(តាកែវ)៖ ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន និងលោកស្រី ឆាយ សាលីន តំណាងនាយឧត្តមសេនីយ៍ ស ថេត អគ្គស្នងការនគរបាលជាតិ និងលោកស្រី បានផ្ដួចផ្ដើមកសាងនូវអង្គព្រះកឋិនទានដ៏ធំមួយ ប្រកបដោយសទ្ធាដ៏ប្រសើរជ្រះថ្លាក្រៃលែង ចំពោះព្រះពុទ្ធសាសនា ដើម្បីវេរប្រគេនព្រះសង្ឃ គង់ចាំព្រះវស្សាអស់ការត្រីមាសក្នុងព័ទ្ធសីមា វត្តសោមុនីវ័ន ហៅវត្តត្រពាំងបឹង ស្ថិតនៅក្នុងភូមិកុកតារៀ ឃុំរវៀង ស្រុកសំរោង ខេត្តតាកែវ កាលពីថ្ងៃទី០៣ ខែវិច្ឆិកា ឆ្នាំ២០២៤។
កឋិន គឺជាទានដ៏វិសេសលើសទាននានា ព្រោះជាទានសង្គ្រោះ ភិក្ខុសង្ឃដែលគង់ចាំព្រះវស្សាអស់រយៈពេលបីខែ ឱ្យលោកទទួល បានអានិសង្ស ៥យ៉ាង ទោះបីកឋិននោះតូចតាច តិចតួចស្តួចស្តើង ឬធំដុំសម្បូរបែបយ៉ាងណាក៏ដោយ ភិក្ខុអ្នកក្រាលគ្រងនិងអ្នក អនុមោទនានៅតែទទួលអានិសង្ស៥យ៉ាងក្នុងរវាង៥ខែរាប់អំពី វេលាដែលភិក្ខុបានក្រាលគ្រងនិងអនុមោទនាកឋិនទៅ។
ចំណែកទាយកទាយិកា អ្នកធ្វើកឋិនក៏ត្រូវទទួលបានអានិសង្សដ៏ច្រើនលើសលប់ ក្រៃលែងលើសបុណ្យនានាទាំងអស់ លើកលែងតែបុណ្យធម្មទាន ហើយរមែងបានសុខចម្រើនទាំងក្នុង លោកនេះបន្តដល់បរលោក ។ អ្នកធ្វើកឋិនរមែងបានអានិសង្ស៥ យ៉ាងគឺ៖
១. ភិក្ខុបញ្ញា វិសារទោ មានប្រជ្ញាក្លៀវក្លាមុះមុត
២. សុវណ្ណតា មានពណ៌សម្បុរល្អ
៣. សុរូបតា មានរូបល្អ
៤. សុសណ្ឋានា មានទ្រង់ទ្រាយល្អ
៥. ចក្កវត្តិ រាជា ហោតិ នឹងបានទៅជាស្តេចចក្រពត្តិក្នុងជាតិ ណាមួយពុំខានឡើយ ។
ឧត្តមសេនីយ៍ឯក ឃឹង សារ៉ាត់នាយកមន្ទីរប្រឆាំងបទល្មើសគ្រឿងញៀន បានមានប្រសាសន៍ ការប្រារព្ធឱ្យមានការជួបជុំពុទ្ធបរិស័ទ កសាងអង្គកឋិនទាននៅថ្ងៃនេះ គឺដោយសារតែប្រទេសមានសុខសន្តិភាពពេញលេញ ហើយការកសាងអង្គកឋិនទានថ្ងៃនេះ គឺសបញ្ជាក់ឲ្យឃើញអំពីសាមគ្គីភាពរបស់ប្រជាជនកម្ពុជាទាំងមូល ទាំងផ្នែកពុទ្ធចក្រ និងផ្នែកអាណាចក្រ។ ផ្ទុយទៅវិញ នៅក្នុងសម័យសង្គ្រាមស៊ីវិលក្នុងទស្សវត្សឆ្នាំ៧០ ព្រះសង្ឃមិនអាចមានលទ្ធភាពពេញលេញ ក្នុងការសិក្សាធម៌វិន័យនោះឡើយ ដោយត្រូវនិមន្តគេច រត់លូន ពីគ្រាប់ផ្លោងនិងការប្រយុទ្ធគ្នាជាប្រចាំ។ ទីវត្តអារាម ព្រះពុទ្ធបដិមាករ ត្រូវរងនូវកការបំភ្លេចបំផ្លាញស្ទើរខ្ទេចគ្មានសល់។ ជាងនេះទៀត នៅ ក្នុងរបបកម្ពុជាប្រជាធិបតេយ្យ ប្រល័យពូជសាសន៍ ប៉ុល ពត វិស័យព្រះពុទ្ធសាសនាត្រូវកំទេច បំផ្លាញនិងបំបិទនូវសិទ្ធិខាងជំនឿសាសនាទាំងស្រុង។
