(ម៉ាឡេស៉ី)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានទទួលជួបពិភាក្សាការងារជាមួយលោក Kishore Babu G.S.C Yerraballa តំណាងសហភាពទូរគមនាគមន៍អន្តរជាតិ (International Telecommunication Union (ITU) ប្រចាំតំបន់អាស៊ីអាគ្នេយ៍ និងអាស៊ីប៉ាស៊ីហ្វិក ដោយផ្តោតជាសំខាន់លើការពង្រឹងកិច្ចសហប្រតិបត្តិការបច្ចេកទេស និងការកសាងសមត្ថភាពសម្រាប់មន្រ្តី។

ជំនួបនេះធ្វើឡើងនៅល្ងាចថ្ងៃទី០២ ខែកញ្ញា ឆ្នាំ២០២៤ នៅទីក្រុងសេឡាំង ប្រទេសម៉ាឡេស៊ី ស្របពេលនៃដំណើរចូលរួមកិច្ចប្រជុំមហាសន្និបាតលេីកទី២២ និងសន្និសីទកំពូលសារព័ត៌មានអាស៊ីលើកទី១៩ រៀបចំឡើងដោយវិទ្យាស្ថានអភិវឌ្ឍន៍ប្រព័ន្ធផ្សាយសោតទស្សន៍អាស៊ីប៉ាស៊ីហ្វិក។

នាកាសនោះដែរ លោករដ្ឋមន្រ្តីក្រសួងព័ត៌មានកម្ពុជា បានថ្លែងអំណរគុណចំពោះការជួយគាំទ្ររបស់ ITU មកដល់ប្រទេសកម្ពុជានាពេលកន្លងមក ជាពិសេសពាក់ព័ន្ធនឹងការរៀបចំផែនទីបង្ហាញផ្លូវសម្រាប់ការផ្លាស់ប្តូរពីប្រព័ន្ធអាណាឡូកទៅឌីជីថល។

លោករដ្ឋមន្ត្រីក៏បានស្នើឱ្យសហភាពទូរគមនាគមន៍អន្តរជាតិ ប្រចាំតំបន់អាស៊ីអាគ្នេយ៍ និងអាស៊ីប៉ាស៊ីហ្វិក បន្តការចូលរួមជាមួយកម្ពុជាដើម្បីលើកស្ទួយវិស័យផ្សព្វផ្សាយ និងឌីជីថលនៅកម្ពុជាដោយអនុលោមតាមបទដ្ឋានអន្តរជាតិ។

លោករដ្ឋមន្រ្តី នេត្រ ភក្ត្រា បានគូសបញ្ជាក់ថា ការគាំទ្ររបស់ ITU ដែលជាស្ថាប័នជំនាញអន្តរជាតិក្នុងវិស័យទូរគមនាគមន៍ ពិតជាមានសារៈសំខាន់សម្រាប់កម្ពុជាក្នុងការរៀបចំគោលនយោបាយជាតិពាក់ព័ន្ធនឹងការផ្លាស់ប្តូរពីប្រព័ន្ធអាណាឡូកទៅឌីជីថល ដែលកម្ពុជាបានប្តេជ្ញាចិត្តសម្រេចឱ្យបាននៅក្នុងពេលឆាប់ៗខាងមុខ៕