្រាស់បាន។
ប្រមុខនៃរាជរដ្ឋាភិបាលកម្ពុជា ក៏បានបញ្ជាក់ថា នៅកម្ពុជា មិនមានការហាមឃាត់ដោយកំណត់តាមគ្រួសារនីមួយត្រូវប្រើប្រាស់រថយន្តប៉ុន្មានគ្រឿងនោះដែរ។ សម្តេចធិបតី ក៏បានអំពាវនាវដល់វិស័យឯកជន វិនិយោគបន្ថែមទៅលើប្រព័ន្ធកន្លែងចតឡាន ជាពិសេសរថយន្តទំនើប ជាមួយរដ្ឋបាលរាជធានីភ្នំពេញ ព្រោះបច្ចុប្បន្ន រាជធានីភ្នំពេញ កំពុងជួបបញ្ហាប្រឈម កង្វះចំណតរថយន្ត៕
