(ភ្នំពេញ)៖ ឆ្លើយតបការអំពាវនាវរបស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ដែលបានស្នើឱ្យប្រជាពលរដ្ឋ និងមន្ត្រីរាជការ ងាកមកប្រើប្រាស់បណ្តាញទំនាក់ទំនង CoolApp របស់ខ្មែរ ក្នុងសកម្មភាពការងារប្រចាំថ្ងៃនោះ, នាយឧត្តមសេនីយ៍ ស ថេត អគ្គស្នងការនគរបាលជាតិ បានណែនាំដល់កងកម្លាំងនគរបាលទាំងអស់នៅទូទាំងប្រទេស ធ្វើការដំឡើង (Download) បណ្តាញទំនាក់ទំនង CoolApp សម្រាប់សកម្មភាពទំនាក់ទំនងការងារប្រចាំថ្ងៃ។

នាយឧត្តមសេនីយ៍ ស ថេត បានលើកឡើងថា «ដើម្បីលើកទឹកចិត្តដល់កូនខ្មែរ ដែលមានសមត្ថភាពខិតខំស្រាវជ្រាវ បង្កើត CoolApp នេះ អគ្គស្នងការដ្ឋាននគរបាលជាតិ សូមធ្វើការអំពាវនាវដល់គ្រប់អង្គភាពចំណុះអគ្គស្នងការនគរបាលជាតិ គ្រប់អង្គភាពស្នងការរាជធានីខេត្តទាំងអស់ ពិសេសមន្ត្រីនគរបាលជាតិទាំងមូល ងាកមកប្រើប្រព័ន្ធ CoolApp ដើម្បីជាការទំនាក់ទំនងការងារប្រចាំថ្ងៃ»។

នាយឧត្តមសេនីយ៍បញ្ជាក់ថា ប្រព័ន្ធទំនាក់ទំនង CoolApp មានសុវត្ថិភាពខ្ពស់ គ្មាននរណាម្នាក់មកលួចស្តាប់ ឬក៏យកខ្លឹមសារឯកសារទំនាក់ទំនងតាមប្រព័ន្ធនេះបានទេ។

សូមជម្រាបថា កាលពីរាត្រីថ្ងៃអាទិត្យ ទី២៣ ខែមិថុនា ឆ្នាំ២០២៤ សម្តេចតេជោ ហ៊ុន សែន ប្រធានព្រឹទ្ធសភា និងអតីតនាយករដ្ឋមន្រ្តីកម្ពុជា ប្រកាសតាមរយៈបណ្តាញសង្គម Facebook ផ្លូវការរបស់សម្តេចដោយ អំពាវនាវឲ្យមន្រ្តីរាជការ និងប្រជាពលរដ្ឋខ្មែរ ប្រើប្រាស់កម្មវិធី CoolApp លើកទឹកចិត្តស្នាដៃកូនខ្មែរ និងដើម្បីសម្រាប់សុវត្ថិភាពសន្តិសុខជាតិ។

សារដ៏ពិសេសរបស់ សម្តេចតេជោ ហ៊ុន សែន បានរៀបរាប់នូវខ្លឹមសារដូចតទៅ៖

ប៉ុន្មានថ្ងៃមកនេះ ខ្ញុំបានសាកល្បងប្រើកម្មវិធី CoolApp ដែលកូនខ្មែរបានផលិត និងដាក់ឲ្យប្រើប្រាស់ដែលមានខ្ញុំជាអ្នកអំពាវនាវឲ្យប្រើប្រាស់ផងដែរ។
គោលដៅរបស់ខ្ញុំក្រៅពីលើកទឹកចិត្តឲ្យកូនខ្មែរចេះស្រាវជ្រាវបច្ចេកទេសវិទ្យាសាស្ត្រ ក្លាយជាផលិតផលខ្មែរ អ្វីដែលខ្ញុំត្រូវគិតគឺសុវត្តិភាព
សម្រាប់សន្តិសុខជាតិ ដែលបរទេសពិបាកជ្រៀតជ្រែកយកព័ត៌មានពីយើងបាន។ ប្រទេសគេមានប្រព័ន្ធទំនាក់ទំនងរបស់គេ ដូចជា Wechat របស់ចិន, Zalo របស់វៀតណាម, Kakao Talk របស់កូរ៉េខាងត្បូង, Telegram របស់រុស្ស៉ី ដូច្នេះកម្ពុជាយើងមាន CoolApp។

រឿងសំខាន់មួយទៀតគឺការធានាដល់ទំនាក់ទំនងក្នុងប្រទេសរបស់យើង ក្នុងករណីបណ្តាញទំនាក់ទំនងរបស់បរទេស ជួបការរអាក់រអួលដោយប្រការណាមួយ។ ដូចនេះមន្ត្រីរាជការស៉ីវិល និងកងកម្លាំងប្រដាប់គួរបង្កើតឲ្យមាន CoolApp ដើម្បីធានាម្ចាស់ការលើរក្សាការសម្ងាត់ផង និងការដាច់ទំនាក់ទំនងពីប្រព័ន្ធបរទេសផង។ CoolApp ប្រើប្រព័ន្ធរក្សាការសំងាត់បំផុត គឺប្រព័ន្ធ Encryption ដែលពុំអាចមើល ឬអានសាររបស់យើងទេ សូម្បីតែក្រុមហ៊ុន CoolApp ផ្ទាល់ក៏ដោយ។ យើងមិនបានហាមឃាត់ មិនឲ្យបងប្អូនឈប់ប្រើប្រព័ន្ធដែលធ្លាប់ប្រើនោះឡើយ។

សម្រាប់ខ្ញុំបាន និងកំពុងប្រើ៨ប្រពន្ធ័រាប់ទាំង CoolApp ថ្មីផង។ តើមានអ្វីប្លែកពីប្រព័ន្ធផ្សេងទេ? សម្រាប់ខ្ញុំបានបញ្ចូលទៅក្នុងទូរស័ព្ទ៦គ្រឿង និងសាកល្បងប្រើប្រាស់ឃើញមានភាពងាយស្រួលលើចំណុច៣គឺ៖

១. ងាយស្រួលបង្កើតដោយមិនពិបាករកលេខកូដពីកន្លែងផ្សេង ឬរង់ចាំយូរ។
២. បញ្ជូនសារជាអក្សរ រូបថត វីដេអូ និងសារសម្លេងបានលឿន។
៣. ហៅនិយាយឆ្លងឆ្លើយនិង Video call បានយ៉ាងច្បាស់ល្អ។
សរុបមកវាប្រើ Internet តិចជាងប្រពន្ធ័ផ្សេងទៀត។

ចំណុចនេះជាការសាកល្បងរបស់ខ្ញុំប៉ុណ្ណោះ បើបងប្អូនចង់សាកល្បងក៏សូមសាកល្បងមើលរាប់ទាំងប្អូន នៅក្រៅប្រទេស ព្រោះបងប្អូនមួយចំនួន បានប្រើប្រាស់ប្រព័ន្ធនេះ ជាមួយខ្ញុំរួចហើយ៕