(កណ្ដាល)៖ ថ្នាក់ដឹកនាំ និងមន្ត្រីបច្ចេកទេស នៃក្រសួងសាធារណការ និងដឹកជញ្ជូន ព្រមទាំងក្រុមហ៊ុនចិនស្ថាបនា ស៊ាងហៃ (SCG) បានចុះពិនិត្យស្ថានភាពមហាវិថី «ស៊ី ជីនពីង» (ក្រវាត់ក្រុងទី៣) ដើម្បីធានប្រសិទ្ធភាព និងសុវត្ថិភាពសម្រាប់ការបើកបរ។ ប្រតិបត្តិការនេះ បានធ្វើឡើងនៅថ្ងៃទី ២៥ ខែកញ្ញា ឆ្នាំ២០២៤នេះ។

លោក លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន បានថ្លែងថា មហាវិថីស៊ី ជីនពីង(ក្រវាត់ក្រុងទី៣)ស្ថាបនាឡើងមានគុណភាពល្អ ស្របតាមស្តង់ដា បច្ចេកទេសខ្ពស់។ ទន្ទឹមនឹងផ្លូវស្អាត ធំទូលាយ មានអ្នកបើកបរមួយចំនួនតូចបើកលើសល្បឿនកំណត់ មិនគោរពច្បាប់ចរាចរណ៍ បង្ករឱ្យកើតមានគ្រោះថ្នាក់ដល់ខ្លួនឯង និងអ្នកដទៃជារឿយៗ។

ជាមួយគ្នានេះដែរ លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន ព្រមទាំងមន្ត្រីជាច្រើននាក់ និងក្រុមវិស្វករចិន ស្ថិតក្នុងគ្រាចុះពិនិត្យមើលទីតាំង ដែលគេលើកឡើងថារអិល និងមានគ្រោះថ្នាក់ នៅចំណុចខ្លះនៃមហាវិថីស៊ី ជីនពីង បានលើកឡើងថា ពិតណាស់មហាវិថីនេះ ស្ថាបនាឡើងស្របតាមស្តង់ដារ មានគុណភាពល្អ ប៉ុន្តែចំណុចខ្លះ គេចាក់ដីខ្ពស់ជាងផ្លូវ ហើយមានដីធ្លាក់ពីលើផ្លូវ និងខ្លះមានធ្លាក់ខ្សាច់ថែមទៀត ដែលជាមូលហេតុនាំឲ្យអ្នកជិះម៉ូតូទាំងពេលភ្លៀងនោះរអិលដួល មិនមែនដោយសារផ្លូវខុសបច្ចេកទេសនោះទេ ណាមួយពេលភ្លៀងចឹង មិនគួរបើកបរលឿនឡើយ គួរបើកបរដោយការប្រុងប្រយ័ត្ន។

បន្ថែមលើសនេះ លោក លឹម ស៊ីដេនីន បានថ្លែងថា ការចុះមកនេះ លោកចង់ដឹងច្បាស់ថា តើទីតាំងដែលធ្លាប់កើតមានគ្រោះថ្នាក់ ហើយចោទថា មកពីផ្លូវរអិលនោះយ៉ាងណា ? ក្រោយចុះពិនិត្យមើលទៅ វាមិនដូចការលើកឡើងនោះទេ ពោលគឺទីតាំងដែលរថយន្តបើកឡើងឃឿនសួនច្បារចែកទ្រូងផ្លូវនោះ គឺអ្នកបើកបរគេចពីម៉ូតូជ្រុលឡើងលើឃឿនផ្លូវ។

