(ភ្នំពេញ)៖ លោក នេត្រ ភក្ត្រា រដ្ឋមន្រ្តីក្រសួងព័ត៌មាន បានលើកទឹកចិត្តដល់ក្រសួងស្ថាប័នទាំងអស់សូមចូលរួមបង្កើតនូវក្លឹបកីឡាផ្សេងៗ ដើម្បីបង្កនូវបរិយាកាសងាយស្រួលសម្រាប់បុគ្គលិក និងមន្ត្រីរាជការរចូលរួមលេងកីឡា ដើម្បីសុខភាព រឹតចំណងមិត្តភាព និងផ្លាស់ប្តូរនូវបរិយាកាសក្នុងការបង្កើននូវប្រសិទ្ធភាពការងារ និងដាក់ខ្លួននៅឱ្យ ឆ្ងាយពីគ្រឿងញៀន និងអំពើអបាយមុខផ្សេងៗ។ ការលេងកីឡា គឺប្រៀបដូចទៅនឹងការអប់រំកាយ និងអប់រំចិត្ត ដោយកាត់បន្ថយពេលវេលាដែលមិនសមប្រកប បែរមកលេងកីឡាដើម្បីឱ្យមានកាយសម្បទារឹងមាំ សុខភាពល្អ និងមានសាច់ឈាមស្រស់ថ្លា។

បច្ចុប្បន្ននៅក្រសួងព័ត៌មាន បានបង្កើតក្លឹបកីឡាហែលទឹកក្រសួងព័ត៌មាន ដែលកំពុងមានការរីកចម្រើន ហើយបាននាំយកនូវមេដាយ និងកិត្តិយសជូនក្រសួង ជាពិសេសបានឈ្នះមេដាយពីការប្រកួត អន្តរជាតិមកជូនប្រទេសជាតិថែមទៀតផងដែរ។ នេះជាការថ្លែងរបស់លោក នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងឱកាសអញ្ជើញជាអធិបតីក្នុងពិធីបើកកម្មវិធីការប្រកួតវាយសីមិត្តភាព កម្ពុជា-ចិន មិនមែនអាជីព ក្រោមប្រធានបទ «People to People Exchange Amateur Badminton Champion 2024» រៀបចំឡើងដោយសារព័ត៌មានត្នោត និងសហពន្ធ័កីឡាវាយសីកម្ពុជា នៅទីលានក្លឹបវាយសី នរា ស្ថិតនៅកោះនរា រាជធានីភ្នំពេញ នាថ្ងៃទី២៩ ខែមិថុនា ឆ្នាំ២០២៤។

រដ្ឋមន្ត្រី នេត្រ ភក្ត្រា បានគូសបញ្ជាក់ថា ការរៀបចំព្រឹត្តការណ៍នៃការប្រកួតកីឡាវាយសីនេះឡើង ដើម្បីពង្រឹង និងពង្រីកទំនាក់ទំនង និងកិច្ចសហប្រតិបត្តិការត្បូងពេជ្រ ស្របតាមការប្តេជ្ញាចិត្តរួមរបស់ថ្នាក់ដឹកនាំនៃប្រទេសទាំងពីរ ដើម្បីប្រកៀកដៃគ្នាឆ្ពោះទៅសម្រេច «ឆ្នាំនៃការផ្លាស់ប្តូរប្រជាជន និងប្រជាជនកម្ពុជា-ចិន ២០២៤» តាមរយៈការលេងកីឡារួមគ្នា។

រដ្ឋមន្ត្រី បានរំលឹកឡើងវិញថា «កាលពីខែមេសា ឆ្នាំ២០២៤កន្លងទៅថ្មីៗនេះ ប្រទេសទាំងពីរក៏ទើបបានរៀបចំរួមគ្នានូវព្រឹត្តិការណ៍ សម្តែងក្បាច់គុនសាវលីញ និងគុនល្បុក្កតោ នៅអង្គរ (When Shaolin Meets Bokator At Angkor)» នៅ ខេត្តសៀមរាប ដើម្បីផ្សព្វផ្សាយបញ្ជាបការយល់ដឹងអំពីយុទ្ធនាការ «ឆ្នាំនៃការផ្លាស់ប្តូរប្រជាជននិងប្រជាជនកម្ពុជា-ចិន២០២៤» ដល់ស្រទាប់យុវជនប្រជាជន នៃប្រទេសទាំងពីរ។

កាលពីដើមខែមិថុនាកន្លងទៅនេះ គណៈប្រតិភូក្រសួងព័ត៌មានដឹកនាំដោយលោក នេត្រ ភក្ត្រា បានអញ្ជើញទៅចូលកម្មវិធីផ្លាស់ប្តូរប្រជាជន និងប្រជាជន រួមទាំងការផ្សព្វផ្សាយវិស័យទេសចរណ៍ នៅយូណាន់ ប្រទេសចិន។

តាមរយៈនៃការរៀបចំព្រឹត្តិការណ៍ ប្រកួតវាយសីមិត្តភាពកម្ពុជា-ចិន (មិនមែនអាជីព) នាថ្ងៃនេះ លោក នេត្រ ភក្ត្រា មានជំនឿជាក់ថា នឹងរួមចំណែកបន្ថែមមួយកម្រិតទៀតធ្វើឱ្យ ទំនាក់ទំនងរវាងប្រទេសទាំងពីរកាន់តែរឹងមាំ ស៊ីជម្រៅ និងសម្រេចបាននូវចក្ខុវិស័យ នៃការបង្កើត «សហគមន៍ជោគវាសនារួម កម្ពុជា-ចិន»។

