(ព្រះវិហារ)៖ លោក ឯក ចន្ថា អគ្គលេខធិការ នៃអគ្គលេខាធិការដ្ឋាន ក្រសួងសេដ្ឋកិច្ច និងហិរញ្ញវត្ថុ តំណាងលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៥ ខែកញ្ញា ឆ្នាំ២០២៤ បានដឹកនាំក្រុមការងារចុះសួរសុខទុក្ខសំណេះសំណាល និងនាំអំណោយរបស់ក្រសួងសេដ្ឋកិច្ច និងហិរញ្ញវត្ថុ ទៅចែកជូននាយទាហាន នាយទាហានរង និងពលទាហាន នៃវរសេនាតូចអន្តរាគមន៍លេខ៣៩៥ ចំណុះយោធភូមិភាគ៤ ព្រមទាំងនាយនគរបាល ពលនគរបាល នៃវរសេនាតូចនគរបាលការពារព្រំដែនគោកលេខ១០៥ ដែលកំពុងប្រចាំការនៅតំបន់មុំ៣ ក្នុងភូមិសែនតេជៈ ឃុំមរកត ស្រុកជាំក្សាន្ត ខេត្តព្រះវិហារ។
ពិធីនេះបានធ្វើឡើងនៅទីបញ្ជាការវរសេនាតូចលេខ១០៥ នគរបាលការពារព្រំដែនគោក ដោយមានការចូលរួមពីថ្នាក់ដឹកនាំ មន្ត្រីរាជការ នៃអគ្គលេខាធិការដ្ឋាន ក្រសួងសេដ្ឋកិច្ច និងហិរញ្ញវត្ថុ មន្ទីរសេដ្ឋកិច្ច និងហិរញ្ញវត្ថុ ខេត្តព្រះវិហារ ខេត្តកំពង់ធំ ខេត្តសៀមរាប ខេត្តបន្ទាយមានជ័យ និងខេត្តឧត្តរមានជ័យ ជាច្រើនរូបទៀត។
នៅក្នុងឱកាសនេះដែរ លោក ឯក ចន្ថា បានថ្លែងពាំនាំនូវការផ្តាំផ្ញើសាកសួរសុខទុក្ខ សេចក្តីនឹករលឹក និងដឹងគុណយ៉ាងជ្រាលជ្រៅពីសំណាក់លោកអគ្គបណ្ឌិតសភាចារ្យឧបនាយករដ្ឋមន្ត្រី ដែលតែងតែយកចិត្តទុកដាក់ចំពោះសុខទុក្ខ របស់បងប្អូនកងកម្លាំងគ្រប់ជាន់ថ្នាក់ទាំងអស់ ដែលកំពុងឈរជើងការពារព្រំដែននៅសមូរភូមិមុខ ព្រមទាំងបានលះបង់កម្លាំងកាយចិត្ត ពុះពារការលំបាក ក្នុងការខិតខំបំពេញភារកិច្ចរបស់ខ្លួនក្នុងបុព្វហេតុការពារជាតិមាតុភូមិ បូរណភាពទឹកដី អធិបតេយ្យជាតិ រក្សាសុខសន្តិភាព និងស្ថិរភាពនយោបាយជូនប្រទេសកម្ពុជា និងប្រជាជនកម្ពុជាទាំងមូល។
លោកអគ្គលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងទៀតថា ស្ថិតនៅក្នុងទស្សនវិស័យនៃសិល្បៈនៃការចែករំលែក ក្រោមគំនិតផ្តយចផ្តើមដ៍ឈ្លាសវៃរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា ក្រសួងសេដ្ឋកិច្ច និហិរញ្ញវត្ថុ បានចងសម្ព័ន្ធមេត្រីភាពជាមួយអង្គភាពទាំងពីរ ក្នុងគោលបំណងគាំទ្រ និងជំរុញការអនុវត្តគោលនយោបាយរបស់រាជរដ្ឋាភិបាល ព្រមទាំងរឹតចំណងមេត្រីភាព សាមគ្គីភាព ភាតរភាព រវាងកងទ័ព និងស្ថាប័នអង្គភាពស៊ីវិល ឱ្យកាន់តែជិតស្និទ្ធដើម្បីរៀនសូត្រ និងដកពិសោធន៍ពីគ្នាទៅវិញទៅមក ព្រមទាំងដើម្បីលើកកម្ពស់ជីវភាពរបស់កងទ័ពឱ្យកាន់តែប្រសើរ ដែលជានិច្ចជាកាលថ្នាក់ដឹកនាំ និងមន្ត្រីរាជការ នៃក្រសួងសេដ្ឋកិច្ច និងហិរញ្ញវត្ថុ តែងតែយកចិត្តទុកដាក់ចំពោះសុខទុក្ខ និងនាំយកអំណោយមកចែកជូនបងប្អូនកងទ័ពនិងកងនគរបាលការពារព្រំដែនគោក នៅរៀងរាល់មុនពិធីបុណ្យប្រពៃណីជាតិធំៗ ដូចជាបុណ្យចូលឆ្នាំខ្មែរ និងបុណ្យភ្ជុំបិណ្ឌ ចាប់ពីឆ្នាំ២០០៨ មកទល់ពេលបច្ចុប្បន្ន។
លោក ឯក ចន្ថា ក៏បានថ្លែងគូសបញ្ជាក់អំពីការឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ របស់រាជរដ្ឋាភិបាលនីតិកាលទី៧នៃរដ្ឋសភា ក្រោមការដឹកនាំប្រកបដោយភាពស្វាហាប់ និងគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានដាក់ចេញនិងកំពុងអនុវត្តយុទ្ធសាស្ត្របញ្ចកោណដំណាក់កាលទី១ ដើម្បីជំរុញកំណើនសេដ្ឋកិច្ច បង្កើតការងារ ធានាសមធម៍ បង្កើនប្រសិទ្ធភាព និងរក្សាចីរភាព នៃការអភិវឌ្ឍន៍ប្រទេសជាតិ ព្រមទាំងបន្តរក្សាបាននូវសន្តិភាព និងស្ថិរភាពនយោបាយ និងសម្រេចបាននូវសមិទ្ធិផលសំខាន់ៗលើគ្រប់វិសយ័ សម្រាប់ជាការលើកកម្ពស់ជីវភាពរស់នៅរបស់ប្រជាពលរដ្ឋ រួមទាំងមន្ត្រីរាជការ និងកងកម្លាំងប្រដាប់អាវុធគ្រប់ប្រភេទ។
អំណោយនាំមកចែកជូននាពេលនេះរួមមាន៖បងប្អូនកងទ័ព និងកងនគរបាល ក្នុងម្នាក់ៗទទួលបានថវិកាចំនួន៥០០០០រៀល អង្គភាពនីមួយៗទទួលបានថវិកចំនួន២.០០០.០០០រៀល រួមជាមួយគ្រឿងបរិក្ខាបច្ចេកវិទ្យាព័ត៍មាន សម្ភារប្រើប្រាស់ គ្រៀងឧបភោគ បរិភោគ និងថ្នាំពេទ្យមយយចំនួនផងដែរ សរុបថវិការប្រមាណចំនួន២១២លានរៀល៕