រីឯចំណុចរង្វង់មូលដែលឧស្សាហ៍ឡានធំបើកបុកនោះ ដោយសារអស់លោកមួយចំនួនបើកមិនប្រុងប្រយ័ត្នពេលចុះស្ពាន ពោលគឺក្រុមការងារបានដាក់ស្លាកសញ្ញា ចរាចរណ៍ច្បាស់ៗណាស់ ហើយនៅលើផ្លូវនេះទៀតសោត ក៏មានដាក់សញ្ញាកំណត់ល្បឿនតាមតំបន់ផងដែរដែលជាការគិតគូយកចិត្តទុកដាក់សុវត្ថិភាពអ្នកបើកបរ ប៉ុន្តែអ្នកបើកបរដោយសារឃើញផ្លូវស្អាត ធំទូលាយ ចេះតែបើកលឿន ខ្វះការប្រុងប្រយ័ត្ន ទើបនាំឲ្យកើតបញ្ហា ។

លោកបញ្ជាក់ថា ក្រសួងបានធ្វើការជាមួយអគ្គស្នងការដ្ឋាននគរបាលជាតិ នឹងដាក់ទីតាំងចាប់ល្បឿនលើផ្លូវក្រវ៉ាត់ក្រុងឆាប់ៗនេះ ដើម្បីសុខសុវត្ថិភាពអ្នកបើកបរ ខណៈដែលផ្លូវនេះ មិនមែនផ្លូវល្បឿនលឿនទេ អ្នកជិះបើកលឿនៗណាស់, ណាមួយផ្លូវក្រវ៉ាត់ក្រុងនេះ ក៍មានផ្លូវកាត់ឆ្លងថ្នល់ផងដែរ, បើបើកលឿនម្លឹងៗ វានាំឲ្យកើតគ្រោះថ្នាក់ច្រើន។

លោកបានថ្លែងថា «រឿងរ៉ាវនេះកើតឡើងដោយសារអ្នកបើកបរខ្វះការប្រុងប្រយ័ត្ន និងល្មើសល្បឿនដោយខ្លួនឯង បែរជាមកចោទប្រកាន់ថា ផ្លូវនេះខុសបច្ចេកទេស បើកមិនកើត រអិលទៅវិញ, ខ្ញុំសូមបដិសេធការលើកឡើងនេះ។ ប៉ុន្តែមិនបន្ទោសបងប្អូនប្រជាពលរដ្ឋទេ តែសូមគោរពលើកម្រាមដៃដប់ស្នើរសុំអ្នកបើកបរទាំងអស់ មេត្តាគោរពច្បាប់ចរាចរណ៍ទាំងអស់គ្នាផង បើគ្រប់គ្នាគោរពបានល្អ គ្មានឡើយពាក្យថា គ្រោះថ្នាក់ចរាចរណ៍»។

លោកបញ្ជាក់ទៀតថា ក្រសួងនឹងសហការជាមួយអាជ្ញាធរមូលដ្ឋាន ចុះប្រតិបត្តិការពិនិត្យមើលទៅលើការចាក់ដីខ្ពស់ជាងផ្លូវ ការដឹកជញ្ជូនសារធាតុរ៉ែដែលបង្ករឲ្យធ្លាក់រប៉ាត់រប៉ាយលើផ្លូវ និងបទល្មើសផ្សេងទៀតឲ្យបានម៉ឺងម៉ាត់ ដើម្បីភាពច្បាស់លាស់នៃការអះអាងពីគុណភាពផ្លូវ និងបញ្ជៀសការបង្ករបញ្ហាលើផ្លូវក្រវាត់ក្រុងនេះ ។

លោកក៏បានអំពាវនាវដល់សាធារណជនដែលប្រើប្រាស់ផ្លូវក្រវាត់ក្រុងទី៣នេះ សូមមេត្តាចូលរួមគោរពច្បាប់ចរាចរណ៍ទាំងអស់គ្នា និងបើកបរមេត្តាប្រុងប្រយ័ត្នដើម្បីសុវត្ថិភាពទាំងអស់គ្នា ព្រោះផ្លូវនេះ ល្អ ស្អាត ធំទូលាយ ហើយចាំបាច់ណាស់អ្នកបើកបរផ្ទាល់ត្រូវប្រយ័ត្នដោយខ្លួនឯង៕