លោករដ្ឋមន្ត្រី នាគូសបញ្ជាក់សារជាថ្មីថា ការជួបជុំគ្នាលេងកីឡានៅថ្ងៃនេះ អាចប្រព្រឹត្តទៅបានក៏ ដោយសារប្រទេសយើងមានសុខសន្តិភាពពេញលេញ និងមានការអភិវឌ្ឍរីកចម្រើនស្ទើរគ្រប់វិស័យ ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដូចដែលមាននៅក្នុងទិសស្លោកសម្រាប់ការប្រកួតកីឡាស៊ីហ្គេមដែលកម្ពុជាធ្វើ ជាម្ចាស់ផ្ទះ «កីឡារស់នៅក្នុងសន្តិភាព» ឬ «Sport Lives in Peace» ។

រដ្ឋមន្ត្រីក្រសួងព័ត៌មាន ជឿជាក់ថា ព្រឹត្តិការណ៍ប្រកួតវាយសីមិត្តភាពកម្ពុជា-ចិន (មិនមែនអាជីព) នៅថ្ងៃនេះ បានឆ្លុះបញ្ចាំងយ៉ាងច្បាស់លាស់នូវការប្តេជ្ញាចិត្ត និងឆន្ទៈក្នុងការបន្តពូនជ្រំទំនាក់ទំនង និងកិច្ចសហប្រតិបត្តិទ្វេភាគី និងជាច្រកមួយដែលបើកទូលាយ ដើម្បីស្វាគមន៍កិច្ចសហការនានា ដែលបន្តធ្វើរួមគ្នានាពេល អនាគត ដើម្បីរួមចំណែកក្នុងដំណើរអភិវឌ្ឍន៍ប្រជាជាតិទាំងពីរកម្ពុជា-ចិន។

លោក Chen Cong អគ្គទីប្រឹក្សាស្ថានទូតចិនប្រចាំកម្ពុជា មានប្រសាសន៍លើកឡើងថា កីឡាជាវិស័យសំខាន់មួយនៃការផ្លាស់ប្តូរវប្បធម៌រវាងប្រជាជននិងប្រជាជន។ ស្មារតីនៃការខិតខំ ប្រឹងប្រែង កិច្ចសហប្រតិបត្តិការ និង ព្យាយាមដោះស្រាយបញ្ហាប្រឈមរួមគ្នាដែលមាននៅក្នុងវិស័យកីឡា គឺជាទ្រព្យសម្បត្តិដ៏មានតម្លៃដែលត្រូវបានចែករំលែកដោយសង្គមមនុស្ស ហើយនឹងជា ចំណងរវាងប្រជានកម្ពុជា និង ប្រជាជនចិនដ៏សំខាន់មួយ។ តំណាងស្ថានទូតចិន សង្ឃឹមថា យើងទាំងគ្នាជាកីឡាករ «អាចរាប់អានគ្នាជាមិត្តតាមរយៈកីឡាវាយ សីនេះ» ធ្វើឲ្យកាន់តែស៊ីជម្រៅថែមទៀតនូវចំណងមិត្តភាពនិងសាមគ្គីភាព និងរីកចម្រើនជាមួយគ្នា តាមរយៈការប្រកួតនេះដែរ។ លោកស្រី Han Li អគ្គនាយិកាសារព័ត៌មានត្នោត ញ៉ូស មានប្រសាសន៍លើកឡើងថា តាមរយៈការប្រកួតកីឡាវាយសីនេះ នឹងអាចរឹតបន្តឹងចំណងមិត្តភាព ដ៏ជ្រាលជ្រៅរវាងប្រជាជនចិន និងប្រជាជនកម្ពុជា នឹងជំរុញការផ្លាស់ប្តូរ ការធ្វើសមាហរណកម្មវប្បធម៌រវាងប្រទេសទាំងពីរបានកាន់តែស៊ីជម្រៅជាងមុន។ កីឡាវាយសី មិនត្រឹមតែជាកីឡាប៉ុណ្ណោះទេ ថែមទាំងជាស្ពានតភ្ជាប់វប្បធម៌ខុសៗគ្នាផងដែរ។

នៅក្នុងឆ្នាំ២០២៤ដែលជាឆ្នាំនៃការផ្លាស់ប្តូរប្រជាជន និងប្រជាជនរវាងប្រទេសកម្ពុជា-ចិន ព្រឹត្តិការណ៍ ដែលបានរៀបចំនៅពេលនេះ គឺមិនត្រឹមតែជាការប្រកួតកីឡាប៉ុណ្ណោះទេ ប៉ុន្តែវាក៏ជាពេលវេលាដ៏សំខាន់សម្រាប់ការផ្លាស់ប្តូរវប្បធម៌រវាងប្រទេសទាំងពីរ ចិន កម្ពុជា ដូចគ្នា។ លោក ប្រាក់ ផាន់ណារ៉ា រដ្ឋលេខាធិការក្រសួងទេសចរណ៍ បានចាត់ទុកប្រព្រឹត្តការណ៍នៃការប្រកួតកីឡាវាយសី មិត្តភាព កម្ពុជា-ចិន មិនមែនអាជីព ក្រោមប្រធានបទ «People to People Exchange Amateur Badminton Champion 2024» គឺមានសារៈសំខាន់ក្នុងការពង្រឹងចំណងមិត្តភាព និងកិច្ចសហប្រតិបត្តិរវាងប្រទេសទាំងពីរកម្ពុជា ចិន កាន់តែប្រសើរបន្ថែមទៀត ពិសេសជាការទាក់ទាញភ្ញៀវទេសចរចិន មកទស្សនាកម្ពុជា កាន់តែច្រើនបន្ថែមទៀត តាមរយៈវិស័យទេសចរណ៍ដីសប្បូរណ៍បែបនៅកម្ពុជា៕