ជាភ័ព្វសំណាងល្អ ក្រោយថ្ងៃរំដោះ៧មករា ឆ្នាំ១៩៧៩ ប្រជាពលរដ្ឋខ្មែរបានទទួលជាបឋម នូវសិទ្ធិនៃការស់រានមានជីវិត ដែលជាសិទ្ធិដ៏ចំបងបង្អស់ក្នុងការទទួលបាននូវសិទ្ធិសេរីភាពដ៏ទៃទៀតក្នុងនាមជាមនុស្សជាតិ។ ក្រោយការកសាងប្រទេសពីបាតដៃទទេរ ប្រជាពលរដ្ឋកម្ពុជាបានទទួលមកវិញនូវសិទ្ធិខាងជំនឿសាសនា ហើយវិស័យជំនឿសាសនា កាន់តែមានការអភិវឌ្ឍ និងអភិរក្សជាលំដាប់រហូតមកដល់បច្ចុប្បន្ន។ ភាពរីកចំរើននៃផ្លូវពុទ្ធចក្រនេះ គឺដោយសារប្រទេសជាតិបាន និងកំពុងស្ថិតក្រោមម្លប់នៃសុខសន្តិភាពពេញផ្ទៃប្រទេស។
ឧត្តមសេនីយ៍ឯក ឃឹង សារ៉ាត់ បានបញ្ជាក់បន្ថែមថា សុខសន្តិភាពនេះ ពិតជាមូលដ្ឋានគ្រឹះដ៏ចំបង នៃការជំរុញឱ្យមានការអភិវឌ្ឍរីកចម្រើនលើគ្រប់វិស័យឥតឈប់ឈរ ទាំងផ្លូវអាណាចក្រ ទាំងផ្លូវពុទ្ធចក្រ ដូច្នេះ ប្រជាពលរដ្ឋយើងទាំងអស់គ្នា ត្រូវប្តេជ្ញាចិត្តស្រឡាញ់ និងថែរក្សា ការពារសន្តិភាពនេះឲ្យបានគង់រង្សជារៀងរហូត។
លោកបានបញ្ជាក់ថា បច្ច័យដែលនឹងត្រូវវេរប្រគេន ព្រះភិក្ខុសង្ឃនៅថ្ងៃនេះ ដើម្បីទុកកសាងរាល់សមិទ្ធផលនានា សម្រាប់តម្កល់ទុកជាឧត្តមប្រយោជន៍ ជូនដល់ប្រជាពុទ្ធបរិស័ទចំណុះជើងវត្ត ត្រពាំងបឹង ដែលសមិទ្ធផលទាំងនេះ មិនមែនសម្រាប់ទុកបម្រើផលប្រយោជន៍ របស់នរណាម្នាក់នោះទេ គឺសម្រាប់បម្រើផលប្រយោជន៍រួមរបស់ពុទ្ធសាសនិក និងបងប្អូនប្រជាពលរដ្ឋទាំងអស់ដែលរស់នៅ ភូមិកុកតារៀ ឃុំរវៀង ស្រុកសំរោង ខេត្តតាកែវ។
ឆ្លៀតក្នុងឱកាសនេះ ឧត្តមសេនីយ៍ឯក ឃឹង សារ៉ាត់ ក៏បានអំពាវនាវដល់បងប្អូនប្រជាពុទ្ធបរិស័ទបន្តចូចូលរួមអភិរក្ស និងអភិវឌ្ឍវិស័យសាសនា ដោយគោរពសេរីភាពខាងជំនឿ ចូលរួមលើកស្ទួយព្រះពុទ្ធសាសនា ដែលជាសាសនារបស់រដ្ឋ។
បន្ទាប់ពីប្រារព្ធកិច្ចទៅតាមប្រពៃណីព្រះពុទ្ធសាសនារួចមក ឧត្តមសេនីយ៍ឯក ឃឹង សារ៉ាត់ និងលោកស្រី ឆាយ សាលីន តំណាង នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកស្រី បានវេរប្រគេនបច្ច័យសង្កត់ត្រៃចំនួន៩៩លាន ៩៩ម៉ឺន ៩ពាន់៩រយរៀល ដល់ព្រះសង្ឃដែលគង់ចាំព្រះវស្សា នៅក្នុងវត្តសោមុនីវ័ន ហៅវត្តត្រពាំងបឹង ដើម្បីទុកកសាងសមិទ្ធផលនានានៅក្នុងទីអារាម។ បន្ថែមលើសពីនេះ ឧត្តមសេនីយ៍ឯក ឃឹង សារ៉ាត់និងលោកស្រី ឆាយ សាលីន បានជួយកសាងការចាក់ប្លង់សេដំបូងព្រះវិហារ ដែលមានតម្លៃប្រមាណជាង ១០ម៉ឺនដុល្លារ ដែលជាអំណោយដ៏ថ្លៃថ្លារបស់ នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកស្រីផងដែរ៕
